ເບິ່ງບ້ານເຂົາເອົາບົດຮຽນ 28/02/2019

449 28 ກ.ພ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ເລີ່ມ​ດ້ວຍ​ຂ່າວ​ຍີ່­ປຸ່ນ ສ້າງ​ເງື່ອນ­ໄຂ​ໃຫ້​ແມ່­ຍິງ​ມີ​ໂອ­ກາດ​ລົງ​ຮັບ​ສະ­ໝັກ​ຫຼາຍ​ຂຶ້ນ ເລື່ອງ​ປະ­ເທດ​ຊູ​ດັງ ປະ­ຕິ­ບັດ​ນະ­ໂຍ­ບາຍ​ປະ­ຢັດ​ຮັດ​ສາຍ­ແອວ ແລະ ປິດ​ທ້າຍ​ດ້ວຍ​ຂ່າວ​ອັງ­ກິດ ມີ​ແຜນ​ຍົກ­ເລີກ​ການ​ໃຊ້​ລົດ​ແລ່ນ​ດ້ວຍ​ນ້ຳ­ມັນ​ແອັດ​ຊັງ ແລະ ກາ​ຊວນ.

    ທີ່ ຍີ່­ປຸ່ນ: ຍ້ອນ​ວ່າ​ວັນ​ແມ່­ຍິງ​ສາ­ກົນ (8 ມີ­ນາ) ພວມ​ຫຍັບ​ຈໍ້​ມໍ່​ມາ ຈຶ່ງ​ຂໍ​ສະ­ເໜີ​ເລື່ອງ​ທາງ​ການ​ຍີ່­ປຸ່ນ ໄດ້​ມີ​ມາດ​ຕະ­ການ​ສົ່ງ­ເສີມ​ໃຫ້​ແມ່­ຍິງ​ລົງ​ສະ­ໝັກ​ຮັບ​ເລືອກ​ຕັ້ງ​ຫຼາຍ​ຂຶ້ນ ໂດຍ​ຂ່າວ​ໄດ້​ໃຫ້​ຮູ້​ວ່າ ໃນ​ວັນ​ທີ 16 ພຶດ­ສະ­ພາ ປີ 2018 ຍີ່­ປຸ່ນ​ໄດ້​ຮັບ­ຮອງ​ເອົາ​ກົດ­ໝາຍ​ສົ່ງ­ເສີມ​ໃຫ້​ແມ່­ຍິງ​ລົງ​ສະ­ໝັກ​ຮັບ​ເລືອກ​ຕັ້ງ​ໃນ​ຈຳ­ນວນ​ຫຼາຍ​ຂຶ້ນ ກົດ­ໝາຍ​ໄດ້​ກຳ­ນົດ​ເນື້ອ​ໃນ​ຮຽກ­ຮ້ອງ​ໃຫ້​ພັກ​ການ­ເມືອງ​ຕ່າງໆ ສົ່ງ​ຜູ້​ສະ­ໝັກ​ຮັບ​ເລືອກ​ຕັ້ງ​ຍິງ-ຊາຍ ໃນ​ຈຳ­ນວນ​ເທົ່າ​ທຽມ​ກັນ​ໃຫ້​ໄດ້​ຫຼາຍ​ທີ່​ສຸດ ໃນ​ເມື່ອ​ກ່ອນ​ນັ້ນ ຜູ້​ລົງ​ສະ­ໝັກ​ຮັບ​ເລືອກ​ຕັ້ງ​ທີ່​ເປັນ​ເພດ​ຊາຍ ມີ​ຈຳ­ນວນ​ລື່ນ​ຈຳ­ນວນ​ເພດ​ຍິງ​ຢ່າງ​ຫຼວງ­ຫຼາຍ ເຊິ່ງ​ເປັນ​ຜົນ​ໃຫ້​ເພດ​ຍິງ​ມີ​ໂອ­ກາດ​ຖືກ​ເລືອກ​ຕັ້ງ​ໃນ​ຈຳ­ນວນ​ໜ້ອຍ ສະ­ພາ​ຜູ້​ແທນ​ລາ­ຊະ​ດອນ​ຍີ່­ປຸ່ນ​ມີ​ສະ­ມາ­ຊິກ​ທັງ​ໝົດ 465 ທ່ານ ໃນ​ນັ້ນ ມີ​ເພດ​ຍິງ​ພຽງ 47 ທ່ານ ເຊິ່ງ​ເທົ່າ​ກັບ 10,1% ແນວ­ໃດ​ກໍ​ດີ ກົດ­ໝາຍ​ທີ່​ຖືກ​ຮັບ­ຮອງ​ເອົາ​ນີ້ ບໍ່​ໄດ້​ມີ​ມາດ​ຕະ­ການ​ລົງ­ໂທດ​ພັກ​ການ­ເມືອງ​ທີ່​ບໍ່​ປະ­ຕິ­ບັດ​ຕາມ (ຄື​ບໍ່​ສົ່ງ​ຜູ້​ລົງ​ສະ­ໝັກ​ຮັບ​ເລືອກ​ຕັ້ງ​ຜູ້­ຍິງ-ຊາຍ ໃນ​ຈຳ­ນວນ​ສະ­ເໝີ​ກັນ) ດັ່ງ­ນັ້ນ ຈຶ່ງ​ມີ​ຫາງ​ສຽງ​ທີ່​ເຫັນ​ວ່າ ກົດ­ໝາຍ​ອາດ​ຈະ​ບໍ່​ມີ​ຜົນ​ສັກ­ສິດ​ເທົ່າ​ທີ່​ຄວນ ແນວ­ໃດ​ກໍ​ດີ ລັດ­ຖະ­ບານ​ພາຍ​ໃນ​ການ​ນຳ​ຂອງ​ທ່ານ​ນາ­ຍົກ ຊິນ​ໂຊະ ອາ​ເບະ ນັ້ນ ໄດ້​ມີ​ຄວາມ​ພະ­ຍາ­ຍາມ​ສູງ ເພື່ອ​ສົ່ງ­ເສີມ​ໃຫ້​ແມ່­ຍິງ​ຍີ່­ປຸ່ນ​ມີ​ສ່ວນ​ຮ່ວມ​ດ້ານ​ແຮງ​ງານ​ຫຼາຍ​ຂຶ້ນ ໃນ​ຂະ­ນະ​ທີ່​ຍີ່­ປຸ່ນ​ພວມ​ປະ​ເຊີນ​ກັບ​ບັນ­ຫາ​ຂາດ­ແຄນ​ແຮງ​ງານ​ຢ່າງ​ໜັກ­ໜ່ວງ ຍ້ອນ​ຈຳ­ນວນ​ຄົນ​ເຖົ້າ​ເພີ່ມ​ຂຶ້ນ​ຢ່າງ​ຫຼວງ­ຫຼາຍ ແລະ ໄວ­ວາ ທ່ານ​ນາງ ເຊ​ໂກະ ໂນະ​ດະ ລັດ­ຖະ­ມົນ­ຕີ​ກະ­ຊວງ​ພາຍ​ໃນ​ຍີ່­ປຸ່ນ ເຊິ່ງ​ເປັນ​ໜຶ່ງ​ໃນ​ຈຳ­ນວນ​ຜູ້​ຮ່າງ​ກົດ­ໝາຍ​ສະ­ບັບ​ນີ້ ໄດ້​ໃຫ້​ຄວາມ​ໝັ້ນ​ໃຈ​ວ່າ ກົດ­ໝາຍ​ຈະ​ຊຸກ­ຍູ້​ໃຫ້​ມີ​ການ​ປ່ຽນ­ແປງ​ຄັ້ງ​ໃຫຍ່​ໃນ​ການ­ເມືອງ​ຍີ່­ປຸ່ນ ແມ່­ຍິງ​ທີ່​ເມື່ອ​ກ່ອນ​ມີ​ຄວາມ​ລັງ​ເລ​ໃຈ​ກ່ຽວ​ກັບ​ການ​ລົງ​ສະ­ໝັກ​ຮັບ​ເລືອກ​ຕັ້ງ ຈະ​ມີ​ຄວາມ​ກ້າ­ຫານ​ຫຼາຍ​ຂຶ້ນ ໃນ​ປີ 2019 ນີ້ ຍີ່­ປຸ່ນ​ຈະ​ຈັດ­ການ​ເລືອກ​ຕັ້ງ​ລະ­ດັບ​ເຂດ​ໃນ​ເດືອນ​ເມ­ສາ ແລະ ເລືອກ​ຕັ້ງ​ສະ­ພາ​ສູງ (ວຸດ​ທິ​ສະ­ພາ) ໃນ​ເດືອນ​ກໍ­ລະ­ກົດ (ຈາກ​ໜັງ­ສື­ພິມ​ຜູ້​ແທນ​ປະ­ຊາ­ຊົນ ສະ­ບັບ 486 ພຶດ­ສະ­ພາ 2018).

    ທີ່ ປະ­ເທດ​ຊູ​ດັງ (ຊູ​ດານ): ມີ​ຂ່າວ​ຕ່າງ­ປະ­ເທດ (ແຫຼ່ງ​ຂ່າວ SUNA 7/5/2018) ທີ່​ບອກ​ວ່າ ທາງ​ການ​ປະ­ເທດ​ຊູ​ດັງ (Sudan) ໄດ້​ອອກ​ມາດ​ຕະ­ການ​ປະ­ຢັດ​ຮັດ​ສາຍ­ແອວ​ຄັ້ງ​ສຳ­ຄັນ ໂດຍ​ໄດ້​ສັ່ງ​ໃຫ້​ປິດ​ສະ­ຖານ­ທູດ ແລະ ສຳ­ນັກ­ງານ​ຕາງ­ໜ້າ​ຂອງ​ຕົນ​ຢູ່​ປະ­ເທດ​ເຖິງ 13 ແຫ່ງ ໂດຍ​ອ້າງ​ເຫດ­ຜົນ​ວ່າ ເພື່ອ​ຫຼຸດ­ຜ່ອນ​ງົບ­ປະ­ມານ​ການ​ໃຊ້​ຈ່າຍ​ຂອງ​ລັດ­ຖະ­ບານ ໃນ​ທ່າມ­ກາງ​ສະ­ພາບ​ຊຸດ­ໂຊມ​ທາງ​ເສດ­ຖະ­ກິດ​ຢ່າງ​ຮ້າຍ​ແຮງ​ຂອງ​ຊູ​ດັງ ໃນ​ຊຸມ​ປີ​ຫຼັງໆ​ມາ​ນີ້ ຊູ​ດັງ ບໍ່​ໄດ້​ຮັບ​ແຫຼ່ງ​ການ​ເງິນ​ຈາກ​ສາ­ກົນ ການ​ປິດ​ສຳ­ນັກ­ງານ-ຫ້ອງ­ການ ຕາງ­ໜ້າ​ຢູ່​ປະ­ເທດ​ຂອງ​ຊູ​ດັງ​ຄັ້ງ​ນີ້ ໄດ້​ດຳ­ເນີນ​ໄປ​ພ້ອມໆ​ກັບ​ການ​ປະ­ຕິ​ຮູບ ໂຄງ​ສ້າງ​ສະ­ຖານ­ທູດ​ຢູ່​ຕ່າງ­ປະ­ເທດ ເພື່ອ​ໃຫ້​ກະ­ທັດ​ຮັດ ແລະ ເຄື່ອນ​ໄຫວ​ມີ​ປະ​ສິດ­ທິ​ຜົນ​ກວ່າ​ເກົ່າ ໃນ​ນັ້ນ ໄດ້​ຕັດ​ຫຼຸດ​ພະ­ນັກ­ງານ​ຢູ່ 7 ສຳ­ນັກ­ງານ ສ່ວນ​ຫ້ອງ­ການ ການ​ຄ້າ ແລະ ເສດ­ຖະ­ກິດ​ຢູ່​ຕ່າງ­ປະ­ເທດ​ນັ້ນ​ຖືກ​ປິດ​ທັງ​ໝົດ ຍົກ­ເວັ້ນ​ຫ້ອງ­ການ 1 ແຫ່ງ ທີ່​ນະ­ຄອນ­ຫຼວງ ອາ​ບູ​ດາ​ບີ ສະ­ຫະ­ລັດ​ອາ​ຣັບ​ເອ​ມີ​ເຣດ.

    ທີ່ ອັງ­ກິດ: ຂ່າວ​ຕ່າງ­ປະ­ເທດ​ເມື່ອ 2 ປີ​ກ່ອນ​ໜ້າ​ນີ້ (27/7/2017) ໄດ້​ໃຫ້​ຮູ້​ວ່າ ທາງ​ການ​ອັງ­ກິດ​ມີ​ແຜນ​ສັ່ງ​ຫ້າມ​ຂາຍ​ລົດ​ຄັນ​ໃໝ່ ທີ່​ໃຊ້​ນ້ຳ­ມັນ​ແອັດ​ຊັງ ແລະ ນ້ຳ­ມັນ​ກາ​ຊວນ ນັບ​ແຕ່​ປີ 2040 ເປັນ­ຕົ້ນ​ໄປ ແລະ ຕໍ່​ຈາກ​ນັ້ນ​ອີກ 10 ປີ ທາງ​ການ​ມີ​ເປົ້າ​ໝາຍ​ເຮັດ​ເສັ້ນ­ທາງ​ໃນ​ອັງ­ກິດ ປອດ​ຈາກ​ລົດ​ທີ່​ໃຊ້​ນ້ຳ­ມັນ​ແອັດ​ຊັງ ແລະ ກາ​ຊວນ ຢ່າງ​ຂາດ​ຕົວ ເປົ້າ​ໝາຍ​ລວມ​ຂອງ​ມາດ​ຕະ­ການ​ນີ້ ແມ່ນ​ເພື່ອ​ປົກ​ປັກ​ຮັກ­ສາ​ສິ່ງ­ແວ­ດລ້ອມ​ໃຫ້​ປອດ​ຈາກ​ມົດ​ລະ​ພິດ​ຈາກ​ການ​ເຜົາ​ໄໝ້​ນ້ຳ­ມັນ​ສອງ​ຊະ­ນິດ​ດັ່ງ­ກ່າວ ພ້ອມ​ດຽວ​ກັນ​ນີ້ ລັດ­ຖະ­ບານ​ອັງ­ກິດ ກໍ​ໄດ້​ຈັດ​ສັນ​ງົບ­ປະ­ມານ 200 ລ້ານ​ປອນ ໃຫ້​ທາງ​ການ​ທ້ອງ­ຖິ່ນ ຈຳ­ກັດ​ລົດ​ທີ່​ໃຊ້​ນ້ຳ­ມັນ​ກາ​ຊວນ​ບໍ່​ໃຫ້​ແລ່ນ​ໄປ​ຕາມ​ເສັ້ນ­ທາງ​ທີ່​ປະ​ເຊີນ​ກັບ​ມົນ​ລະ​ພິດ​ຢູ່​ແລ້ວ.

ຂ່າວທີ່ກ່ຽວຂ້ອງ