ລາວ-ຫວຽດນາມ ເສີມຂະຫຍາຍການຮ່ວມມືດ້ານຖະແຫຼງຂ່າວ

301 14 ມ.ນ. 2019 ຂ່າວໜ້າ​ໜຶ່ງ
ລາວ-ຫວຽດນາມ ເສີມຂະຫຍາຍການຮ່ວມມືດ້ານຖະແຫຼງຂ່າວ

    ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ​ລາວ (ຖວ​ທ) ນຳ​ໂດຍ​ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ ຖວ​ທ ໄດ້​ພົບ​ປະ­ການ​ນຳ​ກະ­ຊວງ​ຖະ­ແຫຼງ​ຂ່າວ ແລະ ການ​ສື່­ສານ ແຫ່ງ ສສ ຫວຽດ­ນາມ ນຳ​ໂດຍ​ທ່ານ ຫງວຽນ ແມງ ຮຸ່ງ ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ແລະ ການ​ສື່­ສານ ສສ ຫວຽດ­ນາມ ໃນ​ວັນ​ທີ 11 ມີ­ນາ 2019 ຢູ່​ໂຮງ­ແຮມ​ລາວ​ພລາ​ຊາ ນະ­ຄອນ­ຫຼວງ​ວຽງ​ຈັນ.

    ໃນ​ການ​ພົບ​ປະ​ຄັ້ງ​ນີ້ ສອງ​ຝ່າຍ​ໄດ້​ຜັດ­ປ່ຽນ​ກັນ​ແຈ້ງ​ໃຫ້​ຊາບ​ເຖິງ​ຜົນ­ສຳ­ເລັດ ດ້ານ​ວຽກ​ງານ​ຖະ­ແຫຼງ​ຂ່າວ​ແຕ່​ລະ​ປະ­ເທດ ໃນ​ໄລ­ຍະ​ຜ່ານ​ມາ ແລະ ຜ່ານ​ການ​ລາຍ​ງານ​ໃຫ້​ຊາບ ເຫັນ​ວ່າ​ສອງ​ຝ່າຍ​ມີ​ຄວາມ​ເພິ່ງ​ພໍ­ໃຈ​ຕໍ່​ຜົນ​ການ​ຮ່ວມ​ມື​ແລກ­ປ່ຽນ​ຂໍ້​ມູນ​ຂ່າວ­ສານ ແລະ ການ​ຊ່ວຍ­ເຫຼືອ​ເຊິ່ງ​ກັນ ແລະ ກັນ​ຂອງ​ທັງ​ສອງ​ປະ­ເທດ​ໃນ​ໄລ­ຍະ​ຜ່ານ​ມາ ແລະ ກຳ­ນົດ​ແຜນ­ການ​ຮ່ວມ​ມື​ໃນ­ຕໍ່­ໜ້າ.

    ໂອ­ກາດ​ນີ້ ທ່ານ ບໍ່​ແສງ​ຄຳ ວົງ​ດາ­ລາ ໄດ້​ມີ​ຄຳ​ເຫັນ​ວ່າ: ໃນ​ຊຸມ​ປີ­ຜ່ານ­ມາ​ສອງ​ກະ­ຊວງ ໄດ້​ຮ່ວມ​ກັນ​ຈັດ​ຕັ້ງ​ງານ​ວາງ­ສະ­ແດງ​ຮູບ​ພາບ​ປື້ມ ໜັງ­ສື­ພິມ ແລະ ວາ­ລະ­ສານ​ຫວຽດ­ນາມ ຢູ່​ນະ­ຄອນ­ຫຼວງ​ວຽງ​ຈັນ ນອກ​ນີ້ ຍັງ​ໄດ້​ແລກ­ປ່ຽນ​ຢ້ຽມ­ຢາມ​ເຊິ່ງ​ກັນ ແລະ ກັນ ໃນ​ລະ­ດັບ​ຄະ­ນະ​ຜູ້​ແທນ​ຂັ້ນ​ສູງ​ຂອງ​ກະ­ຊວງ ຂັ້ນ​ກົມ ແລະ ຂັ້ນ​ວິ­ຊາ​ການ ແຕ່​ລະ​ປີ​ກະ­ຊວງ​ຖະ­ແຫຼງ​ຂ່າວ ແລະ ການ​ສື່­ສານ ຫວຽດ­ນາມ ຍັງ​ໄດ້​ຈັດ​ເຝິກ­ອົບ­ຮົມ​ວຽກ​ງານ​ສື່​ມວນ​ຊົນ​ໃຫ້​ແກ່​ບັນ­ນາ­ທິ­ການ ນັກ​ຂ່າວ​ລາວ​ທີ່​ມາ​ຈາກ​ສູນ​ກາງ ແລະ ທ້ອງ­ຖິ່ນ ໂດຍ​ຈັດ​ຢູ່​ລາວ ແລະ ຫວຽດ­ນາມ ສາ­ມາດ​ຕີ​ລາ­ຄາ​ວ່າ​ເປັນ​ການ​ເຝິກ­ອົບ­ຮົມ​ທີ່​ມີ​ປະ​ສິດ­ທິ​ຜົນ ແລະ ຄວນ​ສືບ­ຕໍ່​ປະ­ຕິ­ບັດ​ໃນ­ຕໍ່­ໜ້າ ພ້ອມ​ນີ້ ສອງ​ຝ່າຍ​ໄດ້​ຮ່ວມ​ກັນ​ໂຄ­ສະ­ນາ​ກະ­ຈາຍ​ຂ່າວ​ຜ່ານ​ໜັງ­ສື­ພິມ ວິ­ທະ­ຍຸ ແລະ ໂທລະ­ພາບ ໃນ​ໂອ­ກາດ​ວັນ​ສຳ­ຄັນ​ຕ່າງໆ​ຂອງ​ສອງ​ປະ­ເທດ ແລະ ແລກ­ປ່ຽນ​ລາຍ­ການ​ວິ­ທະ­ຍຸ-ໂທລະ­ພາບ​ເຊິ່ງ​ກັນ ແລະ ກັນ​ຕື່ມ​ອີກ ໂດຍ​ລວມ​ແລ້ວ​ການ​ຮ່ວມ​ມື​ແມ່ນ​ມີ​ຜົນ­ສຳ­ເລັດ ເຮັດ​ໃຫ້​ວຽກ​ງານ​ວິ­ຊາ​ສະ­ເພາະ​ໄດ້​ຮັບ​ການ​ຍົກ​ລະ­ດັບ​ດີ​ຂຶ້ນ​ເທື່ອ​ລະ​ກ້າວ.

    ພາຍ­ຫຼັງ​ສິ້ນ​ສຸດ​ການ​ພົບ​ປະ ສອງ​ຝ່າຍ​ໄດ້​ເຊັນ​ບົດ​ບັນ­ທຶກ​ຮ່ວມ​ກັນ ເພື່ອ​ຮ່ວມ​ມື​ສຳ­ລັບ​ປີ 2019 ປະ­ກອບ​ມີ 5 ເນື້ອ​ໃນ​ເອ­ກະ­ສານ ຄື: ດ້ານ​ສື່​ສິ່ງ​ພິມ ດ້ານ​ວິ­ທະ­ຍຸ-ໂທລະ­ພາບ ດ້ານ​ການ​ພິມ​ຈຳ­ໜ່າຍ ດ້ານ​ເຝິກ­ອົບ­ຮົມ ແລະ ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ແລະ ການ​ແລກ­ປ່ຽນ​ຂໍ້​ມູນ​ຂ່າວ­ສານ ແລະ ການ​ສື່­ສານ.

ຂ່າວທີ່ກ່ຽວຂ້ອງ