ເງິນ: ຢືມງ່າຍແຕ່ທວງຍາກ

913 27 ກ.ພ. 2019 ນານາສາລະ

    ການ​ຫາ​ເງິນ​ສຳ­ລັບ​ບາງ​ຄົນ​ງ່າຍ ແຕ່​ກັບ​ອີກ​ຫຼາຍ​ຄົນ​ກໍ​ຫາ​ຍາກ ເຊິ່ງ​ຜູ້​ຂຽນ​ມີ​ຄຳ​ເຫັນ​ວ່າ ການ​ໃຊ້​ຈ່າຍ​ເງິນ​ໃຫ້​ເປັນ​ຍິ່ງ​ຍາກ​ກວ່າ​ການ​ຫາ​ເງິນ ເພາະ​ບາງ​ຄົນ​ຫາ​ເງິນ​ມາ​ໄດ້​ໃຈ­ດີ​ໃຫ້​ໝູ່​ຢືມ ບາດ​ໄປ​ທວງ​ຄືນ​ຍາກ ເຊິ່ງ​ບາງ​ກໍ­ລະ­ນີ​ເຖິງ​ຂັ້ນ​ຕັດ­ຂາດ​ຄວາມ​ສຳ­ພັນ​ກາຍ­ເປັນ​ສັດ­ຕູ​ກັນ ນີ້​ແຫຼະ​ລິດ​ຂອງ​ເງິນ ຍົວະ​ໃຫ້​ຄົນ​ຖືກ​ກັນ ຫຼື ຜິດ​ກັນ​ກໍ​ໄດ້ ເງິນ​ສາ­ມາດ​ປ່ຽນ​ໃຈ​ຄົນ​ໂລບ​ໄດ້ ເພາະ​ຄົນ​ທີ່​ມີ​ຈິດ­ໃຈ​ໂລບ ຢາກ​ໄດ້​ກໍ​ຈະ​ຫາ​ແຜນ​ເອົາ​ເງິນ​ທີ່​ເຂົາ​ເຫັນ​ຊ່ອງ​ທາງ​ຈົນ​ໄດ້ ເຊັ່ນ: ຊອກ​ຫາ​ສ້າງ​ແຜນ ສ້າງ​ໂຄງ­ການ ເພື່ອ​ຂຶ້ນ​ງົບ­ປະ­ມານ​ແລ້ວ​ຄິດ­ໄລ່​ຫາ​ເປີ­ເຊັນ​ກິນ...

    ການ​ໃຊ້​ເງິນ​ບໍ່​ເປັນ​ນັ້ນ​ມີ​ຫຼາຍ​ແບບ ເຊັ່ນ: ບາງ​ຄົນ​ຫາ​ເງິນ​ໄດ້​ມາ​ແລ້ວ ມີ​ເປົ້າ​ໝາຍ​ຈະ​ຈ່າຍ​ຄ່າ​ຫ້ອງ​ເຊົ່າ ແຕ່​ໃຈ­ງ່າຍ​ໃຊ້​ເງິນ​ດັ່ງ­ກ່າວ​ໄປ​ຫຼິ້ນ​ພະ­ນັນ​ໝົດ​ກໍ​ມີ ຫຼື ບາງ​ຄົນ​ຫຼົງ​ເອົາ​ໄປ​ຈ່າຍ​ຫຼິ້ນ​ກິນ​ຟຸມ​ເຟືອຍ​ກໍ​ມີ ເພາະ​ເວ­ລາ​ເຫຼົ້າ​ເຂົ້າ​ປາກ​ແລ້ວ​ໃຈ​ໃຫຍ່ ໜ້າ​ໃຫຍ່​ຂຶ້ນ​ມາ​ທັນ­ທີ ບາດ​ຊ່ວງ​ເຫຼົ້າ​ແລ້ວ​ນັ່ງ​ເຫງົາ​ປານ​ໄກ່​ຕົກ​ນ້ຳ ບາງ​ຄົນ​ຫາ​ແຜນ​ເອົາ​ເງິນ​ແບບ​ສ້າງ​ພາບ​ພົດ​ໜ້າ​ເຊື່ອ​ຖື​ໃສ່​ຊຸດ​ເຄື່ອງ​ແບບ​ທີ່​ມີ​ກຽດ ວາງ​ລ່ຽມ​ວ່າ​ສາ­ມາດ​ຊ່ວຍ​ຄົນ​ອື່ນ​ແລ່ນ​ເຂົ້າ​ວຽກ​ໄດ້ ສຸດ​ທ້າຍ​ຂີ້​ແມວ​ເຕັມ​ກະ­ດົ້ງ ຖືກ​ຟ້ອງ​ຂຶ້ນ​ສານ ຫຼື ຫ້ອງ­ການ​ບ້ານ​ຫຼາຍ​ກໍ­ລະ­ນີ ພວກ​ໜຶ່ງ​ອີກ​ບໍ່​ຢາກ​ຈ່າຍ​ເງິນ​ຄ່າ​ເຊົ່າ​ຫ້ອງ​ແຖວ​ສາມ​ສີ່​ເດືອນ ຫຼື ເປັນ​ປີ ເວ­ລາ​ອອກ​ໄປ​ຂ້າງ​ນອກ​ຄ່ອຍ​ຂົນ​ເຄື່ອງ​ອອກ​ເທື່ອ​ລະ​ໜ້ອຍ ນີ້​ກໍ​ລ່ຽມ​ໜຶ່ງ​ຂອງ​ຄົນ​ບໍ່​ມີ​ເງິນ​ຈ່າຍ ຫຼື ມີ​ຈະ​ຈ່າຍ​ແລ້ວ­ແຕ່​ນຳ­ໄປ​ຈ່າຍ​ຜິດ​ວັດ­ຖຸ​ປະ­ສົງ.

    ການ​ຢືມ​ເງິນ​ສຳ­ລັບ​ບາງ​ຄົນ​ເຂົາ​ຖື​ວ່າ​ຢືມ​ໄດ້​ສ່ຳ​ຂໍ​ໄດ້ ບາດ​ເຖິງ​ເວ­ລາ​ເຈົ້າ​ຂອງ​ເງິນ​ໄປ​ທວງ​ພວກ​ນີ້​ພ້ອມ​ແລ້ວ ທີ່​ຈະ​ຜິດ​ຖຽງ​ທຳ­ລາຍ​ມິດ­ຕະ­ພາບ ເຊິ່ງ​ບາງ​ກໍ­ລະ­ນີ​ຖື​ໄດ້​ວ່າ​ຈັດ​ຢູ່​ໃນ​ຂັ້ນ​ເທບ (18 ມຸງ­ກຸດ) ເພາະ​ຊີ­ວິດ​ລື້ງ​ເຄີຍ​ກັບ​ການ​ຢືມ-ເປັນ​ໜີ້ ເວ­ລາ​ໄດ້​ເງິນ​ມາ​ແລ້ວ​ກໍ​ມັກ​ໃຊ້​ຈ່າຍ​ຟຸມ​ເຟືອຍ​ແບບ​ໄຮ​ໂຊ ແຕ່​ຖ້າ​ຕິດ­ຕາມ​ຕອນ​ຈົບ​ຂອງ​ລະ­ຄອນ​ຊີ­ວິດ ພວກ​ນີ້​ເວ­ລາ​ຕົກ­ອັບ​ຖືກ​ເຊີນ​ຂຶ້ນ​ຫ້ອງ­ການ​ບ້ານ-ຂຶ້ນ​ສານ ເຖິງ​ຂັ້ນ​ຢຶດ​ຊັບ ເຮືອນ ແລະ ດິນ​ທີ່​ມີ ແລະ ລົດ​ຄັນ​ງາມ​ທີ່​ທຽວ​ຂີ່​ຢືມ​ເງິນ​ເຂົາ​ກໍ​ຖືກ​ຢຶດ ເຊິ່ງ​ຜູ້​ຂຽນ​ເຄີຍ​ໄດ້​ຍິນ​ຄົນ​ບູ­ຮານ​ສອນ​ໄວ້​ວ່າ ຢ່າ​ໃຊ້​ຊີ­ວິດ​ແບບ​ໝາ​ຫົວ­ເນົ່າ ເລື່ອງ​ຂອງ​ເງິນ​ໃນ​ຍຸກ​ເສດ­ຖະ­ກິດ​ຝືດ­ເຄືອງ ແຕ່­ລະ­ຄົນ​ຍິ່ງ​ຕ້ອງ​ມີ​ສະ­ຕິ​ປະ­ຢັດ​ອົດ­ອອມ ການ​ໃຊ້​ຈ່າຍ​ຕ້ອງ​ມີ​ລະ­ບຽບ​ວິ­ໄນ ບໍ່​ຈ່າຍ​ເງິນ​ຄື​ນັກ­ທຸ­ລະ­ກິດ​ໃຫຍ່ ທີ່​ເຂົາ​ມີ​ຫຼັງ​ອີງ​ລ້ານ ຜູ້​ທີ່​ຢືມ​ເງິນ​ກໍ​ຄວນ​ຄຳ­ນຶງ​ເຖິງ​ມະ­ນຸດ­ສະ­ທຳ ມີ​ຈິດ­ໃຈ​ຮູ້­ຈັກ​ຄຸນ​ຄົນ ເມື່ອ​ເຂົາ​ກະ­ລຸ­ນາ​ໃຫ້​ຢືມ​ໄດ້​ເງິນ​ມາ​ກໍ​ຄວນ​ນຳ­ໄປ​ຄືນ​ເຂົາ ເພາະ­ວ່າ​ຖ້າ​ຂາດ​ມະ­ນຸດ­ສະ­ທຳ​ແລ້ວ​ມັນ​ກໍ​ໝົດ​ຄວາມ​ເປັນ​ຄົນ​ໃນ​ໂຕ.

    ການ​ຢືມ​ເງິນ​ເຖິງ​ແມ່ນ​ວ່າ​ຈະ​ຢືມ​ຈາກ​ບຸກ­ຄົນ ຫຼື ທະ­ນາ­ຄານ​ນັ້ນ​ງ່າຍ​ກວ່າ​ການ​ຫາ​ເງິນ​ໄປ​ຄືນ​ເຂົາ ແລະ ການ​ໃຊ້​ຈ່າຍ​ເງິນ​ໃຫ້​ເປັນ​ກໍ​ຍາກ​ອີກ ເຊິ່ງ​ເອີ້ນ​ວ່າ ຜູ້­ກ່ຽວ​ຕ້ອງ​ມີ​ຄວາມ​ຮູ້​ໃນ​ການ​ຄຸ້ມ​ຄອງ​ການ​ເງິນ ບໍ່​ດັ່ງ­ນັ້ນ​ບໍ່​ວ່າ​ຊີ­ວິດ ຫຼື ສະ​ຖາ​ບັນ​ໃດ​ທີ່​ລົງ­ທຶນ​ກໍ​ລົງ​ເຫວ​ມາ​ຫຼາຍ​ລາຍ​ແລ້ວ ຍ້ອນ​ຈ່າຍ​ເງິນ​ບໍ່​ເປັນ ເງິນ​ເປັນ​ທັງ​ມິດ ແລະ ສັດ­ຕູ ໃນ​ເວ­ລາ​ດຽວ​ກັນ ຖ້າ​ມີ​ຄວາມ​ຮູ້​ຫາ​ເງິນ ຈ່າຍ​ເງິນ​ເປັນ ເງິນ​ກໍ​ຈະ​ເປັນ​ມິດ​ກັບ​ເຮົາ​ຕະ­ຫຼອດ​ໄປ !

ດັ້ນ​ກີບ​ເມກ

ຂ່າວທີ່ກ່ຽວຂ້ອງ