ເບິ່ງບ້ານເຂົາເອົາບົດຮຽນ 13/03/2019

270 13 ມ.ນ. 2019 ຫົວຂໍ້ຂ່າວອື່ນໆ

    ມື້­ນີ້ ມີ​ຂ່າວ​ບົດ­ຮຽນ​ກ່ຽວ​ກັບ​ການ​ກຳ­ນົດ​ອາ­ຍຸ​ແຕ່ງ­ດອງ ວິ­ທີ​ການ​ຊ່ວຍ­ເຫຼືອ​ເຫຍື່ອ​ການ​ຄ້າ​ມະ­ນຸດ ແລະ ນະ­ໂຍ­ບາຍ​ດີໆ ເພື່ອ​ຊ່ວຍ­ເຫຼືອ​ຄົນ​ທຸກ​ຂ່າວ​ນີ້​ເກີດ​ຂຶ້ນ​ຢູ່ ແອັດ​ສະ​ປາຍ ແລະ ອິນ​ເດຍ ຕາມ​ລຳ­ດັບ.

    ທີ່ ແອັດ​ສະ​ປາຍ (ສະ​ເປນ): ກ່ອນ​ໜ້າ​ນີ້ 4 ປີ​ປາຍ ລັດ­ຖະ­ບານ​ປະ­ເທດ​ແອັດ​ສະ​ປາຍ ໄດ້​ມີ​ມະ­ຕິ​ກ່ຽວ​ກັບ​ການ​ປັບ­ປຸງ​ກົດ­ໝາຍ​ວ່າ​ດ້ວຍ​ອາ­ຍຸ​ຕ່ຳ​ສຸດ​ສຳ­ລັບ​ການ​ແຕ່ງ­ດອງ ຄື: ໄດ້​ປັບ​ຂຶ້ນ​ຈາກ​ອາ­ຍຸ 14 ປີ ໃນ​ເມື່ອ​ກ່ອນ​ເປັນ 16 ປີ ແຕ່​ຕ້ອງ​ໄດ້​ຮັບ​ການ​ເຫັນ​ດີ​ຈາກ​ສານ​ກ່ອນ ໂດຍ​ທົ່ວ​ໄປ​ແລ້ວ ສັງ­ຄົມ ແອັດ​ສະ​ປາຍ ຖື​ວ່າ​ອາ­ຍຸ​ຂັ້ນ​ຕ່ຳ​ທີ່​ເໝາະ​ສົມ​ກັບ​ການ​ສ້າງ​ຄອບ­ຄົວ​ນັ້ນ​ແມ່ນ 18 ປີ ນອກ­ຈາກ​ການ​ປັບ​ຂຶ້ນ​ອາ­ຍຸ​ສຳ­ລັບ​ການ​ແຕ່ງ­ດອງ​ແລ້ວ ຍັງ​ໄດ້​ມີ​ການ​ກຳ­ນົດ​ອາ­ຍຸ​ຂັ້ນ​ຕ່ຳ​ສຳ­ລັບ​ການ​ຮ່ວມ​ປະ­ເວ­ນີ ຫຼື ການ​ມີ​ເພດ​ສຳ­ພັນ​ຈາກ 13 ປີ ໃນ​ເມື່ອ​ກ່ອນ​ມາ​ເປັນ 14 ປີ ເພາະ​ເຫັນ​ວ່າ ການ​ອະ­ນຸ­ຍາດ​ໃຫ້​ຮ່ວມ​ເພດ​ກັນ​ໄດ້​ແຕ່​ອາ­ຍຸ 13 ປີ​ນັ້ນ ຈະ​ເພີ່ມ​ອັດ­ຕາ​ສ່ຽງ​ໃນ​ການ​ລ່ວງ​ລະ­ເມີດ​ທາງ​ເພດ​ຕໍ່​ເດັກ ສ່ວນ​ສະ­ຫະ­ພັນ​ຊາວ​ໂຣ​ມາ (ເຜົ່າ​ໜຶ່ງ​ຂອງ​ແອັດ​ສະ​ປາຍ) ປະ­ຈຳ​ນະ­ຄອນ­ຫຼວງ​ມາດ​ຣິດ ໄດ້​ມີ​ການ​ກຳ­ນົດ​ເກນ​ອາ­ຍຸ​ແຕ່ງ­ດອງ​ຕ່າງ­ຫາກ ໂດຍ​ອ້າງ​ວ່າ ເພື່ອ​ໃຫ້​ເປັນ​ໄປ​ຕາມ​ການ​ປ່ຽນ­ແປງ​ຂອງ​ຍຸກ​ສະ­ໄໝ ຄື ໄດ້​ປັບ​ຂຶ້ນ​ອາ­ຍຸ​ແຕ່ງ­ດອງ​ສຳ­ລັບ​ແມ່­ຍິງ​ຈາກ 16 ປີ ເປັນ 20 ປີ ສ່ວນ​ເພດ​ຊາຍ​ນັ້ນ​ຈາກ 18 ປີ ເປັນ 22 ປີ (ແຫຼ່ງ​ຂ່າວ​ຈາກ​ໜັງ­ສື­ພິມ​ຜູ້​ແທນ​ປະ­ຊາ­ຊົນ).

    ທີ່ ປະ­ເທດ​ໄທ: ມີ​ບົດ­ຮຽນ​ດີໆ​ເລື່ອງ​ໜຶ່ງ​ຂອງ​ໄທ ໃນ​ການ​ຊ່ວຍ​ຄົນ​ໄທ​ທີ່​ຕົກ​ເປັນ​ເຫຍື່ອ​ຂອງ​ການ​ຄ້າ​ມະ­ນຸດ ຄື ໃນ​ທ້າຍ​ເດືອນ​ຕຸ­ລາ ປີ 2017 ລັດ­ຖະ­ບານ​ໄທ ໄດ້​ປະ­ກາດ​ກຳ­ນົດ​ເລກ­ໂທລະ­ສັບ​ຕິດ­ຕໍ່​ພົວ­ພັນ​ສຳ­ລັບ​ທຸກໆ​ຄົນ​ໃນ​ໂລກ ເພື່ອ​ແຈ້ງ​ຂ່າວ​ກັບ​ຊາວ​ໄທ​ທີ່​ຕົກ​ເປັນ​ເຫຍື່ອ​ຂອງ​ການ​ຄ້າ​ມະ­ນຸດ ເລກ­ໂທລະ­ສັບ​ທີ່​ທັງ​ໃຊ້​ໄດ້​ກັບ​ການ​ສົ່ງ​ຂໍ້­ຄວາມ (SMS) ນີ້​ແມ່ນ +66991301300 ເລກ­ໂທລະ­ສັບ​ເພື່ອ​ແຈ້ງ​ຊ່ວຍ​ສຸກ​ເສີນ​ນີ້ ແມ່ນ​ຜົນ­ງານ​ການ​ຮ່ວມ​ມື​ລະ­ຫວ່າງ​ກະ­ຊວງ​ພັດ­ທະ­ນາ​ສັງ­ຄົມ ແລະ ຄວາມ​ໝັ້ນ­ຄົງ​ຂອງ​ມະ­ນຸດ​ກັບ​ສຳ­ນັກ­ງານ​ກະ­ຈາຍ­ສຽງ ແລະ ຄົມ­ມະ­ນາ­ຄົມ​ແຫ່ງ​ຊາດ ເປົ້າ​ໝາຍ​ຂອງ​ການ​ສ້າງ­ຕັ້ງ​ລະ­ບົບ​ສາຍ​ດ່ວນ ເພື່ອ​ຊ່ວຍ​ເຫຍື່ອ​ການ​ຄ້າ​ມະ­ນຸດ​ທີ່​ເປັນ​ຄົນ​ໄທ​ນັ້ນ ຕົ້ນ­ຕໍ​ແມ່ນ​ເພື່ອ​ຊ່ວຍ​ແມ່­ຍິງ​ໄທ​ທີ່​ຖືກ​ຫຼອກ​ລວງ​ໄປ​ຄ້າ​ປະ­ເວ­ນີ​ຢູ່​ຕ່າງ​ແດນ ເລກ​ໂທ​ສາຍ​ດ່ວນ​ດັ່ງ­ກ່າວ​ສາ­ມາດ​ໂທ​ຕິດ­ຕໍ່​ໄດ້​ຈາກ​ທຸກ​ມູມ​ໂລກ ໂດຍ​ບໍ່​ມີ​ການ​ເສຍ​ຄ່າ​ແຕ່​ປະ­ການ​ໃດ​ເລີຍ.

    ທີ່ ອິນ​ເດຍ: ລັດ­ຖະ­ບານ​ຊຸດ​ປັດ­ຈຸ­ບັນ​ຂອງ​ອິນ​ເດຍ ມີ​ນະ­ໂຍ­ບາຍ​ດີໆຫຼາຍ​ຢ່າງ ເພື່ອ​ຊ່ວຍ​ຄົວ​ເຮືອນ​ທີ່​ທຸກ​ຍາກ​ພາຍ​ໃນ​ປະ­ເທດ (ວຽງ​ຈັນ​ທາມ 2 ກຸມ­ພາ 2018) ເຊັ່ນ: ໄດ້​ກຳ­ນົດ​ແຜນ​ປຸກ​ສ້າງ​ເຮືອນ​ລາ­ຄາ​ຖືກ ຈຳ­ນວນ 5 ລ້ານ​ຫົວ­ໜ່ວຍ ສຳ­ລັບ​ສົກ​ງົບ­ປະ­ມານ ແຕ່​ວັນ​ທີ 1 ເມ­ສາ 2018-21 ມີ­ນາ 2019 ນອກ­ຈາກ​ນັ້ນ ກໍ​ຍັງ​ມີ​ແຜນ​ຊ່ວຍ​ເພີ່ມ​ລາຍ​ໄດ້​ໃຫ້​ຊາວ­ນາ ໂດຍ​ການ​ຂາຍ​ເພີ່ມ​ລາ­ຄາ​ເຂົ້າ ແລະ ພືດ​ພັນ​ອື່ນໆ​ຂຶ້ນ​ຢ່າງ​ໜ້ອຍ 50% ທຽບ​ກັບ​ມູນ​ຄ່າ​ການ​ຜະ­ລິດ ສ່ວນ​ທາງ​ດ້ານ​ສາ­ທາ­ລະ­ນະ​ສຸກ​ນັ້ນ ທາງ​ການ​ອິນ​ເດຍ ກໍ​ໄດ້​ມີ​ແຜນ­ການ​ຊ່ວຍ­ເຫຼືອ​ຄອບ­ຄົວ​ທີ່​ທຸກ​ຍາກ ຈຳ­ນວນ 100 ລ້ານ​ຫົວ­ໜ່ວຍ​ໃຫ້​ໄດ້​ປິ່ນ­ປົວ ໂດຍ​ບໍ່​ໄດ້​ເສຍ​ຄ່າ​ໃນ​ຈຳ­ນວນ​ເງິນ 500.000 ຣູ​ປີ (7.500 ໂດ​ລາ​ສະ­ຫະ­ລັດ) ຕໍ່​ຄົນ ນອກ­ຈາກ​ນັ້ນ ແມ່­ຍິງ​ຈຳ­ນວນ 80 ລ້ານ​ຄົນ ຍັງ​ຈະ​ໄດ້​ໃຊ້​ແກ໋ສ​ຄົວ​ກິນ­ລ້າໆ​ໃນ​ມູນ​ຄ່າ 45 ໂດ​ລາ​ສະ­ຫະ­ລັດ​ຕໍ່​ຫົວ­ໜ່ວຍ.

ຂ່າວທີ່ກ່ຽວຂ້ອງ