ຂ່າວຫຼ້າສຸດ

ເວ​ເນ​ຊູ​ເອ​ລາ ວາງ​ກຳນົດ​ເສັ້ນ​ຕາຍ​ໃຫ້​ນັກ​ການ​ທູດ​ຂອງ ສ ອາ​ເມ​ຣິ​ກາ ຖອນ​ກັບ​ຄືນ​ປະເທດ

316 14 ມ.ນ. 2019 ຂ່າວຕ່າງປະເທດ
ເວ​ເນ​ຊູ​ເອ​ລາ ວາງ​ກຳນົດ​ເສັ້ນ​ຕາຍ​ໃຫ້​ນັກ​ການ​ທູດ​ຂອງ ສ ອາ​ເມ​ຣິ​ກາ ຖອນ​ກັບ​ຄືນ​ປະເທດ

    ວັນ​ທີ 12 ມີນາ​ນີ້ ລັດຖະບານ​ເວ​ເນ​ຊູ​ເອ​ລາ ໄດ້​ຕົກລົງ​ບໍ່​ອະນຸຍາດ​ໃຫ້​ແກ່ຍາວ ສຳລັບ​ການ​ມີໜ້າ​ຂອງ​ບັນດາ​ນັກ​ການ​ທູດ​ຂອງ ສ ອາ​ເມ​ຣິ​ກາ ຢູ່​ໃນ​ດິນແດນ​ຂອງ​ເວ​ເນ​ຊູ​ເອ​ລາ ພ້ອມ​ກັນ​ນັ້ນ​ກໍ​ສະເໜີ​ໃຫ້​ພະນັກງານ​ທັງ​ໝົດ​ຢູ່​ໃນ​ສະຖານ​ສູດ ສ ອາ​ເມ​ຣິ​ກາ ປະຈຳ​ນະຄອນຫຼວງ ກາ​ຣາ​ກາ​​ສ ຖອນ​ກັບ​ຄືນ​ປະເທດ ພາຍ​ໃນ​ເວລາ 72 ຊົ່ວໂມງ.

    ແຈ້ງ​ການ​ຢ່າງ​ເປັນ​ທາງ​ການ ຂອງ​ກະຊວງ​ການ​ຕ່າງປະເທດ​ເວ​ເນ​ຊູ​ເອ​ລາ ໃຫ້​ຮູ້​ວ່າ ການ​ມີໜ້າ​ຂອງ​ພະນັກງານ​ການ​ທູດ ສ ອາ​ເມ​ຣິ​ກາ ເປັນ​ການ “ກໍ່ໃຫ້ເກີດ​ຄວາມ​ອັນຕະລາຍ​ເສຍ​ຫາຍ ຕໍ່​ຄວາມ​ໝັ້ນຄົງ ສັນຕິພາບ ແລະ​ຜືນ​ແຜ່ນດິນ​ອັນ​ຄົບ​ຖ້ວນ” ຂອງ​ເວ​ເນ​ຊູ​ເອ​ລາ. ຄຽງ​ຄູ່​ກັນ​ນັ້ນ ລັດຖະບານ​ເວ​ເນ​ຊູ​ເອ​ລາ ກໍ​ປະກາດ​ເຖິງ​ການ​ຢຸດຕິ​ການ​ເຈລະຈາ ກ່ຽວ​ກັບ​ຄວາມ​ເປັນ​ໄປ​ໄດ້ ໃນ​ການ​ສ້າງຕັ້ງ​ຫ້ອງການ​ຜູ້ຕາງໜ້າ​ດ້ານ​ສິດຜົນປະໂຫຍດ ຢູ່​ໃນ​ນະຄອນຫຼວງ​ຂອງ​ແຕ່​ລະ​ປະເທດ (ເວ​ເນ​ຊູ​ເອ​ລາ ແລະ ສ ອາ​ເມ​ຣິ​ກາ) ແລະ ໃຫ້​ທັດສະນະ​ວ່າ ທຸກໆ​ບັນຫາ​ທີ່​ຕ້ອງການ​ເຈລະຈາ ລະຫວ່າງ​ສອງ​ຝ່າຍ ຈະ​ໄດ້​ຮັບ​ການ​ປະຕິບັດ​ຜ່ານ​ຕົວ​ແທນ​ປະຈຳ​ອົງການ​ສະຫະ​ປະຊາ​ຊາດ.

    ໃນ​ຂະນະ​ດຽວ​ກັນ ທ່ານ ທາ​ເຣັກ ວິນ​ລຽມ ຊາ​ອັບ ລັດຖະມົນຕີ​ກະຊວງ​ຍຸຕິ​ທຳ ຂອງ​ເວ​ເນ​ຊູ​ເອ​ລາ ແຈ້ງ​ໃຫ້​ຮູ້ເມື່ອ​ວັນ​ທີ 12 ມີນາ​ນີ້​ວ່າ ອົງການ​ປົກ​ປ້ອງ​ກົດໝາຍ​ຂອງ​ເວ​ເນ​ຊູ​ເອ​ລາ ໄດ້​ຕົກລົງ​ເປີດ​ການ​ສືບສວນ​ສອບ​ສວນ​ຕໍ່​ທ່ານ ຈວານ ກວາຍ​ໂດ ຜູ້ນຳ​ຝ່າຍ​ຄ້ານ​ໃນ​ເວ​ເນ​ຊູ​ເອ​ລາ ຍ້ອນ​ສົງ​ໃສ​ວ່າ​ຕິດ​ພັນ​ກັບ​ກົນອຸບາຍ​ທຳລາຍ​ຕາ​ນ່າງ​ໄຟຟ້າ​ແຫ່ງ​ຊາດ ທີ່​ໄດ້​ເຮັດ​ໃຫ້​ເກີດ​ຂາດ​ໄຟຟ້າ ເກືອບ​ທັງ​ໝົດ​ໃນ​ດິນແດນ​ຂອງ​ປະເທດ​ນີ້ ມາ​ຕັ້ງແຕ່​ວັນ​ທີ 7 ມີນາ​ທີ່​ຜ່ານ​ມາ ເປັນ​ເຫດ​ໃຫ້ການ​ເຄື່ອນ ໄຫວ​ຂອງ​ປະຊາຊົນ ແລະ​ສຳນັກງານ​ອົງການ​ຂອງ​ລັດ ເກີດ​ຂາດ​ໄລຍະ ໃນ​ຊຸມ​ມື້​ທີ່​ຜ່ານ​ມາ.

   ທ່ານ ຊາ​ອັບ ໃຫ້​ຮູ້​ວ່າ ຫຼັງ​ຈາກ​ເກີດ​ປະກົດ​ການ​ໄຟຟ້າ​ຂາດ​ໃນ​ບໍລິເວນ​ກວ້າງ​ແລ້ວ  ກວາຍ​ໂດ ຜູ້​ທີ່​ປະກາດ​ຕົນ​ເອງ​ເປັນ​ປະທານາທິບໍດີ​ຊົ່ວຄາວ ຂອງ​ເວ​ເນ​ຊູ​ເອ​ລາ ໄດ້​ຖະແຫຼງ​ຜ່ານ​ສື່​ສັງຄົມ Twitter ວ່າ “ເວ​ເນ​ຊູ​ເອ​ລາ ຮູ້​ແຈ້ງວ່າ ແສງ​ສະຫວ່າງ ສາມາດ​ມີ​ຂຶ້ນ​ໄດ້ ໃນ​ເມື່ອ​ການ​ຢຶດ​ອຳນາດ​ສິ້ນ​ສຸດ​ລົງ.” ເລື່ອງ​ນີ້​ເປັນ​ການສະແດງ​ໃຫ້​ເຫັນ​ວ່າ ກວາຍ​ໂດ ເປັນ​ໜຶ່ງ​ໃນ​ຕົວ​ການ​ທາງ​ຈິດໃຈ​ຂອງ​ກໍລະນີ ການ​ທຳລາຍ​ຕາ​ນ່າງ​ໄຟຟ້າ ແລະ ຄຳ​ເວົ້າ​ນັ້ນ​ເບິ່ງ​ຄື​ວ່າ​ເປັນ​ການ​ກະ​ຕຸ້ນ ໃຫ້​ເກີດ​ສົງຄາມ​ພາຍ​ໃນ ປະເທດ ທ່າມກາງ​ທີ່​ທົ່ວ​ປະເທດ ພວມ​ປະ​ເຊີນ​ກັບ​ສະພາບ​ຂາດ​ໄຟຟ້າ.

 

ຂ່າວທີ່ກ່ຽວຂ້ອງ