ແດ່ວັນທີ 8 ເດືອນ 3

581 11 ມ.ນ. 2019 ນານາສາລະ

    ຄວາມ​ຄ້າງ​ຄາ​ໃຈ​ຂອງ​ໃຜ​ບາງ​ຄົນ ກໍ​ຄື ເລື່ອງ​ຄວາມ​ສະ­ເໝີ­ພາບ​ລະ­ຫວ່າງ​ຍິງ-ຊາຍ ເຊິ່ງ​ເປັນ​ເລື່ອງ​ລະ­ອຽດ​ອ່ອນ​ທີ່​ເກີນ​ກຳ­ລັງ​ຂອງ​ໃຜ​ຜູ້​ໜຶ່ງ ຈະ​ຕັດ­ສິນ​ຊີ້​ຂາດ​ໄດ້ ແຕ່​ຜູ້​ຂຽນ​ຢາກ​ສະ­ເໜີ​ໃນ​ແງ່​ຮາກ​ເຫງົ້າ​ຂອງ​ວັດ­ທະ­ນະ­ທຳ​ລາວ ທີ່​ຍອມ­ຮັບ​ບົດ­ບາດ​ຜູ້­ຍິງ​ໄວ້​ໃນ​ຖາ­ນະ​ສູງ​ສົ່ງ ແລະ ມີ​ກຽດ ມັນ​ສະ­ແດງ​ອອກ​ຫຼາຍ​ດ້ານ ເຊັ່ນ: ຜ້າ​ທີ່​ຫໍ່​ຫຸ້ມ​ຢູ່​ໜັງ­ສື​ຄຳ​ພີ ໜັງ­ສື​ຜູກ​ໃບ​ລານ ທີ່​ພະ­ສົງ​ເທດ​ນັ້ນ​ກໍ​ແມ່ນ​ຕີນ​ສິ້ນ ຫຼື ຫົວ​ສິ້ນ​ຂອງ​ແມ່­ຍິງ ເຊືອກ​ຜູກ (ສາຍ​ສະ­ໝອງ) ຮ້ອຍ​ໃບ​ລານ ກໍ​ແມ່ນ​ສ່ວນ​ໜຶ່ງ​ມາ​ຈາກ​ຜົມ​ຂອງ​ແມ່­ຍິງ ທີ່​ເທີດ​ທູນ​ຄຳ​ສອນ​ຂອງ​ພຸດ​ທະ​ສາ­ສະ­ໜາ.

    ສ່ວນ​ຕົວ​ຄິດ​ວ່າ​ອາດ​ຍັງ​ມີ​ແມ່­ຍິງ​ຫຼາຍ​ຄົນ ທີ່​ບໍ່​ຢາກ​ພໍ­ໃຈ​ກັບ​ຄຳ​ເວົ້າ​ທີ່​ວ່າ ຜູ້­ຍິງ​ເປັນ​ຊ້າງ​ຂາ​ຫຼັງ ເຊິ່ງ​ມີ​ຫາງ​ສຽງ​ວ່າ​ຕ້ອງ​ເປັນ​ຊ້າງ​ຂາ​ໜ້າ ເພື່ອ​ໃຫ້​ເທົ່າ​ທຽມ​ກັນ ຖ້າ­ວ່າ​ເຮົາ​ຫາກ​ສັງ­ເກດ​ໂຕ​ຊ້າງ​ໃຫ້​ດີ ຈະ​ຮູ້​ວ່າ​ຂາ​ຫຼັງ​ຂອງ​ຊ້າງ​ກໍ​ມີ​ຄວາມ​ສຳ­ຄັນ​ເທົ່າ​ຂາ​ໜ້າ ຫຼື ຫຼາຍ​ກໍ­ລະ­ນີ ຂາ​ຫຼັງ​ສຳ­ຄັນ​ກວ່າ​ຂາ​ໜ້າ​ດ້ວຍ​ຊ້ຳ ເຊັ່ນ ເວ­ລາ​ລົງ​ຄ້ອຍ​ກໍ​ຕ້ອງ​ໄດ້​ເບກ​ໄວ້ ຫຼື ເວ­ລາ​ຂາ​ໜ້າ​ກ້າວ​ຜິດ­ພາດ ຂາ​ຫຼັງ​ກໍ​ເຮັດ​ໜ້າ­ທີ່​ເບກ​ໄວ້ ເຊິ່ງ​ເວົ້າ​ໃນ​ຖາ­ນະ​ຄອບ­ຄົວ​ຈະ​ກ້າວ­ໜ້າ​ກໍ​ຂຶ້ນ​ກັບ​ສອງ​ຄົນ ຜົວ-ເມຍ ວັດ­ທະ­ນະ­ທຳ​ຄອບ­ຄົວ​ຂອງ​ຄົນ​ລາວ ຈະ​ມອບ​ໃຫ້​ຜູ້­ຍິງ​ເປັນ​ໃຫຍ່ ເອີ້ນ​ວ່າ ແມ່­ເຮືອນ ເປັນ​ຜູ້​ຮັກ­ສາ​ຊັບ-ໃຊ້​ຈ່າຍ​ຊັບ ແລະ ຄວາມ​ເປັນ​ລະ­ບຽບ​ຮຽບ​ຮ້ອຍ​ພາຍ​ໃນ​ເຮືອນ.

    ພຸດ​ທະ​ສາ­ສະ­ໜາ​ໄດ້​ເນັ້ນ​ສອນ​ໃຫ້​ຜູ້­ຍິງ​ຮູ້​ວຽກ​ເຮືອນ ແລະ ເປັນ​ຜູ້​ໃຫ້​ຄວາມ​ສະ­ເໝີ­ພາບ​ທັງ​ສອງ​ຝ່າຍ ຍາດ​ພີ່­ນ້ອງ​ຂອງ​ຜົວ-ເມຍ ເຊິ່ງ​ນຳ​ມາ​ເຊິ່ງ​ຄວາມ​ຍຸ­ຕິ​ທຳ-ສາ­ມັກ­ຄີ​ພາຍ​ໃນ​ຄອບ­ຄົວ ສຳ­ລັບ​ໜ້າ­ທີ່​ຕາມ​ຫຼັກ​ທຳ​ມະ​ທີ່​ພະ­ພຸດ­ທະ­ເຈົ້າ​ສອນ​ນັ້ນ ແມ່ນ​ບໍ່​ມີ​ໃຜ​ໄດ້​ປຽບ​ເສຍ­ປຽບ ເພາະ​ຜົວ-ເມຍ ຕ້ອງ​ເຮັດ​ໜ້າ­ທີ່​ຕໍ່​ກັນ​ຄົນ​ລະ 5 ຢ່າງ ເຊິ່ງ​ເຄີຍ​ຂຽນ​ອອກ​ແລ້ວ​ຫຼາຍ​ຄັ້ງ​ໃນ​ບົດ​ກ່ອນໆ ນອກ­ຈາກ​ນີ້ ຖ້າ​ເວົ້າ​ບົດ­ບາດ​ຂອງ​ຜູ້­ຍິງ​ລາວ​ເຮົາ ໃນ​ຂະ​ບວນ​ການ​ປະ­ຕິ­ວັດ​ຊາດ ຍິ່ງ​ມີ​ບົດ­ບາດ​ສູງ​ສົ່ງ ເຊັ່ນ: ຢູ່​ໃນ​ພົກ​ຫົວ​ສິ້ນ​ຂອງ​ແມ່­ຍິງ​ອາດ​ມີ​ທັງ​ອາ­ຫານ ແລະ ເອ­ກະ­ສານ​ສຳ­ຄັນ ຕິດ­ຕໍ່​ພົວ­ພັນ​ສົ່ງ​ຂ່າວ​ໃຫ້­ການ​ນຳ ຫຼື ໃນ​ຫາບ​ກະ­ຕ່າ​ໜໍ່­ໄມ້​ທີ່​ຫາບ​ມາ​ຂາຍ​ຢູ່​ຕະ­ຫຼາດ ກໍ​ມີ​ເອ­ກະ­ສານ​ສຳ­ຄັນ...ນີ້​ພຽງ​ຈຳ­ນວນ​ໜ້ອຍ​ໜຶ່ງ ທີ່​ຍົກ​ມາ​ສັນ­ລະ­ເສີນ​ແມ່­ຍິງ​ທີ່​ໃຫ້​ກຳ­ເນີດ​ຜູ້­ນຳ ຫຼື ວີ­ລະ​ບູ​ລຸດ​ຂອງ​ຊາດ.

    ວັນ​ທີ 8 ເດືອນ 3 ປີ 2019 ເປັນ​ວັນ​ແມ່­ຍິງ​ສາ­ກົນ ວຽນ­ມາ​ຄົບ­ຮອບ​ອີກ​ວາ­ລະ​ໜຶ່ງ ຜູ້​ຂຽນ​ຈຶ່ງ​ຄິດ​ວ່າ: ແມ່­ຍິງ​ລາວ​ໄດ້​ມີ​ບົດ­ບາດ​ເດັ່ນ​ທັງ​ໃນ​ເວ­ທີ​ຊາດ ແລະ ສາ­ກົນ ແມ່­ຍິງ​ລາວ​ໄດ້​ມີ​ບົດ­ບາດ​ໃນ​ໜ້າ­ທີ່​ວຽກ​ງານ​ໃນ​ສັງ­ຄົມ​ຫຼາຍ​ຕຳ­ແໜ່ງ​ສຳ­ຄັນ ເປັນ ສສຊ ລັດ­ຖະ­ມົນ­ຕີ ນັກ​ຂຽນ... ຂໍ​ອວຍ­ພອນ​ໄຊ​ແດ່​ແມ່​ຜູ້​ປະ­ເສີດ ເຂັ້ມ­ແຂງ​ກ້າວ​ໄປ​ຄູ່​ກັບ​ສັງ­ຄົມ​ລາວ!.

ຂ່າວທີ່ກ່ຽວຂ້ອງ