ວິທະຍຸ ໂທລະພາບ ນວ ແລະ ນັກທຸລະກິດຫຼັກ 20 ສ້າງຂະບວນການກີລາ

355 27 ກ.ພ. 2019 ວົງຈອນກີລາ
ວິທະຍຸ ໂທລະພາບ ນວ ແລະ ນັກທຸລະກິດຫຼັກ 20 ສ້າງຂະບວນການກີລາ

    ທ່ານ ຄຳ​ສວນ ຈັນ­ທະ​ລາດ ຜູ້​ຊີ້​ນຳ​ວຽກ​ງານ​ກີ­ລາ​ບານ­ເຕະ​ວິ­ທະ­ຍຸ-ໂທລະ­ພາບ ນະ­ຄອນ­ຫຼວງ​ວຽງ​ຈັນ (ນວ) ນຳ­ພາ​ທີມ​ນັກ­ກີ­ລາ​ວິ­ທະ­ຍຸ-ໂທລະ­ພາບ ນວ ເດີ່ນ​ທາງ​ໄປ​ຮ່ວມ​ແຂ່ງ­ຂັນ​ກີ­ລາ​ເຕະ­ບານ​ນັດ​ມິດ­ຕະ­ພາບ ກັບ​ທີມ​ລວມ​ນັກ­ທຸ­ລະ­ກິດ​ໜຸ່ມ​ຫຼັກ​ຊາວ​ເມືອງ​ຄຳ​ເກີດ ແຂວງ​ຄຳ​ມ່ວນ ວັນ​ທີ 23 ກຸມ­ພາ 2019 ຢູ່​ເດີ່ນ​ກີ­ລາ​ເທບ​ທິ­ດາ FC.

    ເພື່ອ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ວັນ​ແມ່­ຍິງ​ສາ­ກົນ (8 ມີ­ນາ) ຄົບ­ຮອບ 109 ປີ ທີ່​ຈະ​ໝູ­ນວຽນ​ມາ​ບັນ­ຈົບ​ຄົບ­ຮອບ​ອີກ​ວາ­ລະ​ໜຶ່ງ ທັງ​ເປັນ​ການ​ສ້າງ​ບັນ­ຍາ­ກາດ​ເບີກ­ບານ​ມ່ວນ­ຊື່ນ ດ້ວຍ​ການ​ອອກ­ກຳ­ລັງ​ກາຍ​ເພື່ອ​ສຸ­ຂະ­ພາບ ສ້າງ​ໄດ້​ຄວາມ​ສາ­ມັກ­ຄີ​ຮັກ­ແພງ ລະ­ຫວ່າງ​ສອງ​ອົງ​ການ­ຈັດ­ຕັ້ງ ເຊິ່ງ​ການ​ແຂ່ງ­ຂັນ​ດັ່ງ­ກ່າວ ແມ່ນ​ເຕັມ​ດ້ວຍ​ບັນ​ຍາດ​ກາດ​ເບີກ­ບານ​ມ່ວນ­ຊື່ນ ໃນ​ນີ້​ໝົດ​ເວ­ລາ​ການ​ແຂ່ງ­ຂັນ ເປັນ​ທີມ​ວິ­ທະ­ຍຸ-ໂທລະ­ພາບ ນວ ເອົາ​ຊະ­ນະ​ທີມ​ລວມ​ນັກ­ທຸ­ລະ­ກິດ​ໜຸ່ມ​ຫຼັກ​ຊາວ 9-7 ປະ­ຕູ.

    ໂອ­ກາດ​ນີ້ ທ່ານ ບຸນ​ລ້ຽງ ສີ­ໃສ​ແກ້ວ ເຈົ້າ​ຂອງ​ຮ້ານ​ບຸນ​ລ້ຽງ​ຫຍິບ​ເບາະ​ລົດ​ທຸກ​ຊະ­ນິດ ກໍ​ໄດ້​ມອບ​ເສື້ອ​ວອມ 16 ຊຸດ ມູນ​ຄ່າ 4 ລ້ານ​ກີບ ໃຫ້​ທີມ​ວິ­ທະ­ຍຸ-ໂທລະ­ພາບ ນວ ນອກ​ນີ້ ທ່ານ ລິນ​ທອງ ເຈົ້າ​ຂອງ​ປ້ຳ­ນ້ຳ­ມັນ​ດາ​ຟີ ແລະ ທ່ານ ດອງ ເຈົ້າ​ຂອງ​ສວນ​ສະ​ຕໍ​ເບີ​ຣີ​ວັງ​ນ້ຳ​ເຢັນ ກໍ​ໄດ້​ຕາງ­ໜ້າ​ນັກ­ທຸ­ລະ­ກິດ​ໜຸ່ມ​ຫຼັກ​ຊາວ ສະ­ໜັບ­ສະ­ໜູນ​ຄ່າ​ເດີນ­ທາງ ທີ່​ພັກ ແລະ ອາ­ຫານ ມູນ​ຄ່າ 2 ລ້ານ​ກີບ ຕື່ມ​ອີກ.

ຂ່າວທີ່ກ່ຽວຂ້ອງ