ທີ່ເພິ່ງອັນປະເສີດ ກໍຄື ການເພິ່ງຕົນເອງ...

705 15 ມ.ນ. 2019 ນານາສາລະ

    ຄົນ​ລາວ​ບູ­ຮານ​ຈະ​ມີ​ຄຳ​ສອນ​ໃຫ້​ລູກ​ຫຼານ​ໄດ້​ມີ​ສະ­ຕິ​ໃນ​ການ​ເພິ່ງ​ຕົນ​ເອງ​ວ່າ: ຢ່າ​ຢືມ​ຮູ­ດັງ​ຄົນ​ອື່ນ​ຫາຍ­ໃຈ ເພາະ​ຖ້າ​ມົວ​ແຕ່​ໃຫ້​ຄົນ​ອື່ນ​ຫາຍ­ໃຈ​ຊ່ວຍ​ຜູ້­ກ່ຽວ​ກໍ​ຈະ​ຍ້າມ ບາງ​ກໍ­ລະ­ນີ​ຈົນ​ອ່ອນ­ເພຍ​ເປັ້ຍ​ລ່ອຍ ໃນ​ທາງ​ພຸດ​ທະ​ສາ­ສະ­ໜາ​ກໍ​ສອນ​ໄວ້​ວ່າ ໃນ​ໂລກ​ນີ້​ບໍ່​ມີ​ທີ່​ເພິ່ງ​ອັນ​ໃດ​ຈະ​ປະ­ເສີດ​ເທົ່າ​ກັບ​ການ​ເພິ່ງ​ຕົນ​ເອງ ຄວາມ​ຈະ­ເລີນ​ກ້າວ­ໜ້າ​ຂອງ​ຄົນ​ໃດ​ໜຶ່ງ ອົງ­ການ​ໜຶ່ງ ຫຼື ສັງ­ຄົມ​ໃດ​ໜຶ່ງ ຍ່ອມ​ສາ­ມາດ​ວັດ​ໄດ້​ດ້ວຍ​ຂີດ​ຄວາມ​ສາ­ມາດ​ຂອງ​ການ​ເພິ່ງ​ຕົນ​ເອງ ເຊິ່ງ​ແນ່­ນອນ​ຍ່ອມ​ຕ້ອງ​ໃຊ້​ເວ­ລາ.

    ຄວາມ​ຈະ­ເລີນ​ກ້າວ­ໜ້າ ຍ່ອມ​ເປັນ­ຄວາມ​ມຸງ​ໝາຍ​ຂອງ​ຄົນ​ໃດ​ໜຶ່ງ ອົງ­ການ ແລະ ສັງ­ຄົມ​ໃດ​ໜຶ່ງ ເຊັ່ນ: ຄວາມ​ຈະ­ເລີນ​ກ້າວ­ໜ້າ​ທາງ​ເສດ­ຖະ­ກິດ​ຂອງ​ຊາດ​ໜຶ່ງ​ກໍ່​ຈະ​ເອົາ GDP ມາ​ເປັນ​ເຄື່ອງ​ວັດ­ແທກ ແຕ່​ຢ່າ​ລືມ​ວ່າ GDP ບໍ່​ສາ­ມາດ​ວັດ­ແທກ​ຄວາມ​ຈະ­ເລີນ​ທາງ​ວັດ­ທະ­ນະ­ທຳ​ຂອງ​ຊາດ​ໄດ້ ວັດ­ທະ­ນະ­ທຳ​ຂອງ​ຊາດ​ບໍ່​ຖື​ເອົາ​ພຽງ​ແຕ່​ການ​ຢູ່​ດີ​ກິນ​ດີ​ຂອງ​ຄອບ­ຄົວ ຫຼື ຕະ­ກຸນ​ໃດ​ໜຶ່ງ ແຕ່​ຖື​ເອົາ​ການ​ສືບ​ທອດ​ພູມ​ປັນ­ຍາ ແລະ ສິ­ລະ​ປະ​ສືບ​ທອດ​ຕໍ່​ເນື່ອງ ແລະ ຂະ­ນະ​ດຽວ​ກັນ ເອ­ກະ­ລັກ​ຂອງ​ວັດ­ທະ­ນະ­ທຳ​ແຕ່​ລະ​ທ້ອງ­ຖິ່ນ​ພາຍ​ໃນ​ຊາດ ກໍ​ໄດ້​ຮັບ​ການ​ເຊີດ​ຊູ​ໄປ​ພ້ອມ​ກັນ ການ​ເພິ່ງ​ຕົນ​ເອງ​ຂອງ​ບຸກ­ຄົນ​ໃດ​ໜຶ່ງ ຍ່ອມ​ໝາຍ​ເອົາ​ຜູ້­ກ່ຽວ​ມີ​ຄຸນ­ສົມ­ບັດ ຢຶດ​ໝັ້ນ​ໃນ​ສິ່ງ​ທີ່​ຖືກ­ຕ້ອງ ເຊັ່ນ: ຄຸນ​ນະ​ທຳ ສິນ​ລະ​ທຳ ຄວາມ​ຊື່­ສັດ ຄວາມ​ຮູ້ ແລະ ຄວາມ​ສາ­ມາດ​ໃນ​ການ​ຫາ​ລ້ຽງ​ຊີບ​ຕົນ​ເອງ​ໄດ້ ເພາະ​ຄຸນ­ສົມ­ບັດ​ດັ່ງ­ກ່າວ ຍ່ອມ​ເປັນ​ພູມ​ຄຸ້ມ​ກັນ​ໃຫ້​ຜູ້­ກ່ຽວ​ເພິ່ງ​ຕົນ​ເອງ​ໄດ້ ສຳ­ລັບ​ສັງ­ຄົມ​ໃດ​ທີ່​ມີ​ຊັບ­ພະ­ຍາ­ກອນ ແລະ ທຸກ​ຄົນ​ໃນ​ສັງ­ຄົມ​ເຄົາ­ລົບ​ກະ­ຕິ​ກາ ບໍ່​ເອົາ​ປຽບ​ກັນ ຜູ້­ນຳ​ໃນ​ສັງ­ຄົມ ຢຶດ​ໝັ້ນ​ຄວາມ​ຖືກ­ຕ້ອງ ຍຸດ­ຕິ​ທຳ ຄຸນ­ສົມ­ບັດ​ດັ່ງ­ກ່າວ ກໍ​ສາ­ມາດ​ຮັບ­ປະ­ກັນ​ໄດ້​ວ່າ ສັງ­ຄົມ​ນັ້ນ​ຍ່ອມ​ຈະ­ເລີນ​ກ້າວ­ໜ້າ​ໄດ້.

    ບາງ​ສັງ­ຄົມ​ໃນ​ໂລກ ຫຼົງ​ໄປ​ເຂົ້າ­ໃຈ​ຜິດ​ກັບ​ຄວາມ​ຈະ­ເລີນ​ກ້າວ­ໜ້າ​ໃນ​ບາງ​ດ້ານ​ຂອງ​ການ​ພັດ­ທະ­ນາ ທີ່​ເປັນ​ພຽງ​ພາບ​ລວງ​ຕາ​ປາ­ກົດ​ໄລ­ຍະ​ສັ້ນ ແຕ່​ເວົ້າ​ໄດ້​ວ່າ​ເປັນ​ສິ່ງ​ຖາ­ວອນ ເຊິ່ງ​ຢ່າ​ລືມ​ວ່າ​ຫຼາຍ​ຄັ້ງ ເມື່ອ​ເກີດ​ບັນ­ຫາ​ດ້ານ​ເສດ­ຖະ­ກິດ ກໍ​ຈະ​ເຮັດ​ໃຫ້​ຄົນ​ໃນ​ສັງ­ຄົມ​ຮູ້​ທັນ­ທີ​ໂລດ​ວ່າ: ຄວາມ​ຈະ­ເລີນ​ແບບ​ພາບ​ລວງ​ຕາ ມັນ​ຊ່ວຍ​ຫຍັງ​ບໍ່​ໄດ້ ເຊິ່ງ​ບໍ່​ຕ່າງ​ຫຍັງ​ກັບ​ຕົ້ນ­ໄມ້​ທີ່​ມີ​ລຳ­ຕົ້ນ ແລະ ກິ່ງ​ງ່າ​ສູງ​ໃຫຍ່ ແຕ່​ບໍ່​ສາ­ມາດ​ແຜ່​ຮາກ​ລົງ​ໄດ້​ເລິກ ແລະ ກວ້າງ​ໄກ ເວ­ລາ​ເຈິ​ະ​ກັບ​ພາ­ຍຸ​ກໍ​ສ່ຽງ​ຕໍ່​ການ​ຖືກ​ພາ­ຍຸ​ພັດ​ໃຫ້​ລົ້ມ​ລົງ​ໄດ້.

    ດັ່ງ­ນັ້ນ ຄວາມ​ຈະ­ເລີນ​ກ້າວ­ໜ້າ​ແບບ​ຖາ­ວອນ ຈຶ່ງ​ສາ­ມາດ​ວັດ­ແທກ​ໄດ້​ດ້ວຍ​ຂີດ​ຄວາມ​ສາ­ມາດ​ຂອງ​ການ​ເພິ່ງ​ຕົນ​ເອງ ເຊິ່ງ​ອາ­ໄສ​ການ​ສ້າງ​ພູມ​ປັນ­ຍາ​ໃຫ້​ເກີດ​ຂຶ້ນ​ຢ່າງ​ແທ້​ຈິງ ບໍ່​ແມ່ນ​ຖື​ເອົາ​ວັດ­ຖຸ​ຄວາມ​ສະ­ດວກ​ສະ­ບາຍ​ຂອງ​ຄົນ​ຢິບ​ມື​ໜຶ່ງ​ເປັນ​ຄຳ​ຕອບ ສຳ­ລັບ​ໜ່ວຍ​ງານ ຫຼື ອົງ­ການ​ໃດ​ໜຶ່ງ​ຍ່ອມ​ບໍ່​ຕ້ອງ­ການ​ຫົວ­ໜ້າ​ປະ­ເພດ​ມື​ຖື​ສາກ ປາກ​ຖື​ສິນ ແລະ ຈະ​ກາຍ­ເປັນ​ຕົວ­ຢ່າງ​ບໍ່​ດີ​ແກ່​ລູກ​ນ້ອງ...!

ດັ້ນ​ກີບ​ເມກ

ຂ່າວທີ່ກ່ຽວຂ້ອງ