ປະຊາຊົນສະເໜີໃຫ້ຈ່າຍຄ່າຊົດເຊີຍທີ່ດິນ ເສັ້ນທາງ 450 ປີ

362 28 ກ.ພ. 2019 ຂ່າວໜ້າ​ໜຶ່ງ
ປະຊາຊົນສະເໜີໃຫ້ຈ່າຍຄ່າຊົດເຊີຍທີ່ດິນ ເສັ້ນທາງ 450 ປີ

    ທ່ານ ບຸນ​ທອງ ພົມ­ມະ­ຈັນ ຫົວ­ໜ້າ​ຄະ­ນະ​ຈັດ​ຕັ້ງ​ນະ­ຄອນ­ຫຼວງ​ວຽງ​ຈັນ (ນວ) ສະ­ມາ­ຊິກ​ສະ­ພາ​ແຫ່ງ​ຊາດ ຊຸດ​ທີ VIII ປະ­ຈຳ​ເຂດ​ເລືອກ​ຕັ້ງ​ທີ 1 ແລະ ສສ ນວ ຊຸດ​ທີ I ທ່ານ ບຸນ​ປິງ ປັນ­ຍາ​ຈິດ ຮອງ​ເຈົ້າ­ເມືອງ​ໄຊ​ເຊດ​ຖາ ສສ ນວ ຊຸດ​ທີ I ແລະ ທ່ານ ວິ­ໄລ​ສານ ພົມ​ມີ​ໄຊ ສສ ນວ ຊຸດ​ທີ I ຮອງ​ປະ­ທານ​ຄະ­ນະ​ກຳ­ມະ­ການ​ເສດ­ຖະ­ກິດ ແຜນ­ການ ແລະ ການ​ເງິນ ຮອງ​ປະ­ທານ​ສະ­ມາ­ຄົມ​ນັກ­ທຸ­ລະ­ກິດ​ແຫ່ງ​ຊາດ​ລາວ ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ ນວ ໄດ້​ເຄື່ອນ​ໄຫວ​ພົບ​ປະ​ປະ­ຊາ­ຊົນ​ຜູ້​ມີ​ສິດ​ເລືອກ​ຕັ້ງ​ຢູ່​ບ້ານ​ນາ​ຄວາຍ​ກາງ ນາ​ຄວາຍ​ໃຕ້ ໄຮ່​ຄຳ ນາ​ສ້າງ​ໄພ ແລະ ບ້ານ​ສົມ​ສະ­ຫງ່າ ເມືອງ​ໄຊ​ເຊດ​ຖາ ໃນ​ວັນ​ທີ 27 ກຸມ­ພາ 2019 ທີ່​ວັດ​ບ້ານ​ນາ​ຄວາຍ​ກາງ ແລະ ບ້ານ​ນາ​ສ້າງ​ໄພ ຖືກ​ຕ້ອນ­ຮັບ​ໂດຍ​ນາຍ­ບ້ານ ແລະ ປະ­ຊາ­ຊົນ.

    ການ​ລົງ​ພົບ​ປະ​ຄັ້ງ​ນີ້ ສສຊ ຊຸດ​ທີ VIII ແລະ ສສ ນວ ຊຸດ​ທີ I ໄດ້​ຮັບ​ຟັງ​ລາຍ​ງານ​ສະ­ພາບ​ລວມ​ໂດຍ​ຫຍໍ້​ຂອງ​ບ້ານ ເປັນ­ຕົ້ນ ການ​ບໍ­ລິ­ຫານ​ການ​ປົກ­ຄອງ ການ​ພັດ­ທະ­ນາ​ບ້ານ ການ​ແກ້​ໄຂ​ປາ­ກົດ­ການ​ຫຍໍ້­ທໍ້ ກໍ​ຄື ບັນ­ຫາ​ທີ່​ພົ້ນ​ເດັ່ນ ບັນ­ຫາ​ສິ່ງ​ທ້າ​ທາຍ ກໍ​ຄື ຂໍ້​ຫຍຸ້ງ­ຍາກ​ຕ່າງໆ ຈາກ​ນັ້ນ ສສຊ ແລະ ສສ ນວ ໄດ້​ຜັດ­ປ່ຽນ​ກັນ​ຂຶ້ນ​ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ແລະ ສະ­ພາ​ປະ​ຊົນ ນວ ຊຸດ​ທີ I ເພື່ອ​ໃຫ້​ປະ­ຊາ­ຊົນ​ໄດ້​ຮັບ​ຮູ້ ແລະ ເຂົ້າ­ໃຈ​ບັນ­ດາ​ພາ­ລະ​ບົດ­ບາດ ສິດ ແລະ ໜ້າ­ທີ່​ຂອງ​ສະ­ພາ​ປະ­ຊາ­ຊົນ ຜົນ​ຂອງ​ກອງ​ປະ­ຊຸມ​ດັ່ງ­ກ່າວ​ທີ່ ສສຊ ແລະ ສສ ນວ ໄດ້​ພິ­ຈາ­ລະ­ນາ​ຮັບ­ຮອງ​ເອົາ​ຫຼາຍ​ບັນ­ຫາ​ສຳ­ຄັນ​ຂອງ​ຊາດ​ຂອງ​ປະ­ຊາ­ຊົນ.

    ໃນ​ໂອ­ກາດ​ລົງ​ມາ​ພົບ​ປະ​ປະ­ຊາ­ຊົນ​ຄັ້ງ​ນີ້ ສສຊ ແລະ ສສ ນວ ໄດ້​ເປີດ​ໂອ­ກາດ​ໃຫ້​ຜູ້​ເຂົ້າ​ຮ່ວມ​ໄດ້​ປະ­ກອບ​ຄຳ​ຄິດ​ຄຳ​ເຫັນ ແລະ ສະ­ເໜີ​ຂໍ້​ຂ້ອງ​ໃຈ​ຕ່າງໆ​ໄປ​ຍັງ​ລັດ­ຖະ­ບານ ກໍ​ຄື ຂະ­ແໜງ­ການ​ກ່ຽວ­ຂ້ອງ ອຳ­ນາດ​ການ​ປົກ­ຄອງ​ທ້ອງ­ຖິ່ນ​ທຸກ​ຂັ້ນ ໂດຍ​ຜ່ານ ສສຊ ແລະ ສສ ນວ ເຊິ່ງ​ຄຳ​ສະ­ເໜີ​ຂອງ​ປະ­ຊາ­ຊົນ ແມ່ນ​ບັນ­ຫາ​ເງິນ­ເດືອນ​ຂອງ​ນາຍ­ບ້ານ ການ​ແກ້​ໄຂ​ຄ່າ​ຊົດ​ເຊີຍ​ທີ່​ດິນ​ຂອງ​ປະ­ຊາ­ຊົນ​ເຂດ​ເສັ້ນ­ທາງ 450 ປີ ເນື່ອງ​ຈາ​ກວ່າ​ມາ​ຮອດ​ປັດ­ຈຸ­ບັນ ການ​ທົດ​ແທນ​ຄ່າ​ຊົດ​ເຊີຍ​ຍັງ​ບໍ່​ທັນ​ໝົດ ບັນ­ຫາ​ຊົນ­ລະ­ປະ­ທານ​ສະ­ໜອງ​ນ້ຳ​ບໍ່​ພຽງ­ພໍ​ກັບ​ການ​ຜະ­ລິດ​ກະ­ສິ­ກຳ ເຮັດ​ໃຫ້​ຜົນ​ຜະ­ລິດ​ໄດ້​ຮັບ​ຜົນ​ໜ້ອຍ ແລະ ສະ­ເໜີ​ສ້ອມ­ແປງ​ທາງ​ເຂົ້າ​ບ້ານ​ນາ​ຄວາຍ​ກາງ ປັດ­ຈຸ­ບັນ ເສັ້ນ­ທາງ​ດັ່ງ­ກ່າວ​ເປັນ​ທາງ​ດິນ​ແດງ ແລະ ອື່ນໆ ເຊິ່ງ​ບັນ­ຫາ​ທີ່​ປະ­ຊາ­ຊົນ​ສະ­ເໜີ​ມາ​ນີ້​ບັນ­ຫາ​ໃດ​ທີ່ ສສຊ ສສ ນວ ຕອບ​ໄດ້​ກໍ່​ໃຫ້​ຄວາມ​ກະ­ຈ່າງ​ແຈ້ງ​ກັບ​ທີ່ ສ່ວນ​ບັນ­ຫາ​ທີ່​ບໍ່​ກ່ຽວ­ຂ້ອງ​ສະ­ພາ ກໍ​ໄດ້​ເກັບ​ບັນ­ທຶກ​ໄວ້​ເພື່ອ​ສະ­ເໜີ​ຕໍ່​ໄປ​ຍັງ​ພາກ­ສ່ວນ​ກ່ຽວ­ຂ້ອງ​ລົງ​ມາ​ແກ້​ໄຂ​ໃນ​ຂອດ​ຕໍ່​ໄປ.

ຂ່າວທີ່ກ່ຽວຂ້ອງ