ໄຟໄໝ້ປ່າສະຫງວນແຫ່ງຊາດ ພູພະນັງ

251 14 ມ.ນ. 2019 ຂ່າວໜ້າ​ໜຶ່ງ

    ຫຼັງ​ເກີດ​ເຫດ​ໄຟ​ໄໝ້​ປ່າ​ສະ­ຫງວນ​ແຫ່ງ​ຊາດ ພູ​ພະ­ນັງ ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ແຕ່​ວັນ​ທີ 7 ມີ­ນາ ເປັນ­ຕົ້ນ​ມາ ອົງ­ການ​ປົກ­ຄອງ​ເມືອງ​ສັງ​ທອງ ແລະ ພາກ­ສ່ວນ​ກ່ຽວ­ຂ້ອງ ໂດຍ​ສະ­ເພາະ ກຳ­ລັງ ປກສ ປກຊ ແລະ ພໍ່​ແມ່​ປະ­ຊາ­ຊົນ​ເຂດ​ໃກ້​ຄຽງ ໄດ້​ຮ່ວມ​ກັນ​ມອດ​ໄຟ​ຢ່າງ​ເປັນ​ເຈົ້າ​ການ ຂະ­ນະ​ທີ່​ມາ​ຮອດ​ວັນ​ທີ 12 ມີ­ນາ ສາ­ມາດ​ຄວບ​ຄຸມ​ໄຟ​ໄດ້​ແລ້ວ 90%.

    ທ່ານ​ຮ້ອຍ​ເອກ ອຳ​ຫຼ້າ ສິງ​ສະ­ໄໝ ຫົວ­ໜ້າ​ການ­ເມືອງ​ກອງ­ຮ້ອຍ​ທະ­ຫານ​ຮາບ 303 ກ່າວ​ວ່າ: ສາ­ເຫດ​ຕົ້ນ­ຕໍ​ຂອງ​ການ​ເກີດ​ໄຟ​ໄໝ້​ລາມ​ປ່າ​ດັ່ງ­ກ່າວ ຍ້ອນ​ປະ­ຊາ­ຊົນ​ຈຳ­ນວນ​ໜຶ່ງ​ທີ່​ຈູດ​ສວນ ໄຮ່ ແລະ ເຂົ້າ​ໄປ​ທຳ​ມາ​ຫາ​ກິນ​ຂາດ​ສະ­ຕິ ລະ­ມັດ­ລະ­ວັງ ໂດຍ​ສະ­ເພາະ ກ່ອນ​ຈູດ​ສວນ ໄຮ່ ບໍ່​ໄດ້​ແກວກ ຫຼື ເຮັດ​ແລວ​ປ້ອງ​ກັນ​ໄຟ​ບໍ່​ກວ້າງ ແລະ ບໍ່​ມອດ​ໄຟ​ຫຼັງ​ແຕ່ງ​ຢູ່​ຄົວ­ກິນ​ໃນ​ປ່າ ຂະ­ນະ​ທີ່​ໄຟ​ໄໝ້​ສະ­ເພາະ​ປ່າ​ສະ­ຫງວນ​ແຫ່ງ​ຊາດ ພູ​ພະ­ນັງ ມີ​ສອງ​ຈຸດ ຄື: ປ່າ​ສະ­ຫງວນ​ພູ​ພະ­ນັງ ເຂດ​ບ້ານ​ເພຍ​ລາດ ບ້ານ​ທ່າ​ນາ​ຂາມ 20 ເຮັກ­ຕາ ປ່າ​ສະ­ຫງວນ​ພູ​ພະ­ນັງ ເຂດ​ບ້ານ​ຫີນ​ສິ່ວ ບ້ານ​ໄຮ່​ໃຕ້ 10 ເຕັກ​ຕາ ນອກ​ນີ້​ຍັງ​ໄໝ້​ພູ­ຜາ​ເດືອນ ເຂດ​ບ້ານ​ຫີວ​ສິ່ວ ບ້ານ​ເພຍ​ລາດ 30 ເຮັກ­ຕາ ດອນ​ຫໍ​ບ້ານ​ອ່າງ​ນ້ອຍ 15 ເຮັກ­ຕາ ບ້ານ​ຊໍ້ 10 ເຮັກ­ຕາ ແລະ ບ້ານ​ຫ້ວຍ​ຫາງ 10 ເຮັກ­ຕາ.

ຂ່າວທີ່ກ່ຽວຂ້ອງ