ຍທຂ ສະເໜີໃຫ້ພາກສ່ວນກ່ຽວຂ້ອງ ກວດກາ ແລະ ຄຸ້ມຄອງຫຼາຍບັນຫາ

152 14 ມີ.ນ. 2019 ຂ່າວໜ້າ​ໜຶ່ງ

    ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ຊຸດ​ທີ VIII ແລະ ສະ­ມາ­ຊິກ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ (ສສ ນວ) ຊຸດ​ທີ I ໄດ້​ລົງ​ພົບ​ປະ​ຄະ­ນະ​ການ​ນຳ ແລະ ພະ­ນັກ­ງານ​ຫຼັກ​ແຫຼ່ງ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ (ຍທຂ) ໃນ​ວັນ​ທີ 12 ມີ­ນາ 2019 ທີ່​ກະ­ຊວງ​ດັ່ງ­ກ່າວ ນຳ​ໂດຍ​ທ່ານ ພຸດ ສິມ​ມາ­ລາ​ວົງ ສສຊ ຊຸດ​ທີ VIII ປະ­ຈຳ​ເຂດ​ເລືອກ​ຕັ້ງ​ທີ 1 ນວ ຮອງ​ອະ­ທິ­ການ​ບໍ­ດີ ມຊ ທ່ານ ລິນ​ຄຳ ດວງ​ສະ­ຫວັນ ສສຊ ຊຸດ​ທີ VIII ປະ­ຈຳ​ເຂດ​ເລືອກ​ຕັ້ງ​ທີ 1 ແລະ ສະ­ມາ­ຊິກ​ສະ­ພາ​ປະ­ຊາ­ຊົນ ນວ ຊຸດ​ທີ I ຫົວ­ໜ້າ​ກົມ​ຄົ້ນ­ຄວ້າ-ສັງ​ລວມ ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ທ່ານ ບົວ​ເກດ ພົມ­ມະ­ຈັນ ສສຊ ຊຸດ​ທີ VIII ປະ­ຈຳ​ເຂດ​ເລືອກ​ຕັ້ງ​ທີ 1 ແລະ ສະ­ມາ­ຊິກ​ສະ­ພາ​ປະ­ຊາ­ຊົນ ນວ ຊຸດ​ທີ I ຮອງ​ຫົວ­ໜ້າ​ພະ​ແນກ​ຍຸ­ຕິ​ທຳ ນວ ທ່ານ​ນາງ ເກດ​ມະ­ນີ ບັນ­ດາ­ສັກ ປະ­ທານ​ຄະ­ນະ​ກຳ­ມະ­ການ​ວັດ­ທະ­ນະ­ທຳ-ສັງ­ຄົມ ແລະ ບັນ­ດາ­ເຜົ່າ ສສຊ ຊຸດ​ທີ VIII ປະ­ຈຳ​ເຂດ​ເລືອກ​ຕັ້ງ​ທີ 1 ແລະ ສະ­ມາ­ຊິກ​ສະ­ພາ​ປະ­ຊາ­ຊົນ ນວ ຊຸດ​ທີ I.

    ທ່ານ ບຸນ​ຈັນ ສິນ​ຣາ​ຊະ​ວົງ ຫົວ­ໜ້າ​ຫ້ອງ­ການ ກະ­ຊວງ ຍທຂ ໄດ້​ລາຍ​ງານ​ຫຍໍ້​ສະ­ພາບ​ລວມ​ຂອງ​ກະ­ຊວງ ກໍ​ຄື ຜົນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ປີ 2018 ໃຫ້ ສສຊ ແລະ ສສ ນວ ຊາບ ຈາກ​ນັ້ນ ສສຊ ແລະ ສສ ນວ ໄດ້​ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ ເຊິ່ງ​ໄດ້​ພິ­ຈາ­ລະ­ນາ ແລະ ຮັບ­ຮອງ​ເອົາ ເປັນ­ຕົ້ນ ບົດ​ລາຍ​ງານ​ກ່ຽວ​ກັບ​ການ­ເຄື່ອນ­ໄຫວ​ວຽກ​ງານ​ພົ້ນ​ເດັ່ນ​ຂອງ​ລັດ­ຖະ­ບານ ປະ­ຈຳ​ປີ 2018 ແລະ ແຜນ­ການ​ປະ­ຈຳ​ປີ 2019 ຮັບ­ຮອງ​ເອົາ​ກົດ­ໝາຍ 8 ສະ­ບັບ ໃນ​ນີ້ ກົດ­ໝາຍ​ສ້າງ​ໃໝ່ 7 ສະ­ບັບ ກົດ­ໝາຍ​ປັບ­ປຸງ 1 ສະ­ບັບ ແລະ ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ ສສ ນວ ຊຸດ​ທີ I ເຊິ່ງ​ໄດ້​ພິ­ຈາ­ລະ­ນາ ແລະ ຮັບ­ຮອງ​ບົດ​ລາຍ​ງານ​ຂອງ​ອົງ­ການ​ປົກ­ຄອງ ນວ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ​ປະ­ຈຳ​ປີ ນອກ​ນີ້​ຍັງ​ໄດ້​ຮັບ​ເອົາ​ບົດ​ລາຍ​ງານ​ວຽກ​ງານ​ສຳ­ຄັນ​ອື່ນໆ​ອີກ​ຈຳ­ນວນ​ໜຶ່ງ.

    ຕອນ​ທ້າຍ ສສຊ ແລະ ສສ ນວ ໄດ້​ເປີດ​ໂອ­ກາດ​ໃຫ້​ພະ­ນັກ­ງານ ກະ­ຊວງ ຍທຂ ສະ­ເໜີ​ບັນ­ຫາ​ຄົງ​ຄ້າງ​ຕ່າງໆ ເພື່ອ​ຈະ​ນຳ​ເອົາ​ຂໍ້­ຄົງ­ຄ້າງ​ຕ່າງໆ ໄປ​ສະ­ເໜີ​ຕໍ່​ອຳ­ນາດ​ການ​ປົກ­ຄອງ ແລະ ພາກ­ສ່ວນ​ກ່ຽວ­ຂ້ອງ​ແກ້​ໄຂ​ໃນ­ຕໍ່­ໜ້າ ໃນ​ນັ້ນ ສະ­ເໜີ​ໃຫ້​ພັກ-ລັດ­ຖະ­ບານ​ເພີ່ມ​ມາດ​ຕະ­ການ​ເຂັ້ມ​ງວດ​ຕື່ມ ເພື່ອ​ຄວບ​ຄຸມ​ກ່ຽວ​ກັບ​ການ​ລະ­ເມີດ​ກົດ­ໝາຍ​ການ​ຈາ­ລະ​ຈອນ ເປັນ­ຕົ້ນ ການ​ລ່ວງ​ໄຟ​ອຳ­ນາດ ທີ່​ເປັນ​ສາ­ເຫດ​ໃຫ້​ເກີດ​ອຸ­ບັດ­ເຫດ​ຖະ­ໜົນ ສະ­ເໜີ​ໃຫ້​ລົງ​ຕິດ­ຕາມ​ກວດ­ກາ ແລະ ມີ​ມາດ​ຕະ­ການ​ຄວບ​ຄຸມ​ຄ່າ​ບໍ­ລິ­ການ ໃນ​ງານ​ເທ​ສະ­ການ-ງານ​ບຸນ​ຕ່າງໆ ເປັນ­ຕົ້ນ ຄ່າ​ຝາກ​ລົດ ຄ່າ​ອາ­ຫານ ເຫັນ​ວ່າ​ຍັງ​ແພງ​ຫຼາຍ ຖ້າ​ທຽບ​ກັບ​ລາຍ​ຮັບ​ຂອງ​ພະ­ນັກ­ງານ ສະ­ເໜີ​ໃຫ້​ລົງ​ຕິດ­ຕາມ​ກວດ­ກາ ແລະ ຄົ້ນ­ຄວ້າ​ຫາ​ວິ­ທີ​ຄຸ້ມ​ຄອງ ເພື່ອ​ຫຼຸດ​ຈຳ­ນວນ​ຮ້ານ​ບັນ­ເທີງ-ຮ້ານ​ກິນ​ດື່ມ​ລົງ ເນື່ອງ​ຈາກ​ເປັນ​ສາ­ເຫດ​ໃຫ້​ເກີດ​ການ​ມຶນ­ເມົາ ແລະ ເກີດ​ອຸ­ບັດ­ເຫດ​ຕ່າງໆ ສະ­ເໜີ​ໃຫ້​ພາກ­ສ່ວນ​ກ່ຽວ­ຂ້ອງ​ລົງ​ກວດ­ກາ ແລະ ຫາ​ວິ­ທີ​ແກ້​ໄຂ​ກ່ຽວ​ກັບ​ການ​ອະ­ນຸ​ຮັກ​ຖະ­ໜົນ​ຫົນ­ທາງ ເຊິ່ງ​ປັດ­ຈຸ­ບັນ ເຫັນ​ວ່າ​ຍັງ​ມີ​ເສັ້ນ­ທາງ​ຫຼັກ​ບາງ​ເສັ້ນ​ຍັງ​ເປິ​ະ​ເປື້ອນ ແລະ ມີ​ດິນ-ຊາຍ ກວມ​ຂອບ​ທາງ​ໃຫຍ່​ໄປ​ຫຼາຍ ເປັນ­ຕົ້ນ ເສັ້ນ­ທາງ 450 ປີ ແລະ ບັນ­ຫາ​ອື່ນໆ ເຊິ່ງ​ບັນ­ດາ ສສຊ ແລະ ສສ ນວ ກໍ​ໄດ້​ຮັບ​ເອົາ​ຄຳ​ສະ­ເໜີ ເພື່ອ​ໄປ​ຄົ້ນ­ຄວ້າ​ນຳ​ສະ­ເໜີ​ຕໍ່​ພາກ­ສ່ວນ​ກ່ຽວ­ຂ້ອງ​ຕໍ່.

ຂ່າວທີ່ກ່ຽວຂ້ອງ