ທ່າຊ້າງ ສະໜອງພືດຜັກອິນຊີສູ່ຕະຫຼາດໄດ້ 6-7 ໂຕນຕໍ່ອາ¬ທິດ

278 14 ມ.ນ. 2019 ຂ່າວໜ້າ​ໜຶ່ງ
ທ່າຊ້າງ ສະໜອງພືດຜັກອິນຊີສູ່ຕະຫຼາດໄດ້ 6-7 ໂຕນຕໍ່ອາ¬ທິດ

    ທ່ານ ທັດ­ສະ­ນີ ພິ­ລາ​ວົງ ນາຍ­ບ້ານ​ທ່າ​ຊ້າງ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ເປັນ​ຕົວ​ແທນ​ໃຫ້​ແກ່​ກຸ່ມ​ປູກ​ພືດ​ຜັກ​ອິນ​ຊີ ໄດ້​ກ່າວ​ຢູ່​ໃນ​ກອງ​ປະ­ຊຸມ​ສະ­ຫຼຸບ​ຕີ​ລາ­ຄາ​ວຽກ​ງານ​ກະ­ສິ­ກຳ ປ່າ­ໄມ້ ແລະ ພັດ­ທະ­ນາ​ຊົນ­ນະ­ບົດ​ປີ 2018 ແລະ ທິດ​ທາງ​ແຜນ­ການ​ປີ 2019 ອາ­ທິດ​ຜ່ານ​ມາ​ວ່າ: ບ້ານ​ທ່າ​ຊ້າງ​ມີ​ຊົນ­ລະ­ປະ­ທານ​ສາ­ມາດ​ເຮັດ​ນາ​ໄດ້ 2 ລະ­ດູ ແຕ່​ຍັງ​ຜະ­ລິດ​ເຂົ້າ​ບໍ່​ກຸ້ມ​ກິນ ສາ­ເຫດ​ຍ້ອນ​ເນື້ອ­ທີ່​ທຳ​ການ​ຜະ­ລິດ​ມີ​ໜ້ອຍ​ບໍ່​ພຽງ­ພໍ​ກັບ​ຄວາມ​ຕ້ອງ­ການ ບ້ານ​ຕັ້ງ​ຢູ່​ລຽບ​ແຄມ​ແມ່­ນ້ຳ​ງື່ມ ເວ­ລາ​ປ່ອຍ​ນ້ຳ​ຊົນ­ລະ­ປະ­ທານ​ມາ​ນ້ຳ​ຊ້ຳ​ຜັດ​ໄຫຼ​ຊຶມ​ຜ່ານ​ລົງ​ສູ່​ແມ່­ນ້ຳ​ງື່ມ ດິນ​ບໍ່​ອູ້ມ​ນ້ຳ ບໍ່​ສາ­ມາດ​ເກັບ​ກັກ​ນ້ຳ​ໄວ້​ໃນ​ນາ​ເຂົ້າ​ໄດ້​ດົນ ນຳ​ໃຊ້​ນ້ຳ​ຫຼາຍ ໃຊ້​ຈ່າຍ​ຄ່າ​ກະ­ແສ​ໄຟ­ຟ້າ​ສູງ ສະ­ນັ້ນ ບ້ານ​ຈຶ່ງ​ໄດ້​ປຸກ­ລະ­ດົມ​ເອົາ​ປະ­ຊາ­ຊົນ​ຈຳ­ນວນ​ໜຶ່ງ ທີ່​ມັກ​ຮັກ​ກ່ຽວ​ກັບ​ການ​ປູກ​ພືດ-ຜັກ​ໄປ​ຮ່ຳ­ຮຽນ​ເອົາ​ບົດ­ຮຽນ ການ​ປູກ​ຜັກ​ມາ​ຈາກ​ປະ­ເທດ​ໃກ້​ຄຽງ ມາ​ເຮັດ​ທົດ​ລອງ​ປູກ​ພືດ​ດັ່ງ­ກ່າວ ແຕ່​ກໍ​ຍັງ​ບໍ່​ທັນ​ໄດ້​ຮັບ​ຜົນ​ດີ​ເທົ່າ​ທີ່​ຄວນ ແລະ ຊີ­ວິດ​ການ​ເປັນ​ຢູ່​ຍັງ​ຂາດໆ​ເຂີນໆ ດຶງ​ໜ້າ​ຍັງ​ບໍ່​ເຖິງ​ຫຼັງ ໄລ­ຍະ​ຕໍ່​ມາ​ປີ 2009-2010 ພັກ-ລັດ ກໍ​ຄື ຂັ້ນ​ເທິງ​ໄດ້​ລົງ​ມາ​ຊີ້​ນຳ-ນຳ­ພາ​ໂດຍ​ກົງ ເປັນ­ຕົ້ນ ກົມ​ປູກ­ຝັງ ກະ­ຊວງ​ກະ­ສິ­ກຳ ແລະ ປ່າ­ໄມ້ ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ປາກ​ງື່ມ ໄດ້​ມາ​ປຸກ­ລະ­ດົມ​ໃຫ້​ມີ​ການ​ສ້າງ­ຕັ້ງ​ເປັນ​ກຸ່ມ​ຜະ­ລິດ​ຜັກ​ອິນ​ຊີ​ເປັນ​ສິນ­ຄ້າ ເບື້ອງ​ຕົ້ນ ມີ​ປະ­ຊາ­ຊົນ 15 ຄອບ­ຄົວ ຕັດ­ສິນ​ໃຈ​ທົດ​ລອງ​ເນື້ອ­ທີ່ 8 ໄລ່ ແລະ ມີ​ເຮືອນ​ຮົ່ມ 25 ຫຼັງ ຈາກ​ນັ້ນ ຊາວ​ສວນ​ພວກ​ຂ້າ­ພະ­ເຈົ້າ​ໄດ້​ຮັບ​ການ​ຊຸກ­ຍູ້​ຈາກ​ພັກ-ລັດ ພ້ອມ​ທັງ​ໄດ້​ຮັບ​ການ​ຖ່າຍ​ທອດ​ຄວາມ​ຮູ້​ເຕັກ­ນິກ​ການ​ຜະ­ລິດ​ກະ­ສິ­ກຳ​ອິນ​ຊີ ຕະ­ຫຼອດ​ຮອດ​ນຳ­ພາ​ຈັດ​ຕັ້ງ​ການ​ຜະ­ລິດ​ເປັນ​ກຸ່ມ​ທີ່​ມີ​ເປົ້າ​ໝາຍ​ເພື່ອ​ເປັນ​ສິນ­ຄ້າ ຈຶ່ງ​ພ້ອມ­ພຽງ​ກັນ​ເຫັນ​ວ່າ​ມີ​ທ່າ­ແຮງ ແລະ ໂອ­ກາດ​ສູງ ຈຶ່ງ​ຕັດ­ສິນ​ໃຈ​ກູ້​ຢືມ​ເງິນ​ຈາກ​ທະ­ນາ­ຄານ​ສົ່ງ­ເສີມ​ກະ­ສິ­ກຳ ເພື່ອ​ເປັນ​ທຶນ​ໝູ­ນວຽນ​ໃນ​ເບື້ອງ​ຕົ້ນ​ຄອບ­ຄົວ​ລະ 10 ລ້ານ​ກີບ ຕໍ່​ມາ​ຮອດ​ປີ 2012 ສາ­ມາດ​ເຂົ້າ​ເຖິງ​ຕະ­ຫຼາດ ແລະ ໄດ້​ຮັບ​ການ​ສະ­ໜັບ­ສະ­ໜູນ​ສ້າງ​ຕະ­ຫຼາດ​ອິນ​ຊີ​ທີ່​ເດີ່ນ​ທາດ­ຫຼວງ ເຮັດ​ໃຫ້​ມີ​ຕະ­ຫຼາດ​ທີ່​ແນ່­ນອນ ແລະ ມີ​ຜູ້​ບໍ­ລິ­ໂພກ ຫຼື ລູກ​ຄ້າ​ປະ­ຈຳ​ຫຼາຍ​ຂຶ້ນ ຈຶ່ງ​ໄດ້​ຂະ­ຫຍາຍ​ເນື້ອ­ທີ່​ທຳ​ການ​ຜະ­ລິດ​ເປັນ 1 ເຮັກ­ຕາ ມີ​ເຮືອນ​ຮົ່ມ 45 ຫຼັງ ຕົກ​ມາ​ຮອດ​ປີ 2013 ມີ​ສະ­ມາ­ຊິກ​ເພີ່ມ​ຂຶ້ນ​ເປັນ 20 ຄອບ­ຄົວ ມີ​ເນື້ອ­ທີ່ 2 ເຮັກ­ຕາ ມີ​ເຮືອນ​ຮົ່ມ 60 ຫຼັງ ປີ 2014 ສາ­ມາດ​ຜະ­ລິດ​ພືດ-ຜັກ​ໄດ້​ທັງ​ໝົດ 54 ໂຕນ ສ້າງ​ລາຍ​ຮັບ​ໄດ້ 106 ລ້ານ​ກີບ ມີ​ຜັກ​ເຂົ້າ​ຕະ­ຫຼາດ​ເພີ່ມ​ເປັນ 2 ຈຸດ ຄື: ຕະ­ຫຼາດ​ທາດ­ຫຼວງ ແລະ ເດີ່ນ​ເຈົ້າ­ຟ້າ​ງຸ່ມ ຊະ­ນິດ​ຜັກ​ທີ່​ນຳ​ເອົາ​ມາ​ປູກ​ກໍ​ມີ​ຫຼາຍ ແລະ ເພີ່ມ​ຊະ­ນິດ​ຂຶ້ນ​ເລື້ອຍໆ.

    ສຳ­ລັບ​ທິດ​ທາງ​ໃນ­ຕໍ່­ໜ້າ​ຈະ​ນຳ​ໃຊ້​ເຕັກ­ນິກ​ວິ­ຊາ​ການ​ຍົກ​ສູງ​ປະ­ສິດ­ທິ­ພາບ ແລະ ສະ­ມັດ­ຖະ­ພາບ​ໃຫ້​ຫຼາຍ​ຂຶ້ນ ຂະ­ຫຍາຍ​ເນື້ອ­ທີ່​ທີ່​ມີ​ແລ້ວ​ເພີ່ມ​ຂຶ້ນ 60 ເຮັກ­ຕາ ແລະ ໃນ 5 ປີ​ຕໍ່­ໜ້າ​ຂະ­ຫຍາຍ​ເຮືອນ​ຮົ່ມ ເພີ່ມ​ຂຶ້ນ​ອີກ 70 ຫຼັງ ຂະ­ຫຍາຍ​ສະ­ມາ­ຊິກ​ພາຍ​ໃນ​ບ້ານ​ຫັນ​ມາ​ເຮັດ​ກະ­ສິ­ກຳ​ອິນ​ຊີ​ໃຫ້​ໄດ້ 90% ເພື່ອ​ໃຫ້​ໄດ້​ມາດ­ຖານ​ການ​ເປັນ​ບ້ານ​ກະ­ສິ­ກຳ​ອິນ​ຊີ ແລະ ພັດ­ທະ­ນາ​ການ​ຫຸ້ມ​ຫໍ່​ຜົນ​ຜະ­ລິດ​ກະ­ສິ­ກຳ​ອິນ​ຊີ​ທີ່​ເປັນ​ສິນ­ຄ້າ​ໂອ​ດ໋ອບ ໃຫ້​ມີ​ຄຸນ​ນະ​ພາບ​ໄດ້​ມາດ­ຕະ­ຖານ​ຮັບ­ປະ­ກັນ​ຄວາມ​ສະ­ອາດ​ປອດ​ໄພ​ຕໍ່​ຜູ້​ບໍ­ລິ­ໂພກ.

ຂ່າວທີ່ກ່ຽວຂ້ອງ