ຮົງກາຣີ ເພີ່ມທຶນການສຶກສາໃຫ້ແກ່ລາວເປັນ 100 ທຶນ

292 14 ມ.ນ. 2019 ຂ່າວໜ້າ​ໜຶ່ງ
ຮົງກາຣີ ເພີ່ມທຶນການສຶກສາໃຫ້ແກ່ລາວເປັນ 100 ທຶນ

    ໂດຍ​ຕອບ​ສະ­ໜອງ​ການ​ເຊື້ອ​ເຊີນ​ຂອງ​ທ່ານ ວິກ​ຕໍ​ຣ ອໍ​ຣ​ບານ ນາ­ຍົກ­ລັດ­ຖະ­ມົນ­ຕີ ແຫ່ງ ຮົງ​ກາ​ຣີ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ໄດ້​ນຳ­ພາ​ຄະ­ນະ​ຜູ້​ແທນ​ລັດ­ຖະ­ບານ​ລາວ ເດີນ­ທາງ​ໄປ​ຢ້ຽມ­ຢາມ ຮົງ​ກາ​ຣີ ຢ່າງ​ເປັນ​ທາງ​ການ ໃນ​ວັນ​ທີ 10-12 ມີ­ນາ ນີ້ ຊຶ່ງ​ເປັນ​ການ​ຢ້ຽມ­ຢາມ​ຄັ້ງ​ປະ­ຖົມ​ມະ­ລຶກ ທີ່​ມີ​ຄວາມ​ໝາຍ​ຄວາມ​ສຳ­ຄັນ​ທາງ​ປະ­ຫວັດ­ສາດ ນັບ​ແຕ່​ໄດ້​ດຳ­ລົງ​ຕຳ­ແໜ່ງ​ເປັນ​ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ການ​ຢ້ຽມ­ຢາມ​ຄັ້ງ​ນີ້ ເປັນ​ນິ­ມິດ​ໝາຍ​ອັນ​ດີ​ອັນ​ຍິ່ງ​ໃຫຍ່ ໃນ​ການ​ເພີ່ມ​ທະ­ວີ​ຮັດ​ແໜ້ນ​ສາຍ​ພົວ­ພັນ ແລະ ເສີມ​ຂະ­ຫຍາຍ​ມິດ­ຕະ­ພາບ ແລະ ການ​ຮ່ວມ​ມື​ທີ່​ເປັນ​ມູນ­ເຊື້ອ​ຍາວ​ນານ ລະ­ຫວ່າງ ສປປ ລາວ ແລະ ຮົງ​ກາ​ຣີ ໃຫ້​ແໜ້ນ​ແຟ້ນ ແລະ ແຕກ​ດອກ​ອອກ​ຜົນ​ຍິ່ງໆ​ຂຶ້ນ.

    ວັນ​ທີ 11 ມີ­ນາ 2019 ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ໄດ້​ພົບ​ປະ​ສອງ​ຝ່າຍ​ຢ່າງ​ເປັນ​ທາງ​ການ​ກັບ​ທ່ານ ວິກ​ຕໍ​ຣ ອໍ​ຣ​ບານ ນາ­ຍົກ­ລັດ­ຖະ­ມົນ­ຕີ ແຫ່ງ ຮົງ​ກາ​ຣີ ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ​ຂອງ ຮົງ​ກາ​ຣີ ຊຶ່ງ​ໃນ​ນັ້ນ ສອງ​ຝ່າຍ​ໄດ້​ທົບ​ທວນ ແລະ ຕີ​ລາ­ຄາ​ສູງ​ຕໍ່​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ທີ່​ເປັນ​ມູນ­ເຊື້ອ​ຍາວ​ນານ ລະ­ຫວ່າງ ລາວ-ຮົງ​ກາ​ຣີ ສອງ​ປະ­ເທດ​ເຄີຍ​ໄດ້​ໃຫ້­ການ​ສະ­ໜັບ­ສະ­ໜູນ ແລະ ຊ່ວຍ­ເຫຼືອ​ເຊິ່ງ​ກັນ ແລະ ກັນ ທັງ​ໃນ​ຂອບ​ສອງ​ຝ່າຍ ກໍ​ຄື ຫຼາຍ​ຝ່າຍ​ຕະ­ຫຼອດ​ມາ ຄຽງ​ຄູ່​ກັນ​ນັ້ນ ທ່ານ​ນາ­ຍົກ­ລັດ­ຖະ­ມົນ­ຕີ ທອງ​ລຸນ ສີ​ສຸ​ລິດ ໄດ້​ສະ­ແດງ​ຄວາມ​ຮູ້​ບຸນ­ຄຸນ​ອັນ​ເລິກ­ເຊິ່ງ ຕໍ່​ການ​ຊ່ວຍ­ເຫຼືອ​ອັນ​ລ້ຳ​ຄ່າ​ຂອງ​ລັດ­ຖະ­ບານ ແລະ ປະ­ຊາ­ຊົນ ຮົງ​ກາ​ຣີ ໃຫ້​ແກ່ ສປປ ລາວ ໃນ​ພາ­ລະ­ກິດ​ຕໍ່­ສູ້​ກູ້​ຊາດ​ໃນ​ເມື່ອ​ກ່ອນ ກໍ​ຄື ການ​ປົກ​ປັກ​ຮັກ­ສາ ແລະ ສ້າງ­ສາ​ປະ­ເທດ​ຊາດ ໃນ​ປັດ­ຈຸ­ບັນ ສອງ​ຝ່າຍ​ໄດ້​ປຶກ­ສາ​ຫາ­ລື​ກັນ​ກ່ຽວ​ກັບ​ການ​ເພີ່ມ​ທະ­ວີ​ການ​ຮ່ວມ​ມື​ໃນ­ຕໍ່­ໜ້າ ໂດຍ​ໄດ້​ຕົກ­ລົງ​ກັນ​ຍົກ​ລະ­ດັບ​ການ​ພົວ­ພັນ​ສອງ​ຝ່າຍ​ຂຶ້ນ​ເປັນ​ຄູ່​ຮ່ວມ​ຍຸດ​ທະ​ສາດ ຊຶ່ງ​ເປັນ​ການ​ຢັ້ງ­ຢືນ​ຄືນ ແລະ ສະ­ແດງ​ໃຫ້​ເຫັນ​ເຖິງ​ຄວາມ​ໄວ້​ເນື້ອ​ເຊື່ອ​ໃຈ​ເຊິ່ງ​ກັນ ແລະ ກັນ ລະ­ຫວ່າງ ລັດ­ຖະ­ບານ ແລະ ປະ­ຊາ­ຊົນ​ສອງ​ຊາດ ລາວ-ຮົງ​ກາ​ຣີ ເພື່ອ​ຜັນ​ຂະ­ຫຍາຍ​ການ​ຕົກ­ລົງ​ດັ່ງ­ກ່າວ ສອງ​ຝ່າຍ​ເຫັນ​ດີ​ເປັນ​ເອ­ກະ​ພາບ​ກັນ ໃຫ້​ມີ​ການ​ແລກ­ປ່ຽນ​ການ​ຢ້ຽມ­ຢາມ​ເຊິ່ງ​ກັນ ແລະ ກັນ ໃນ​ທຸກ​ລະ­ດັບ ແລະ ທຸກ​ຂະ­ແໜງ ນັບ​ແຕ່​ການ​ນຳ​ຂັ້ນ​ສູງ​ຈົນ​ຮອດ​ລະ­ດັບ​ວິ­ຊາ​ການ​ຂອງ​ສອງ​ປະ­ເທດ ລວມ​ທັງ​ລະ­ດັບ​ທ້ອງ­ຖິ່ນ ແລະ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ຮ່ວມ​ມື​ຕ່າງໆ ໃຫ້​ປາ­ກົດ​ຜົນ​ເປັນ​ຈິງ ພ້ອມ​ກັນ​ນັ້ນ ສອງ​ຝ່າຍ​ໄດ້​ຕົກ­ລົງ​ສືບ­ຕໍ່​ການ​ຮ່ວມ​ມື​ສອງ​ຝ່າຍ​ໃນ​ຂົງ­ເຂດ​ເສດ­ຖະ­ກິດ ການ​ຄ້າ ການ​ລົງ­ທຶນ ການ​ສຶກ​ສາ ກະ­ສິ­ກຳ ການ​ເງິນ ແລະ ຂະ­ແໜງ­ການ​ອື່ນໆ​ທີ່​ສອງ​ຝ່າຍ​ມີ​ທ່າ­ແຮງ ແລະ ມີ​ຄວາມ​ສົນ­ໃຈ​ຮ່ວມ​ກັນ.

    ໃນ​ໂອ­ກາດ​ຢ້ຽມ­ຢາມ​ຄັ້ງ​ນີ້ ສອງ​ຝ່າຍ​ໄດ້​ລົງ​ນາມ​ເອ­ກະ­ສານ​ຮ່ວມ​ກັນ​ສອງ​ສະ­ບັບ ຄື: ສັນ­ຍາ​ວ່າ​ດ້ວຍ​ການ​ຍົກ­ເວັ້ນ​ວີ​ຊາ​ການ​ທູດ ແລະ ລັດ​ຖະ​ການ ແລະ ແຜນ­ການ​ຮ່ວມ​ມື​ດ້ານ​ການ​ສຶກ​ສາ ສຳ­ລັບ​ໄລ­ຍະ​ປີ 2020-2022 ຊຶ່ງ​ຈະ​ສ້າງ​ເງື່ອນ­ໄຂ​ໃຫ້​ສອງ​ປະ­ເທດ​ໄດ້​ເພີ່ມ​ທະ­ວີ ແລະ ເສີມ​ຂະ­ຫຍາຍ​ການ​ພົວ­ພັນ​ຮ່ວມ​ມື​ໃຫ້​ແໜ້ນ​ແຟ້ນ​ກວ່າ​ເກົ່າ.

ຂ່າວທີ່ກ່ຽວຂ້ອງ