ຂ່າວຫຼ້າສຸດ

ກອງ​ປະ​ຊຸມ​ສິ່ງ​ແວດ​ລ້ອມ​​ຄັ້ງ​ທີ 4 ຂອງ ​ສປຊ ຈັດ​ຂຶ້ນ​ຢູ່​ໄນ​ໂຣ​ບີ

166 14 ມ.ນ. 2019 ຂ່າວຕ່າງປະເທດ
ກອງ​ປະ​ຊຸມ​ສິ່ງ​ແວດ​ລ້ອມ​​ຄັ້ງ​ທີ 4 ຂອງ ​ສປຊ ຈັດ​ຂຶ້ນ​ຢູ່​ໄນ​ໂຣ​ບີ

    ຕາມ​ຂ່າວ​ຕ່າງປະເທດ ກອງ​ປະຊຸມ​ສິ່ງແວດລ້ອມ​ຄັ້ງ​ທີ 4 ຂອງ​ອົງການ​ສະຫະ​ປະຊາ​ຊາດ (​ສປຊ) ໄດ້​ໄຂ​ຂຶ້ນ​ຢູ່​ນະຄອນຫຼວງ​ໄນ​ໂຣ​ບີ ຂອງ​ປະເທດ​ເຄນ​ຢາ ໃນ​ວັນ​ທີ 11 ມີນາ​ນີ້ ໂດຍ​ຈະ​ດຳເນີນ​ໄປ​ເປັນ​ເວລາ 5 ວັນ ຊຶ່ງ​ມີ​ຜູ້​ແທນ 4700 ກວ່າ​ຄົນ ທີ່​ມາ​ຈາກ 170 ກວ່າ​ປະເທດ ແລະ ເຂດ​ແຄວ້ນ​ຂອງ​ໂລກ​ເຂົ້າ​ຮ່ວມ ທີ່​ນັບ​ວ່າ​ຫຼາຍ​ເປັນ​ປະຫວັດ​ການ ເພື່ອ​ຄົ້ນຄວ້າ​ແຜນການ​ແກ້​ໄຂ​ດ້ານ​ເຕັກນິກ ແລະ​ການ​ປະດິດ​ສ້າງ​ໃໝ່ ກ່ຽວ​ກັບ​ບັນຫາ​ສິ່ງແວດລ້ອມ ແນໃສ່​ເພື່ອ​ໃຫ້​ບັນລຸ​ການ​ບໍລິໂພກ ແລະ​ການ​ຜະລິດ​ແບບ​ຍືນ​ຍົງ.

    ກອງ​ປະຊຸມ​ຄັ້ງ​ນີ້ ໄດ້​ເນັ້ນ​ຫົວຂໍ້ “ຄົ້ນຄວ້າ​ວິທີ​ແກ້​ໄຂ​ທີ່​ມີ​ການ​ປະດິດ​ສ້າງ​ໃໝ່ ເພື່ອ​ຮັບ​ມື​ກັບ​ສິ່ງ​ທ້າ​ທາຍ​ດ້ານ​ສະພາບ​ແວດ​ລ້ອມ ແລະ​ບັນລຸ​ການ​ບໍລິໂພກ ແລະ​ການ​ຜະລິດ​ແບບ​ຍືນ​ຍົງ”. ມະຕິ​ທີ່​ກ່ຽວຂ້ອງ ແລະ​ຂໍ້​ຕົກລົງ​ທີ່​ກອງ​ປະຊຸມ​ໄດ້​ຮັບຮອງ​ເອົາ​ນັ້ນ ຈະ​ມີ​ຜົນ​ສະທ້ອນ​ຢ່າງ​ເລິກເຊິ່ງ​ໃນ​ໄລຍະ​ຍາວ​ຕໍ່​ການ​ບັນລຸ ສົນທິສັນຍາ​ປາ​ຣີ ແລະ ວິໄສ​ທັດ “ການ​ພັດທະນາ​ແບບ​ຍືນ​ຍົງ​ພາຍ​ໃນ​ປີ 2030” ສ້າງ​ພື້ນຖານ​ໃຫ້​ແກ່​ກອງ​ປະຊຸມ​ສຸດ​ຍອດ ກ່ຽວ​ກັບ​ການ​ປ່ຽນແປງ​ດິນ​ຟ້າ​ອາກາດ​ຂອງ ​ສປຊ ປີ 2019.

    ໃນ​ໄລຍະ​ຈັດ​ກອງ​ປະຊຸມ​ນີ້ ໂຄງການ​ສິ່ງແວດລ້ອມ​ສະຫະ​ປະຊາ​ຊາດ (UNEP) ຈະ​ໄດ້​ເຜີຍແຜ່​ບົດ​ລາຍ​ງານ​ການ​ຄົ້ນຄວ້າ​ຕ່າງໆ ລວມ​ທັງ “ການ​ຈ້ອງ​ເບິ່ງ​ສິ່ງແວດລ້ອມ​ທົ່ວ​ໂລກ​ສະບັບ​ທີ 6”.

ຂ່າວທີ່ກ່ຽວຂ້ອງ