ບໍລິສັດ ແອັດສະປາຍ ເປິດຕົວເກີບ ແລະ ເຄື່ອງນຸ່ງທີ່ຜະລິດຈາກໃບໝາກນັດ

219 14 ມ.ນ. 2019 ຫົວຂໍ້ຂ່າວອື່ນໆ

    ບໍ­ລິ­ສັດ​ໃນ​ແອັດ​ສະ​ປາຍ ເປິດ​ຕົວ​ເກີບ​ແບບ​ໃໝ່​ເພື່ອ​ແວດ​ລ້ອມ ຜະ­ລິດ​ຈາກ​ໃບ​ຂອງ​ໝາກ​ໄມ້​ທີ່​ເຮົາ​ຮູ້­ຈັກ​ກັນ​ດີ ເຊິ່ງ​ໝາຍ​ຄວາມ​ວ່າ​ເກີບ​ຄູ່​ຕໍ່​ໄປ​ຂອງ​ທ່ານ ອາດ​ເຮັດ​ມາ​ຈາກ​ໃບ​ໝາກ​ນັດ​ກໍ​ເປັນ​ໄດ້.

    ບໍ­ລິ­ສັດ Ananas Anam ໃນ​ແອັດ​ສະ​ປາຍ ໃຊ້​ເວ­ລາ 8 ປີ​ໃນ​ການ​ວິ­ໄຈ​ຜ້າ​ຊະ­ນິດ​ໃໝ່​ທີ່​ຜະ­ລິດ​ຈາກ​ໃບ​ໝາກ​ນັດ ໂດຍ​ຕັ້ງ​ຊື່­ວ່າ Pinatex.

    ທ່ານ ຄຸນ​ຄາ​ເມນ ໄຮ​ໂຮ​ຊ່າ ຜູ້​ກໍ່​ຕັ້ງ​ບໍ​ລີ​ສັດ Ananas Anam ກ່າວ​ວ່າ Pinatex ຄື​ວັດ​ສະ​ດຸ​ແຜ່ນ­ແພ​ແບບ​ໃໝ່​ທີ່​ຜະ­ລິດ​ຈາກ​ເສັ້ນ​ໄຍ​ຂອງ​ໃບ​ໝາກ​ນັດ ເຊິ່ງ​ປົກ­ກະ­ຕິ​ແລ້ວ ໃບ​ໝາກ​ນັດ​ນັ້ນ ຈະ​ຖືກ​ຖິ້ມ​ເປັນ​ສິ່ງ​ເຫຼືອ​ໃຊ້ ຫຼັງ​ຈາກ​ເກັບ​ກ່ຽວ​ໝາກ​ນັດ​ໄປ​ແລ້ວ.

    ທ່ານ ຄຸນ​ຄາ​ເມນ ຮ່ວມ​ມື​ກັບ​ຊາວ​ກະ­ສິ­ກອນ​ຜູ້​ປູກ​ໝາກ​ນັດ​ໃນ​ຟິ​ລິບ​ປິນ ເພື່ອ​ນຳ​ໃບ​ໝາກ​ນັດ​ທີ່​ເຫຼືອ​ຖິ້ມ​ມາ​ສະ­ກັດ​ເອົາ​ເສັ້ນ​ໄຍ​ອອກ​ມາ ເຊິ່ງ​ເສັ້ນ​ໄຍ​ນັ້ນ​ຈະ​ມີ​ຄວາມ​ໜຽວ ແຂງ­ແຮງ ແລະ ຍືດ​ຍຸ່ນ​ສູງ.

    Pinatex ເລີ່ມ​ເປິດ​ຕົວ​ເມື່ອ​ປີ 2015 ແລະ ໄດ້​ຖືກ​ນຳ­ໄປ​ໃຊ້​ໂດຍ​ບໍ­ລິ­ສັດ​ຜະ­ລິດ​ເຄື່ອງ­ນຸ່ງ​ຫົ່ມ​ຕ່າງໆ ປະ­ມານ 500 ແຫ່ງ ລວມ​ທັງ​ບໍ­ລິ­ສັດ​ແຟ​ຊັ່ນ​ຊື່​ດັງ​ຢ່າງ Hugo Boss ທີ່​ນຳ­ໄປ​ຜະ­ລິດ​ເປັນ​ເກີບ​ກີ­ລາ​ຈາກ​ເສັ້ນ​ໄຍ​ພືດ.

    ທ່ານ ທິມ​ໂມ​ທີ ເທີ​ເນີ-ຊັດ​ຕັນ ຜູ້­ອຳ­ນວຍ­ການ​ຝ່າຍ​ອອກ​ແບບ​ຂອງ​ບໍ­ລິ­ສັດ​ເຄື່ອງ­ນຸ່ງ​ຫົ່ມ ອັລ​ເທຍ (Altiir) ບອກ​ວ່າ ລູກ​ຄ້າ​ທີ່​ເຫັນ​ຜະ­ລິດ​ຕະ​ພັນ​ໃໝ່​ຈາກ​ເສັ້ນ​ໄຍ​ພືດ​ນີ້ ຕ່າງ​ສະ­ແດງ​ຄວາມ​ສົນ­ໃຈ​ໃນ​ຮູບ​ລັກ­ສະ­ນະ ແລະ ເອກ​ກະ​ລັກ​ຂອງ​ເກີບ​ຮຸ່ນ​ໃໝ່​ນີ້ ເຊິ່ງ​ເບິ່ງ​ພາຍ​ນອກ​ເໝືອນ​ກັບ​ໜັງ​ສັດ ແຕ່​ເມື່ອ​ສຳ­ຜັດ​ແລ້ວ​ຈະ​ຮູ້​ວ່າ​ແຕກ​ຕ່າງ​ໄປ​ຈາກ​ໜັງ​ທຳ​ມະ​ດາ.

    ຄົນ​ທີ່​ເຄີຍ​ນຸ່ງ​ເສື້ອ ແລະ ໃສ່​ເກີບ​ທີ່​ຜະ­ລິດ​ຈາກ Pinatex ບອກ​ວ່າ ເຄື່ອງ­ນຸ່ງ​ທີ່​ຜະ­ລິດ​ຈາກ​ວັດ​ສະ​ດຸ​ນີ້​ຍັງ​ເຂົ້າ​ຮູບ ເຖິງ​ແມ່ນ​ຜ່ານ​ໄປ​ເປັນ​ປີ ແລະ ຍັງ​ແຫ້ງ​ໄວ ເຮັດ​ຄວາມ​ສະ­ອາດ​ງ່າຍ​ເໝືອນ​ໜັງ​ສັດ ນອກ­ຈາກ​ນີ້ ຍັງ​ເປັນ​ການ​ນຳ​ຂີ້​ເຫຍື້ອ​ເຫຼືອ​ຖິ້ມ​ໄປ​ໃຊ້​ທາງ​ການ​ກະ­ສິ­ກອນ ແທນ​ທີ່​ຈະ​ຕ້ອງ​ໃຊ້​ໜັງ​ສັດ ຫຼື ໜັງ­ທຽມ​ທີ່​ຕ້ອງ​ໃຊ້​ກຳ​ມະ​ວິ­ທີ​ການ​ຜະ­ລິດ​ເຊິ່ງ​ເປັນ​ອັນ­ຕະ­ລາຍ​ຕໍ່​ສິ່ງ­ແວ­ດລ້ອມ.

    ໂດຍ​ທາງ​ບໍ­ລິ­ສັດ​ມີ​ແຜນ​ຈະ​ຂະ­ຫຍາຍ​ໄປ​ສູ່​ຕະ­ຫຼາດ​ໃໝ່ໆ ລວມ​ເຖິງ​ຕະ­ຫຼາດ​ເຟີ​ນິ​ເຈີ ແລະ ເບາະ​ລົດ​ໃຫຍ່​ອີກ​ດ້ວຍ.

ວ. ດາ­ລາ​ວົງ-ນຳ​ສະ­ເໜີ

ຂ່າວທີ່ກ່ຽວຂ້ອງ