ສະມາຄົມຊ່ວຍເຫຼືອເດັກນ້ອຍພິການ ໄດ້ຮັບການຊ່ວຍເຫຼືອລໍ້ເລື່ອນ

363 26 ກ.ພ. 2019 ຂ່າວໜ້າ​ໜຶ່ງ
ສະມາຄົມຊ່ວຍເຫຼືອເດັກນ້ອຍພິການ ໄດ້ຮັບການຊ່ວຍເຫຼືອລໍ້ເລື່ອນ

    ພິ­ທີ​ມອບ-ຮັບ​ລໍ້​ເລື່ອນ ລະ­ຫວ່າງ​ກຸ່ມ​ອາ­ສາ​ສະ­ໝັກ​ສົ່ງ​ລໍ້​ເລື່ອນ ໃຫ້​ເດັກ­ນ້ອຍ​ພິ­ການ​ຢູ່​ຕ່າງ­ປະ­ເທດ ກັບ​ສະ­ມາ­ຄົມ​ຊ່ວຍ­ເຫຼືອ​ເດັກ­ນ້ອຍ​ພິ­ການ​ລາວ ເພື່ອ​ສົ່ງ­ເສີມ​ການ​ເຂົ້າ​ເຖິງ​ການ​ສຶກ​ສາ​ຂັ້ນ​ພື້ນ­ຖານ ແລະ ການ​ດຳ­ລົງ​ຊີ­ວິດ​ໃນ​ສັງ­ຄົມ​ຢ່າງ​ເປັນ​ເອ­ກະ​ພາບ ຈັດ​ຂຶ້ນ​ວັນ​ທີ 22 ກຸມ­ພາ 2019 ທີ່​ຫ້ອງ­ການ​ສະ­ມາ­ຄົມ​ຊ່ວຍ­ເຫຼືອ​ເດັກ­ນ້ອຍ​ພິ­ການ ບ້ານ​ຮ່ອງ​ສຸ­ພາບ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ໂດຍ​ການ​ມອບ​ຂອງ​ທ່ານ ເຄນ​ຊູ​ເກະ ໂອ​ດາ ປະ­ທານ​ອົງ­ການ​ກຸ່ມ​ອາ­ສາ​ສະ­ໝັກ​ສົ່ງ​ລໍ້​ເລື່ອນ ໃຫ້​ເດັກ­ນ້ອຍ​ພິ­ການ​ຢູ່​ຕ່າງ­ປະ­ເທດ ໃຫ້​ກຽດ​ຮັບ​ຂອງ​ທ່ານ ສົມ​ເພັດ ອັກ​ຄະ​ວົງ ປະ­ທານ​ສະ­ມາ­ຄົມ​ຊ່ວຍ­ເຫຼືອ​ເດັກ­ນ້ອຍ​ພິ­ການ ມີ​ທ່ານ ສຸ­ລິ­ຍາ ບຸດ​ທະ​ລາດ ຮອງ​ຫົວ­ໜ້າ​ຫ້ອງ­ການ​ສຳ­ນັກ­ງານ​ປົກ­ຄອງ​ເມືອງ​ໄຊ​ເຊດ​ຖາ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ອົງ­ການ​ກຸ່ມ​ອາ­ສາ​ສະ­ໝັກ​ສົ່ງ​ລໍ້​ເລື່ອນ ໃຫ້​ເດັກ­ນ້ອຍ​ພິ­ການ​ຢູ່​ຕ່າງ­ປະ­ເທດ ໄດ້​ເລີ່ມ​ເຄື່ອນ​ໄຫວ​ກິດ­ຈະ­ກຳ​ມອບ​ລໍ້​ເລື່ອນ ໃຫ້​ເດັກ­ນ້ອຍ​ພິ­ການ​ມາ​ແຕ່​ປີ 2004 ເປັນ­ຕົ້ນ​ມາ ຮອດ​ປັດ­ຈຸ­ບັນ ໄດ້​ມອບ​ລໍ້​ເລື່ອນ​ໃຫ້​ກັບ​ເດັກ­ນ້ອຍ​ພິ­ການ ຈຳ­ນວນ 7 ພັນ​ກວ່າ​ອັນ ໃນ 23 ປະ­ເທດ​ທົ່ວ​ໂລກ ໃນ​ນີ້ ລວມ​ທັງ ສປປ ລາວ ສຳ­ລັບ ສປປ ລາວ ໄດ້​ຈັດ​ສົ່ງ​ລໍ້​ເລື່ອນ​ມາ​ຊ່ວຍ­ເຫຼືອ​ທັງ​ໝົດ 261 ອັນ ເຊິ່ງ​ຄັ້ງ​ນີ້​ເປັນ​ຄັ້ງ​ທີ 3 ມີ ຈຳ­ນວນ 90 ອັນ ລໍ້​ທີ່​ນຳ​ມາ​ມອບ​ໃນ​ຄັ້ງ​ນີ້ ແມ່ນ​ລໍ້​ທີ່​ເດັກ­ນ້ອຍ​ໃນ​ຍີ່­ປຸ່ນ​ບໍ່​ສາ­ມາດ​ໃຊ້​ໄດ້ ເນື່ອງ​ຈາກ​ເດັກ­ນ້ອຍ​ໄດ້​ມີ​ການ​ເຕີບ​ໃຫຍ່​ຂຶ້ນ ດັ່ງ­ນັ້ນ ອົງ­ການ​ຈຶ່ງ​ໄດ້​ລະ­ດົມ​ການ​ປະ­ກອບ­ສ່ວນ​ຊ່ວຍ­ເຫຼືອ​ຈາກ​ພໍ່​ແມ່​ຜູ້​ປົກ­ຄອງ ກໍ​ຄື ເດັກ­ນ້ອຍ​ພິ­ການ​ຢູ່​ປະ­ເທດ​ຢີ່​ປຸ່ນ ເພື່ອ​ມາ​ຊ່ວຍ­ເຫຼືອ​ເດັກ­ນ້ອຍ​ພິ­ການ​ຢູ່ ສປປ ລາວ ແນ­ໃສ່​ເຮັດ​ໃຫ້​ເຂົາ­ເຈົ້າ​ມີ​ຄວາມ​ສະ­ດວກ​ສະ­ບາຍ ໃນ​ການ​ເຂົ້າ​ຮ່ວມ​ກິດ­ຈະ­ກຳ​ຕ່າງໆ ແລະ ການ​ດຳ­ລົງ​ຊີ­ວິດ​ໃນ​ຊຸມ​ຊົນ ໄດ້​ຢ່າງ​ມີ​ຄວາມ​ເປັນ​ເອ­ກະ­ລາດ.

ຂ່າວທີ່ກ່ຽວຂ້ອງ