ແມ່ຍິງພະແນກ ຖວທ ເອົາໃຈໃສ່ເສີມຂະຫຍາຍຂໍ້ແຂ່ງຂັນ 3 ດີ

212 14 ມ.ນ. 2019 ຂ່າວໜ້າ​ໜຶ່ງ
ແມ່ຍິງພະແນກ ຖວທ ເອົາໃຈໃສ່ເສີມຂະຫຍາຍຂໍ້ແຂ່ງຂັນ 3 ດີ

    ກອງ​ປະ­ຊຸມ​ໃຫຍ່​ຄັ້ງ​ທີ 8 ສະ­ຫະ­ພັນ​ແມ່­ຍິງ ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ຈັດ​ຂຶ້ນ​ວັນ​ທີ 13 ມີ­ນາ 2019 ທີ່​ພະ​ແນກ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ​ນາງ ແກ້ວ​ທິບ ຂຸນ​ພົນ​ພິ​ທັກ ປະ­ທານ​ສະ­ຫະ­ພັນ​ແມ່­ຍິງ ພະ​ແນກ ຖວ​ທ ນວ ມີ​ທ່ານ​ນາງ ຄຳ​ໄພ ລັດ­ສະ­ໝີ ປະ­ທານ​ສະ­ຫະ­ພັນ​ແມ່­ຍິງ ນວ ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ ຖວ​ທ ນວ ຕາງ­ໜ້າ​ອົງ​ການ­ຈັດ­ຕັ້ງ​ມະ­ຫາ­ຊົນ ບັນ­ດາ​ຮອງ​ຫົວ­ໜ້າ​ພະ​ແນກ ຫົວ­ໜ້າ​ຂະ­ແໜງ ກອງ​ວິ­ຊາ​ການ ແລະ ສະ­ມາ­ຊິກ​ສະ­ຫະ­ພັນ​ແມ່­ຍິງ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ຮັບ​ຟັງ​ບົດ​ສະ­ຫຼຸບ​ຕີ​ລາ­ຄາ​ຄືນ ວຽກ​ງານ​ການ­ເຄື່ອນ­ໄຫວ​ຂອງ​ເອື້ອຍ​ນ້ອງ​ແມ່­ຍິງ​ໃນ​ໄລ­ຍະ 5 ປີ­ຜ່ານ­ມາ ຈຸດ​ດີ ຈຸດ​ອ່ອນ ຂໍ້­ຄົງ­ຄ້າງ ແລະ ບົດ­ຮຽນ​ທີ່​ຖອດ​ຖອນ​ໄດ້ ເພື່ອ​ສືບ­ຕໍ່​ເສີມ​ຂະ­ຫຍາຍ​ໃນ​ການ­ຈັດ­ຕັ້ງ​ປະ­ຕິ­ບັດ 5 ປີ​ຕໍ່­ໜ້າ (2019-2023) ເຊິ່ງ​ໄດ້​ຍົກ​ໃຫ້​ເຫັນ​ບາງ​ຜົນ­ງານ​ທີ່​ພົ້ນ​ເດັ່ນ ເປັນ­ຕົ້ນ ໄດ້​ເຕົ້າ­ໂຮມ​ຄວາມ​ສາ­ມັກ­ຄີ​ພາຍ​ໃນ ເອົາ­ໃຈ­ໃສ່​ວຽກ​ງານ​ແນວ​ຄິດ-ການ­ເມືອງ ເຝິກ­ຝົນ​ຫຼໍ່​ຫຼອມ​ຕົນ​ເອງ ຍົກ​ສູງ​ພາ­ລະ​ບົດ­ບາດ​ຂອງ​ຕົນ ເນັ້ນ​ສະ­ເພາະ​ການ­ເຄື່ອນ­ໄຫວ​ປະ­ກອບ­ສ່ວນ​ຢ່າງ​ຕັ້ງ­ໜ້າ ເຂົ້າ​ໃນ​ການ​ປະ­ຕິ­ບັດ​ຄຳ​ຂວັນ​ແມ່­ຍິງ 3 ດີ ຕີ​ຖອຍ​ປາ­ກົດ­ການ​ຫຍໍ້­ທໍ້ ສຸມ​ໃສ່​ປະ­ຕິ­ບັດ​ໜ້າ­ທີ່​ວິ­ຊາ​ສະ­ເພາະ ແລະ ຍົກ​ລະ­ດັບ​ທິດ​ສະ​ດີ​ການ­ເມືອງ-ການ​ປົກ­ຄອງ​ຊັ້ນ​ຕົ້ນ ຊຸດ​ທຳ​ອິດ ຈຳ­ນວນ 25 ຄົນ ພ້ອມ​ທັງ​ຍົກ​ລະ­ດັບ​ການ​ຮຽນ​ລະ­ດັບ​ຕ່າງໆ ພ້ອມ​ທັງ​ປະ­ກອບ­ສ່ວນ​ສຳ­ຄັນ​ໃນ​ປີ​ທ່ອງ​ທ່ຽວ​ລາວ 2018 ແລະ ປີ​ທ່ອງ​ທ່ຽວ ລາວ-ຈີນ 2019 ໄປ​ພ້ອມ​ກັບ​ການ​ຊຸກ­ຍູ້​ຂະ​ບວນ​ການ­ເຄື່ອນ­ໄຫວ​ວຽກ​ງານ 6 ສ ແລະ ວຽກ​ງານ​ຂະ​ບວນ​ການ​ຕ່າງໆ​ຢ່າງ​ມີ​ຜົນ­ສຳ­ເລັດ ຈາກ​ຜົນ­ງານ​ດັ່ງ­ກ່າວ ຈຶ່ງ​ໄດ້​ຮັບ​ການ​ຍ້ອງ­ຍໍ​ຊົມ­ເຊີຍ​ເປັນ​ພະ­ແນກ­ການ 3 ດີ 2 ຄັ້ງ​ຕິດ­ຕໍ່​ກັນ ໄດ້​ຮັບ​ການ​ຍ້ອງ­ຍໍ​ເປັນ​ສະ­ມາ­ຊິກ​ສະ­ຫະ­ພັນ​ແມ່­ຍິງ 3 ດີ 170 ຄົນ ແລະ ຮັບ​ໃບ​ຊົມ­ເຊີຍ​ແມ່­ຍິງ 3 ດີ 29 ຄົນ.

    ກອງ​ປະ­ຊຸມ​ໄດ້​ໃຊ້​ສິດ​ປະ­ຊາ­ທິ­ປະ­ໄຕ ຄັດ​ເລືອກ​ເອົາ​ຄະ­ນະ​ບໍ­ລິ­ຫານ​ງານ​ຊຸດ​ໃໝ່ ເຊິ່ງ​ມີ​ຜູ້​ລົງ​ຮັບ​ສະ­ໝັກ 7 ທ່ານ ເລືອກ​ເອົາ 5 ທ່ານ ທີ່​ປະ­ຊຸມ​ເຫັນ​ດີ​ເປັນ​ເອ­ກະ​ພາບ​ດ້ວຍ​ຄະ­ແນນ​ສຽງ​ສ່ວນ​ຫຼາຍ ເລືອກ​ເອົາ​ທ່ານ​ນາງ ຄຳ​ເປື່ອງ ວົງ​ຈັນ​ດີ ເປັນ​ປະ­ທານ ທ່ານ​ນາງ ເກດ​ເກ­ສອນ ທິ​ລະ​ວົງ ເປັນ​ຮອງ​ປະ­ທານ ທ່ານ​ນາງ ໄຊ​ສະ­ຫວັນ ສິນ​ນະ​ສອນ ເປັນ​ຮອງ​ປະ­ທານ ທັງ​ເປັນ​ປະ­ທານ​ກວດ­ກາ ທ່ານ​ນາງ ກ້ານ​ກ່ອງ ໂສມ​ອາ​ລຸນ ແລະ ທ່ານ​ນາງ ເກດ​ສະ­ໄໝ ພົມ​ມະ​ສີ­ສະ​ຫວັດ ເປັນ​ຄະ­ນະ.

ຂ່າວທີ່ກ່ຽວຂ້ອງ