ຂ່າວຫຼ້າສຸດ

ຫາລືແກ້ໄຂ ທຸລະກິດການບໍລິການບັນເທີງ ທີ່ເປັນຫາງສຽງຂອງສັງຄົມ

514 12 ມ.ນ. 2019 ຂ່າວໜ້າ​ໜຶ່ງ
ຫາລືແກ້ໄຂ ທຸລະກິດການບໍລິການບັນເທີງ ທີ່ເປັນຫາງສຽງຂອງສັງຄົມ

    ຂະ­ແໜງ​ວັດ­ທະ­ນະ­ທຳ ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ກອງ​ປະ­ຊຸມ​ເຜີຍ­ແຜ່​ລະ­ບຽບ​ກົດ­ໝາຍ​ຕ່າງໆ​ທາງ​ດ້ານ​ການ­ບັນ­ເທິງ​ຂຶ້ນ​ວັນ​ທີ 11 ມີ­ນາ 2019 ທີ່​ພະ​ແນກ​ດັ່ງ­ກ່າວ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ ຖວ​ທ ນວ ມີ​ບັນ­ດາ​ຫົວ­ໜ້າ ຮອງ​ຫົວ­ໜ້າ​ຂະ­ແໜງ­ການ ຫ້ອງ­ການ ຖວ​ທ 9 ຕົວ​ເມືອງ ແລະ ຜູ້​ປະ­ກອບ​ການ​ທຸ­ລະ​ກິດ​ບັນ­ເທີງ​ເຂົ້າ​ຮ່ວມ.

    ເພື່ອ​ເປັນ​ການ​ປຶກ­ສາ​ຫາ­ລື​ການ­ເຄື່ອນ­ໄຫວ​ຕ່າງໆ​ຂອງ​ທຸ­ລະ​ກິດ​ການ​ບໍ­ລິ­ການ​ບັນ­ເທີງ ແລະ ຮັບ​ຟັງ​ການ​ຊີ້​ແຈງ ອະ­ທິ­ບາຍ​ຄຳ​ເຫັນ​ໃນ​ການ​ດຳ­ເນີນ​ທຸ­ລະ​ກິດ​ດົນ­ຕີ ໂດຍ​ອີງ­ໃສ່​ລະ­ບຽບ​ກົດ­ໝາຍ ລະ­ບຽບ​ການ ແລະ ນິ­ຕິ​ກຳ​ຕ່າງໆ ໃຫ້­ການ​ດຳ­ເນີນ​ທຸ­ລະ​ກິດ​ຖືກ­ຕ້ອງ​ຕາມ​ເປົ້າ​ໝາຍ ພ້ອມ​ນັ້ນ ຍັງ​ເປັນ​ການ​ສະ­ເໜີ​ກ່ຽວ​ກັບ​ຂໍ້​ກຳ­ນົດ​ກົດ­ໝາຍ ທີ່​ໄດ້​ລະ­ບຸ​ຂອບ​ເຂດ​ການ­ເຄື່ອນ­ໄຫວ​ທຸ­ລະ​ກິດ ການ​ບໍ­ລິ­ການ​ບັນ­ເທີງ​ໃຫ້​ຖືກ­ຕ້ອງ​ຕາມ​ກົດ­ໝາຍ ແລະ ແກ້​ໄຂ ປຶກ­ສາ​ຫາ­ລື​ບັນ­ຫາ​ທີ່​ເປັນ​ຫາງ​ສຽງ​ຂອງ​ສັງ­ຄົມ​ຈາກ​ປະ­ຊາ­ຊົນ ຜ່ານ​ສາຍ​ດ່ວນ​ສະ­ພາ​ແຫ່ງ​ຊາດ ແລະ ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ​ເປັນ​ສ່ວນ​ໃຫຍ່ ໂດຍ​ສະ­ເພາະ​ແມ່ນ​ການ­ເຄື່ອນ­ໄຫວ​ທີ່​ບໍ່​ຖືກ­ຕ້ອງ​ລະ­ບຽບ​ການ ເຮັດ​ໃຫ້​ມີ​ຜົນ​ກະ­ທົບ​ຕໍ່​ສະ­ພາບ​ແວດ​ລ້ອມ ແລະ ອື່ນໆ.

    ທ່ານ ສາ­ລີ ນັນ­ທະ​ວົງ ຫົວ­ໜ້າ​ຂະ­ແໜງ​ວັດ­ທະ­ນະ­ທຳ ພະ​ແນກ ຖວ​ທ ນວ ໄດ້​ຜ່ານ​ບົດ​ສະ­ຫຼຸບ​ວຽກ​ງານ​ກວດ­ກາ ແລະ ແກ້​ໄຂ​ປາ­ກົດ­ການ​ຫຍໍ້­ທໍ້​ໃນ​ຂົງ­ເຂດ​ການ​ບໍ­ລິ­ການ​ບັນ­ເທີງ​ວ່າ: ປີ 2018 ນະ­ຄອນ­ຫຼວງ​ວຽງ​ຈັນ ມີ​ຫົວ­ໜ່ວຍ​ທຸ­ລະ​ກິດ​ດ້ານ​ການ​ບັນ­ເທີງ​ທີ່​ພະ​ແນກ ຖວ​ທ ອະ­ນຸ­ຍາດ ມີ​ຫົວ­ໜ່ວຍ​ວົງ​ດົນ­ຕີ 23 ຫົວ­ໜ່ວຍ ບັນ­ເທີງ​ເສບ​ປະ­ຈຳ​ຮ້ານ 9 ຫົວ­ໜ່ວຍ ຄ້າຍ​ເພງ 4 ຫົວ­ໜ່ວຍ ແລະ ຫ້ອງ​ອັດ 4 ຫົວ­ໜ່ວຍ ສະ­ເພາະ​ເມືອງ​ອະ­ນຸ­ຍາດ ມີ​ຫົວ­ໜ່ວຍ​ວົງ​ດົນ­ຕີ​ເອ​ເລັກ​ໂທນ 102 ຫົວ­ໜ່ວຍ ບັນ​ເທິງ​ເສບ​ປະ­ຈຳ​ຮ້ານ 18 ຫົວ­ໜ່ວຍ ເຊິ່ງ​ຜ່ານ​ການ​ກວດ­ກາ​ໄລ­ຍະ​ຜ່ານ​ມາ ເຫັນ​ວ່າ​ຜູ້​ປະ­ກອບ​ການ​ຈຳ­ນວນ​ໜຶ່ງ ຍັງ​ບໍ່​ທັນ​ເຊື່ອມ​ຊຶມ​ຕໍ່​ແນວ­ທາງ​ຂອງ​ພັກ ລະ­ບຽບ​ກົດ­ໝາຍ​ຂອງ​ລັດ ຍັງ​ຄຳ­ນຶງ​ແຕ່​ຜົນ​ປະ­ໂຫຍດ​ສ່ວນ​ຕົວ ຈົງ­ໃຈ​ລະ­ເມີດ​ບັນ­ດາ​ຂໍ້​ຫ້າມ​ຕ່າງໆ​ທີ່​ຂັ້ນ​ເທິງ​ໄດ້​ກຳ­ນົດ​ໃຫ້ ເຊັ່ນ: ຫົວ­ໜ່ວຍ​ວົງ​ດົນ­ຕີ ແລະ ເສບ​ປະ­ຈຳ​ຮ້ານ ມັກ​ຈະ​ເປີດ​ບໍ­ລິ­ການ​ກາຍ​ໂມງ​ເວ­ລາ​ທີ່​ກຳ­ນົດ​ໄວ້ ມີ​ສຽງ​ລົບ​ກວນ​ສັງ­ຄົມ​ອ້ອມ​ຂ້າງ​ໃກ້​ຄຽງ ບໍ່​ມີ​ມາດ​ຕະ­ການ​ແກ້​ໄຂ​ໃນ​ການ​ສະ­ກັດ​ກັ້ນ​ເດັກ​ຕ່ຳ​ກວ່າ 18 ປີ​ເຂົ້າ​ຊົມ­ໃຊ້​ບໍ­ລິ­ການ ແລະ ການ​ຮັກ­ສາ​ຄວາມ​ສະ­ຫງົບ ແລະ ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ ບໍ່​ມີ​ຄວາມ​ຮັບ­ປະ­ກັນ ເປັນ­ຕົ້ນ ການ​ຈອດ​ລົດ ແລະ ອາ​ລະ​ວາດ​ຕີ​ກັນ​ໃນ​ງານ​ບຸນ ນອກ​ນັ້ນ ເຂດ​ການ​ບໍ­ລິ­ການ​ທາງ​ດ້ານ​ວັດ­ທະ­ນະ­ທຳ ຍັງ​ນິ­ຍົມ​ນຳ​ໃຊ້​ເນື້ອ​ຮ້ອງ​ທຳ­ນອງ​ເພງ​ຂອງ​ຕ່າງ­ປະ­ເທດ​ເປັນ­ຕົ້ນ​ຕໍ ບໍ່​ສົ່ງ­ເສີມ​ເນື້ອ​ຮ້ອງ-ຂັບ​ລຳ​ລາວ.

    ຕໍ່​ກັບ​ບັນ­ຫາ​ທີ່​ກ່າວ​ມາ​ນັ້ນ ພະ​ແນກ ຖວ​ທ ໄດ້​ເອົາ­ໃຈ­ໃສ່​ໃນ​ການ​ສຶກ​ສາ​ອົບ­ຮົມ​ແນວ​ຄິດ ເພື່ອ​ໃຫ້​ຜູ້​ປະ­ກອບ​ການ​ເຂົ້າ­ໃຈ​ຕໍ່​ແນວ­ທາງ​ຂອງ​ພັກ ລະ­ບຽບ​ກົດ­ໝາຍ​ຂອງ​ລັດ​ທຸກໆ​ປີ ແລະ ຄະ­ນະ​ກຳ­ມະ­ການ​ກວດ­ກາ ໄດ້​ລົງ​ເຄື່ອນ​ໄຫວ​ຕິດ­ຕາມ​ເປັນ​ປະ­ຈຳ ຖ້າ​ພົບ​ເຫັນ​ຫົວ­ໜ່ວຍ​ທຸ­ລະ​ກິດ​ໃດ​ທີ່​ມີ​ການ​ລະ­ເມີດ ແມ່ນ​ໄດ້​ເຮັດ​ບົດ​ບັນ­ທຶກ​ສຶກ​ສາ​ອົບ­ຮົມ ກ່າວ​ເຕືອນ ແລະ ປັບ​ໃໝ​ຕາມ​ລະ­ບຽບ.

ຂ່າວທີ່ກ່ຽວຂ້ອງ