ແຂວງວຽງຈັນ ຕ້ອງສຸມໃສ່ກວດກາການຄຸ້ມຄອງບໍລິຫານລັດ

268 28 ກ.ພ. 2019 ຂ່າວໜ້າ​ໜຶ່ງ

    ວັນ​ທີ 26 ກຸມ­ພາ 2019 ຄະ­ນະ​ກວດ­ກາ​ພັກ ອົງ­ການ​ກວດ­ກາ​ລັດ ແຂວງ​ວຽງ​ຈັນ ຈັດ​ກອງ​ປະ­ຊຸມ​ວຽກ​ງານ​ກວດ­ກາ​ທົ່ວ​ແຂວງ ປີ 2018 ຂຶ້ນ​ທີ່​ຫ້ອງ​ວ່າ­ການ​ປົກ­ຄອງ​ແຂວງ ເປັນ​ປະ­ທານ​ຂອງ​ທ່ານ ວິ​ນັດ ສີ​ສຸ​ວົງ ປະ­ທານ​ຄະ­ນະ​ກວດ­ກາ​ພັກ-ລັດ ແຂວງ​ວຽງ​ຈັນ ມີ​ທ່ານ ສີ​ໃນ ມຽງ​ລາ​ວັນ ຮອງ​ປະ­ທານ​ຄະ­ນະ​ກວດ­ກາ​ສູນ​ກາງ​ພັກ ອົງ­ການ​ກວດ­ກາ​ລັດ­ຖະ­ບານ ແລະ ຮອງ​ຫົວ­ໜ້າ​ອົງ­ການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ຜູ້­ຕາງ­ໜ້າ​ຈາກ​ອົງ­ການ​ກວດ​ສອບ​ປະ­ຈຳ​ພາກ​ກາງ ການ​ນຳ​ແຂວງ ພະ­ແນກ­ການ ເມືອງ ປະ­ທານ​ຄະ­ນະ​ກວດ­ກາ​ພັກ 11 ເມືອງ ພ້ອມ​ດ້ວຍ​ພະ­ນັກ­ງານ-ລັດ­ຖະ­ກອນ​ຜູ້​ເຮັດ​ວຽກ​ງານ​ກວດ­ກາ​ທົ່ວ​ແຂວງ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ຮັບ​ຟັງ​ລາຍ​ງານ​ບົດ​ສະ­ຫຼຸບ​ຕີ​ລາ­ຄາ​ວຽກ​ງານ​ກວດ­ກາ ປີ 2018 ແລະ ທິດ​ທາງ​ແຜນ­ການ ປີ 2019 ຂອງ​ຄະ­ນະ​ພັກ​ແຂວງ ບົດ​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ເລກ​ທີ 15/ນຍ ຜ່ານ​ເອ­ກະ­ສານ​ແນະ­ນຳ​ຂອງ​ຄະ­ນະ​ກວດ­ກາ​ສູນ​ກາງ​ພັກ​ເລກ​ທີ 358 /ຄກສພ ກ່ຽວ​ກັບ​ການ​ດຳ­ເນີນ​ຊີ­ວິດ​ການ­ເມືອງ​ພາຍ​ໃນ​ພັກ ເພື່ອ​ກ້າວ​ເຂົ້າ​ສູ່​ກອງ​ປະ­ຊຸມ​ສາມ​ຂັ້ນ ເອ­ກະ­ສານ​ແນະ­ນຳ​ຂອງ​ອົງ­ການ​ກວດ­ກາ​ລັດ­ຖະ­ບານ ເລກ​ທີ 419/ອກລ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ວຽກ​ງານ​ກວດ­ກາ​ລັດ ການ​ປະ­ຕິ­ບັດ​ດຳ­ລັດ ກົດ­ໝາຍ ລະ­ບຽບ​ການ ພາ­ລະ​ບົດ­ບາດ​ຂອບ​ເຂດ​ສິດ ໜ້າ­ທີ່​ຂອງ​ບັນ­ດາ​ພະ­ແນກ­ການ ບັນ­ດາ​ເມືອງ ຊອກ​ໃຫ້​ເຫັນ​ດ້ານ​ດີ ດ້ານ​ອ່ອນ ແລະ ບົດ­ຮຽນ​ທີ່​ຖອດ​ຖອນ​ໄດ້ ພ້ອມ​ກັນ​ນັ້ນ ກໍ​ປຶກ­ສາ​ຫາ­ລື​ທິດ​ທາງ​ວຽກ​ງານ​ການ­ເຄື່ອນ­ໄຫວ​ໃນ​ຊຸມ​ປີ​ຕໍ່­ໜ້າ ສະ­ເໜີ​ຄຳ​ຄິດ​ເຫັນ ແລະ ເຈາະ​ຈີ້ມ​ແນ­ໃສ່​ເຮັດ​ໃຫ້​ວຽກ​ງານ​ດັ່ງ­ກ່າວ ກາຍ­ເປັນ​ໜ້າ­ທີ່​ຄວາມ​ຮັບ­ຜິດ­ຊອບ​ຂອງ​ຄະ­ນະ​ພັກ ຄະ­ນະ​ນຳ​ແຕ່​ລະ​ຂັ້ນ ແລະ ກາຍ­ເປັນ​ໜ້າ­ທີ່​ຄວາມ​ຮັບ­ຜິດ­ຊອບ​ຂອງ​ໝົດ​ທຸກ​ຄົນ ນອກ​ນີ້ ຍັງ​ໄດ້​ເຜີຍ­ແຜ່​ເອ­ກະ­ສານ​ສະ­ເຫຼີມ­ສະ­ຫຼອງ ວັນ​ຕ້ານ​ການ​ສໍ້​ລາດ​ບັງ​ຫຼວງ​ສາ­ກົນ ຄົບ­ຮອບ 15 ປີ.

    ໂອ­ກາດ​ນີ້ ທ່ານ ສີ​ໃນ ມຽງ​ລາ​ວັນ ໄດ້​ເນັ້ນ​ໃຫ້​ຄະ­ນະ​ກວດ­ກາ​ພັກ-ລັດ ແຂວງ​ວຽງ​ຈັນ ເອົາ­ໃຈ­ໃສ່​ຊີ້​ນຳ ແລະ ສຸມ​ໃສ່​ຕິດ­ຕາມ​ກວດ­ກາ​ການ​ຄຸ້ມ​ຄອງ​ບໍ­ລິ­ຫານ​ລັດ​ແຕ່​ລະ​ຂັ້ນ ເປັນ­ຕົ້ນ ຕິດ­ຕາມ​ກວດ­ກາ​ການ​ປະ­ຕິ­ບັດ​ພາ­ລະ​ບົດ­ບາດ ໜ້າ­ທີ່ ການ​ໃຊ້​ສິດ​ອຳ­ນາດ​ແຕ່​ລະ​ຂະ­ແໜງ­ການ​ຂັ້ນ​ແຂວງ ແລະ ຂັ້ນ​ເມືອງ ຕິດ­ຕາມ​ກວດ­ກາ​ການ​ປະ­ຕິ­ບັດ​ມະ­ຕິ​ຄຳ​ສັ່ງ ກົດ­ໝາຍ ແລະ ລະ­ບຽບ​ການ​ຕ່າງໆ​ຂອງ​ລັດ ການ​ເກັບ​ລາຍ​ຮັບ​ເຂົ້າ​ງົບ­ປະ­ມານ ການ​ປະ­ຕິ­ບັດ​ກົດ­ໝາຍ​ພາ­ສີ​ອາ­ກອນ ກົດ­ໝາຍ​ງົບ­ປະ­ມານ ແລະ ອື່ນໆ ການ​ຄຸ້ມ​ຄອງ​ລາຍ​ຈ່າຍ​ຂອງ​ບັນ­ດາ​ອົງ­ການ ພະ­ແນກ­ການ​ຂັ້ນ​ແຂວງ ແລະ ຂັ້ນ​ເມືອງ ໃຫ້​ສືບ­ຕໍ່​ຕິດ­ຕາມ​ກວດ­ກາ​ລົງ​ເລິກ ແລະ ສືບ­ສວນ-ສອບ​ສວນ​ການ­ຈັດ­ຕັ້ງ ແລະ ບຸກ­ຄົນ​ທີ່​ພົວ­ພັນ​ເຖິງ​ໂຄງ­ການ​ລົງ­ທຶນ​ຂອງ​ລັດ ການ​ຊຳ­ລະ​ໜີ້​ສິນ​ແບບ​ມີ​ສ່ວນ​ຫຼຸດ ການ​ຊຳ­ລະ​ເກີນ ແລະ ຊ້ຳ​ຊ້ອນ​ໃຫ້​ສຳ­ເລັດ ປະ­ຕິ­ບັດ​ມາດ​ຕະ­ການ​ກວດ­ກາ​ເລີ່ມ​ແຕ່​ຫົວ­ທີ ຕໍ່​ກັບ​ການ​ປະ­ຕິ­ບັດ​ໂຄງ­ການ​ລົງ­ທຶນ​ຂອງ​ລັດ​ທີ່​ຜ່ານ​ມາ ແລະ ໂຄງ­ການ​ກໍ່­ສ້າງ​ທາງ​ລົດ­ໄຟ​ລາວ-ຈີນ ໃນ​ຂອບ​ເຂດ​ແຂວງ​ວຽງ​ຈັນ ເອົາ­ໃຈ­ໃສ່​ຕິດ­ຕາມ​ກວດ­ກາ​ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ເລກ​ທີ 15/ນຍ ຂອງ​ນາ­ຍົກ­ລັດ­ຖະ­ມົນ­ຕີ ກ່ຽວ​ກັບ​ການ​ເພີ່ມ​ທະ­ວີ​ຄວາມ​ເຂັ້ມ​ງວດ​ໃນ​ການ​ຄຸ້ມ​ຄອງ ແລະ ການ​ຂຸດ​ຄົ້ນ​ໄມ້ ເຄື່ອນ​ຍ້າຍ​ໄມ້ ແລະ ທຸ­ລະ​ກິດ​ໄມ້ ໂດຍ​ສະ­ເພາະ ການ​ຂຸດ​ຄົ້ນ​ປຸງ​ແຕ່ງ​ໄມ້ ແລະ ການ​ສົ່ງ​ອອກ​ຜະ­ລິດ​ຕະ​ພັນ​ໄມ້ ເຄື່ອງ​ປ່າ​ຂອງ​ດົງ ການ​ດັດ­ສົມ​ໂຮງ­ງານ​ປຸງ​ແຕ່ງ​ໄມ້​ໃຫ້​ມີ​ຄວາມ​ເໝາະ​ສົມ​ກັບ​ແຕ່​ລະ​ທ້ອງ­ຖິ່ນ ຕ້ານ ແລະ ສະ​ກັ້ນ​ບັນ­ດາ​ປາ­ກົດ­ການ​ຫຍໍ້­ທໍ້​ກ່ຽວ​ກັບ​ທຸ­ລະ​ກິດ​ໄມ້​ໃຫ້​ເຂັ້ມ​ງວດ ຖ້າ​ພົບ​ເຫັນ​ມີ​ການ­ເຄື່ອນ­ໄຫວ​ບໍ່​ຖືກ­ຕ້ອງ​ໃຫ້​ຮີບ​ຮ້ອນ​ແກ້​ໄຂ​ໂດຍ​ໄວ ຕິດ­ຕາມ​ກວດ­ກາ​ການ​ສຳ​ຫຼວດ-ຂຸດ​ຄົ້ນ​ແຮ່​ທາດ ຄຸ້ມ​ຄອງ​ສະ­ພາບ​ແວດ​ລ້ອມ ການ​ຄຸ້ມ​ຄອງ​ທີ່​ດິນ ການ​ຫັນ​ທີ່​ດິນ​ເປັນ​ທຶນ ການ​ຫັນ​ສິດ​ຄຸ້ມ​ຄອງ-ນຳ​ໃຊ້​ທີ່​ດິນ ການ​ໃຫ້​ເຊົ່າ ແລະ ໃຫ້​ສຳ​ປະ­ທານ​ທີ່​ດິນ ການ​ປະ­ຕິ­ບັດ​ນະ­ໂຍ­ບາຍ​ທີ່​ດິນ​ຂອງ​ລັດ ການ​ເກັບ​ພາ­ສີ​ທີ່​ດິນ ແລະ ອື່ນໆ ທັງ​ໝົດ​ນັ້ນ​ໃຫ້​ດຳ­ເນີນ​ໄປ​ຢ່າງ​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ.

ຂ່າວທີ່ກ່ຽວຂ້ອງ