ຂ່າວຫຼ້າສຸດ

ອະນຸຍາດໃຫ້ບໍລິສັດ ຫຼັກຊັບລາວ-ຈີນ ເປັນທີ່ປຶກສາຈຳໜ່າຍຮຸ້ນ

387 15 ມ.ນ. 2019 ຂ່າວໜ້າ​ໜຶ່ງ
ອະນຸຍາດໃຫ້ບໍລິສັດ ຫຼັກຊັບລາວ-ຈີນ ເປັນທີ່ປຶກສາຈຳໜ່າຍຮຸ້ນ

    ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ​ມະ­ຫາ­ຊົນ (ທຄຕລ) ອະ­ນຸ­ຍາດ​ໃຫ້​ບໍ­ລິ­ສັດ ຫຼັກ​ຊັບ​ລາວ-ຈີນ ຈຳ­ກັດ​ເປັນ​ທີ່​ປຶກ­ສາ​ດ້ານ​ການ​ເງິນ ແລະ ຄ້ຳ­ປະ­ກັນ​ການ­ຈຳ­ໜ່າຍ​ຮຸ້ນ ທຄຕລ 19% ທີ່​ກະ­ຊວງ​ການ​ເງິນ​ຖື​ຄອງ​ຢູ່ ເພື່ອ​ຈຳ­ໜ່າຍ​ໃຫ້​ນັກ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ.

    ພິ­ທີ​ເຊັນ​ສັນ­ຍາ​ຈັດ​ຂຶ້ນ​ວັນ​ທີ 13 ມີ­ນາ 2019 ຢູ່ ທຄຕລ ລະ­ຫວ່າງ​ທ່ານ ພູ​ຂົງ ຈັນ­ທະ​ຈັກ ຜູ້­ອຳ­ນວຍ­ການ​ໃຫຍ່ ທຄຕລ ແລະ ທ່ານ ລິນ​ລີ ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ຫຼັກ​ຊັບ​ລາວ-ຈີນ ຈຳ­ກັດ ມີ​ທ່ານ ສີ​ລາ ວຽງ​ແກ້ວ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ​ນາງ ວັດ­ທະ­ນາ ດາ­ລາ​ລອຍ ຮອງ​ຜູ້​ວ່າ​ທະ­ນາ­ຄານ​ແຫ່ງ ສປປ ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຈຸດ­ປະ­ສົງ​ການ​ຫັນ​ກຳ­ມະ­ສິດ​ຂອງ​ລັດ­ຖະ­ບານ​ໃນ ທຄຕລ ໃຫ້​ຫຼຸດ​ລົງ​ຕື່ມ 19% ຄັ້ງ​ນີ້​ເພື່ອ​ເປັນ​ການ​ສະ­ໜັບ­ສະ­ໜູນ ໃຫ້​ມີ​ຫຼາຍ​ພາກ­ສ່ວນ​ມີ​ສ່ວນ​ຮ່ວມ​ໃນ​ການ​ຖື​ກຳ­ມະ­ສິດ ແລະ ເປັນ​ເຈົ້າ​ການ​ໃນ​ການ​ພັດ­ທະ­ນາ ທຄຕລ ເພື່ອ​ຊຸກ­ຍູ້​ການ​ຂະ­ຫຍາຍ­ຕົວ​ດ້ານ​ທຸ­ລະ​ກິດ​ຢ່າງ​ຍືນ​ຍົງ ກະ­ຊວງ​ການ​ເງິນ ໃນ​ຖາ­ນະ​ເປັນ​ຜູ້­ຕາງ­ໜ້າ​ລັດ­ຖະ­ບານ ຈຶ່ງ​ມີ​ແຜນ​ອອກ​ຈຳ­ໜ່າຍ​ຮຸ້ນ ທຄຕລ 19% ທີ່​ກະ­ຊວງ​ການ​ເງິນ​ຖື​ຄອງ​ຢູ່ ໂດຍ​ການ­ຈຳ­ໜ່າຍ​ຮຸ້ນ 2 ຮູບ​ແບບ ຄື: ຈຳ­ໜ່າຍ​ໃຫ້​ນັກ​ລົງ­ທຶນ​ທົ່ວ​ໄປ​ພາຍ​ໃນ ແລະ ຕ່າງ­ປະ­ເທດ 10% ແລະ ຄູ່​ຮ່ວມ​ຍຸດ​ທະ​ສາດ​ທີ່​ໄດ້​ຮັບ​ການ​ຄັດ​ເລືອກ​ຈາກ​ກະ­ຊວງ​ການ​ເງິນ 9% ສຳ­ລັບ​ການ​ດຳ­ເນີນ​ກະ­ກຽມ​ຂັ້ນ​ຕອນ​ຈຳ­ໜ່າຍ​ຮຸ້ນ​ດັ່ງ­ກ່າວ ໄດ້​ມອບ​ໝາຍ​ໃຫ້ ທຄຕລ ເປັນ​ຕົວ​ແທນ​ສັນ​ຫາ​ບໍ­ລິ­ສັດ ເພື່ອ​ບໍ­ລິ­ການ​ທີ່​ປຶກ­ສາ​ດ້ານ​ການ​ເງິນ ແລະ ຄ້ຳ­ປະ­ກັນ​ການ­ຈຳ­ໜ່າຍ​ຮຸ້ນ ເຊິ່ງ ທຄຕລ ຕົກ­ລົງ​ແຕ່ງ­ຕັ້ງ​ບໍ­ລິ­ສັດ ຫຼັກ​ຊັບ​ລາວ-ຈີນ ຈຳ­ກັດ ເປັນ​ທີ່​ປຶກ­ສາ​ດ້ານ​ການ​ເງິນ ແລະ ຄ້ຳ­ປະ­ກັນ​ການ­ຈຳ­ໜ່າຍ​ຮຸ້ນ ຍ້ອນ​ບໍ­ລິ­ສັດ​ດັ່ງ­ກ່າວ ເປັນ​ບໍ­ລິ­ສັດ​ທີ່​ມີ​ປະ­ສົບ​ການ​ດ້ານ​ຫຼັກ​ຊັບ​ລະ­ດັບ​ສາ­ກົນ ພ້ອມ​ທັງ​ຄ້ຳ­ປະ­ກັນ​ການ​ອອກ​ຈຳ­ໜ່າຍ​ຫຼັກ​ຊັບ ເລືອກ­ເຟັ້ນ​ຜູ້​ລົງ­ທຶນ​ຍຸດ​ທະ​ສາດ ແລະ ບໍ­ລິ­ການ​ວຽກ​ງານ​ການ​ລົງ­ທຶນ​ອື່ນໆ ນອກ​ນີ້ ບໍ­ລິ­ສັດ ຫຼັກ​ຊັບ​ລາວ-ຈີນ ຈຳ­ກັດ ຍັງ​ໄດ້​ຍົກ​ສູງ​ຄວາມ​ສຳ­ຄັນ​ການ​ອອກ​ຈຳ­ໜ່າຍ​ຮຸ້ນ ທຄຕລ 19% ທີ່​ກະ­ຊວງ​ການ​ເງິນ​ຖື​ຄອງ​ຢູ່ ໂດຍ​ນຳ​ໃຊ້​ປະ­ສົບ​ການ ແລະ ຖານ​ລູກ​ຄ້າ​ຢູ່​ພາຍ​ໃນ ແລະ ຕ່າງ­ປະ­ເທດ ພາຍ­ຫຼັງ​ການ​ລົງ​ນາມ​ຄັ້ງ​ນີ້ ທຄຕລ ແລະ ບໍ­ລິ­ສັດ ຫຼັກ​ຊັບ​ລາວ-ຈີນ ຈະ​ເລີ່ມ​ດຳ­ເນີນ​ການ​ແລະ​ກຽມ​ຄວາມ​ພ້ອມ​ທຸກ​ດ້ານ ເພື່ອ​ຮັບ­ປະ­ກັນ​ໃຫ້​ການ­ຈຳ­ໜ່າຍ​ຮຸ້ນ​ມີ​ຜົນ­ສຳ­ເລັດ.

ຂ່າວທີ່ກ່ຽວຂ້ອງ