ມອບ-ຮັບ ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ

426 05 ມ.ນ. 2019 ຂ່າວໜ້າ​ໜຶ່ງ
ມອບ-ຮັບ ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ

    ວັນ​ທີ 28 ກຸມ­ພາ 2019 ຜ່ານ​ມາ ທີ່​ສະ­ໜາມ​ບິນ​ສາ­ກົນ​ວັດ​ໄຕ ນະ­ຄອນ­ຫຼວງ​ວຽງ​ຈັນ ໄດ້​ມີ​ການ​ຈັດ​ພິ­ທີ​ມອບ-ຮັບ​ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ຊຶ່ງ​ສິ່ງ​ເສດ​ເຫຼືອ​ດັ່ງ­ກ່າວ​ແມ່ນ​ຜົນ­ສຳ­ເລັດ​ທີ່​ໄດ້​ຮັບ​ຈາກ​ການ​ປະ­ຕິ­ບັດ​ງານ​ຮ່ວມ​ຢູ່​ພາກ​ສະ­ໜາມ​ຂອງ​ຄະ­ນະ​ວິ­ຊາ​ການ ລາວ-ອາ​ເມ​ຣິ​ກາ ໃນ​ການ​ສຳ​ຫຼວດ ແລະ ຂຸດ​ຄົ້ນ​ເພື່ອ​ຊອກ​ຫາ​ຮ່ອງ­ຮອຍ ແລະ ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ຄັ້ງ​ທີ 2 ປະ­ຈຳ​ປີ 2018-2019 ຢູ່​ເຂດ​ເມືອງ​ວຽງ​ໄຊ ແຂວງ​ຫົວ­ພັນ.

  ໂດຍ​ຕາງ­ໜ້າ​ໃຫ້​ແກ່​ລັດ­ຖະ­ບານ ແຫ່ງ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ແມ່ນ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ຜູ້​ຊີ້​ນຳ​ວຽກ​ງານ​ການ​ສຳ​ຫຼວດ ແລະ ຂຸດ​ຄົ້ນ​ເພື່ອ​ຊອກ​ຫາ​ຮ່ອງ­ຮອຍ ແລະ ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ​ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ເປັນ​ຜູ້​ກ່າວ​ມອບ ສ່ວນ​ຕາງ­ໜ້າ​ໃຫ້​ແກ່​ລັດ­ຖະ­ບານ​ສະ­ຫະ­ລັດ ອາ​ເມ​ຣິ​ກາ ແມ່ນ​ທ່ານ ນາງ Rena Bitter ເອກ​ອັກ​ຄະ​ລັດ​ຖະ​ທູດ​ສະ­ຫະ­ລັດ​ອາ​ເມ​ຣິ​ກາ ປະ­ຈຳ ສປປ ລາວ ເປັນ​ຜູ້​ກ່າວ​ຮັບ ຊຶ່ງ​ມີ​ເຈົ້າ​ໜ້າ­ທີ່​ຂັ້ນ​ສູງ ແລະ ພາກ­ສ່ວນ​ກ່ຽວ­ຂ້ອງ ໃຫ້​ກຽດ​ເຂົ້າ​ຮ່ວມ.

    ການ​ສຳ​ຫຼວດ ແລະ ຂຸດ​ຄົ້ນ​ຄັ້ງ​ນີ້​ໄດ້​ຄົ້ນ​ພົບ​ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ​ຢູ່​ໃນ 3 ກໍ­ລະ­ນີ​ຄື: ກໍ­ລະ­ນີ 0690 ເຂດ​ບ້ານ​ບັກ 0079 ແລະ 0084 ເຂດ​ບ້ານ​ນາ​ແທ່ນ ເມືອງ​ວຽງ​ໄຊ ແຂວງ​ຫົວ­ພັນ.

    ນັບ​ແຕ່​ມື້​ເລີ່ມ​ຕົ້ນ​ຂອງ​ການ​ຮ່ວມ​ມື​ມາ​ຮອດ​ປັດ­ຈຸ­ບັນ ສອງ​ຝ່າຍ​ໄດ້​ຂຸດ​ຄົ້ນ​ພົບ​ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ແລະ ຈັດ​ສົ່ງ​ແລ້ວ​ຈຳ­ນວນ 285 ຄົນ ໃນ​ຈຳ­ນວນ​ຜູ້​ຫາຍ​ສາບ​ສູນ​ທັງ​ໝົດ 573 ຄົນ ຫຼື​ເກືອບ​ເທົ່າ 50% ແລະ ຍັງ​ອີກ 288 ຄົນ ທີ່​ຝ່າຍ​ອາ​ເມ​ຣິ​ກາ​ຈຳ­ເປັນ ແລະ ຕ້ອງ­ການ​ການ​ຮ່ວມ​ມື​ຈາກ​ຝ່າຍ​ລາວ​ໃນ​ການ​ສືບ­ຕໍ່​ຄົ້ນ​ຫາ ຊຶ່ງ​ລັດ­ຖະ­ບານ​ລາວ​ເຫັນ​ດີ​ຈະ​ສືບ­ຕໍ່​ໃຫ້­ການ​ຮ່ວມ​ມື​ກັບ​ອາ​ເມ​ຣິ​ກາ​ບົນ​ພື້ນ­ຖານ​ຄວາມ​ອາດ​ສາ­ມາດ ແລະ ເງື່ອນ­ໄຂ​ຕົວ​ຈິງ​ຂອງ​ຕົນ ແລະ ອີງ​ຕາມ​ບັນ­ຍາ­ກາດ​ການ​ພົວ­ພັນ​ຮ່ວມ​ມື ລະ­ຫວ່າງສອງ​ປະ­ເທດ ລາວ-ອາ​ເມ​ຣິ​ກາ ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ