ໂຣ​ນາວ​ໂດ ຍິງ 3 ປະຕູ ຊ່ວຍ​ຢູ​ເວັນ​ຕຸ​​ສ​ເຂົ້າ​ຮອບ ແຊັມ​ປຽນ​ລີກ

218 14 ມ.ນ. 2019 ວົງຈອນກີລາ
ໂຣ​ນາວ​ໂດ ຍິງ 3 ປະຕູ ຊ່ວຍ​ຢູ​ເວັນ​ຕຸ​​ສ​ເຂົ້າ​ຮອບ ແຊັມ​ປຽນ​ລີກ

    ການ​ແຂ່ງຂັນ​ເຕະບານ ຢູ​ຟ່າ ແຊັມ​ປຽນ​ລີກ ລະດູ​ການ 2018-19 ຮອບ 16 ທີມ​ສຸດ​ທ້າຍ ນັດ​ທີ 2 ໃນ​ວັນ​ທີ 12 ມີນາ 2019 ຢູ​ເວັນ​ຕຸ​​ສ ທີມ​ຈາກ​ອີ​ຕາ​ລີ ທີ່​ກຳລັງ​ໄລ່​ລ່າ​ແຊັມ​ສະໄໝ​ທີ 3 ໂດຍ​ຫ່າງ​ຫາຍ​ຈາກ​ການ​ສຳຜັດ​ແຊັມ​ລາຍການ​ນີ້ ມາ​ແຕ່​ປີ 1996 ເປີດ​ບ້ານ​ພົບ​ກັບ ແອັດ​ເລ​ຕິ​ໂກ້ ມາດ​ຣິດ ທີມ​ຈາກ​ແອ​​ັສ​ປາຍ ນັດ​ທີ 1 ຢູ​ເວັນ​ຕຸ​​ສ ບຸກ​ເສຍ​ມາ​ກ່ອນ 0-2 ນັດ​ນີ້ ທວງ​ຄືນ​ຢ່າງ​ໄດ້​ໃຈ​ກອງ​ເຊຍ​ບານ ໂດຍ​ສະເພາະ ຄຣິ​​ສ​ເຕຍ​ໂນ້ ໂຣ​ນາວ​ໂດ ສະແດງ​ຜົນງານ​ປະ​ທັບ​ໃຈ ຍິງ​ເໝົາ 3 ປະຕູ​ຜູ້​ດຽວ ນາທີ 27 ນາທີ 49 ແລະ ປິດ​ທ້າຍ​ດ້ວຍ​ການ​ຍິງ​ຈຸດ​ໂທດ ນາທີ 86 ນຳ​ທີມ​ຊະນະ ແອັດ​ເລ​ຕິ​ໂກ້ ມາດ​ຣິດ 3-0 ລວມ​ຜົນ​ສອງ​ນັດ ຢູ​ເວັນ​ຕຸ​​ສ ຊະນະ 3-2 ເດີນ​ໜ້າ​ສູ່​ຮອບ 8 ທີມ​ສຸດ​ທ້າຍ​ຕໍ່​ໄປ.

    ນັດ​ນີ້ ເຈົ້າ​ບ້ານ ຢູ​ເວັນ​ຕຸ​​ສ ສ້າງສັນ​ເກມ​ບຸກ​ມີ​ໂອກາດ​ຍິງ​ຄູ່​ແຂ່ງ 16 ຄັ້ງ ຊື່​ກອບ​ປະຕູ 4 ຄັ້ງ ຂະນະ​ທີ່ ທີມ​ຢາມ ມີ​ໂອກາດ​ຍິງ​ພຽງ 5 ຄັ້ງ ບໍ່​ຊື່​ກອບ​ປະຕູ​ເລີຍ ເຊິ່ງ​ເປັນ​ຄັ້ງ​ທຳ​ອິດ​ໃນ​ຮອບ 11 ປີ​ຂອງ​ແອັດ​ເລ​ຕິ​ໂກ້ ສ່ວນ​ໂຣ​ນາວ​ໂດ ຍິງ​ແຮັດ​ທຣິກ (Hattrick) ທີ 8 ໃນ​ແຊັມ​ປຽນ​ລີກ ແລະ ເປັນ​ປະຕູ​ທີ 124 ນຳ​ເປັນ​ດາວ​ຍິງ​ສູງ​ສຸດ​ຕໍ່​ໄປ ໂດຍ​ນຳ ເມ​​ັສ​ຊີ້ 18 ໜ່ວຍ.

   ຢູ​ເວັນ​ຕຸ​​ສ ເສຍ​ກ່ອນ​ໃນ​ນັດ​ທີ 1 ແລະ ກັບ​ມາ​ຊະນະ​ຄູ່​ແຂ່ງ​ໃນ​ຮອບ​ນັອກ​ເອົ້າ​ແຊັມ​ປຽນ​ລີກ ຄັ້ງ​ທຳ​ອິດ​ໃນ​ຮອບ 13 ຕໍ່​ຈາກ​ພົບ​ກັບ ແວ​ເດີ​ເບ​ເມັນ ລະດູ​ການ 2005-06 ສ່ວນ​ແອັດ​ເລ​ຕິ​ໂກ້ ມາດ​ຣິດ ກາຍເປັນ​ທີມ​ທີ 4 ໃນ​ແຊ້ມ​ປຽນ​ລີກ ຊະນະ​ກ່ອນ​ໃນ​ນັດ​ທີ​ໜຶ່ງ 2-0 ແຕ່​ຕົກ​ຮອບ​ນັອກ​ເອົ້າ.

    ສຳລັບ​ຜົນ​ອີກ​ຄູ່​ໃນ​ຄືນ​ວັນ​ດຽວ​ກັນ ແມນ​ເຊັດ​ເຕີ ຊິ​ຕີ ຈາກ​ອັງກິດ ເປີດ​ບ້ານ​ໄລ່​ເອົາ​ຊະນະ ຊາວ ເກ້ 04 ໄປ​ແບບ​ຂາດ​ຮອຍ 7-0 ລວມ​ຜົນ​ສອງ​ນັດ ແມນ​ເຊັດ​ເຕີ ຊິ​ຕີ ຊະນະ 10-2 ເຂົ້າ​ຮອບ 8 ທີມ​ສຸດ​ທ້າຍ​ຕໍ່​ໄປ. 

ຂ່າວທີ່ກ່ຽວຂ້ອງ