ເວ​ເນ​ຊູ​ເອ​ລາ ປະກາດ​ຕັດຂາດ​ການ​ພົວພັນ​ທາງ​ການ​ທູດ​ກັບ​ໂກ​ລົມ​ບີ

277 26 ກ.ພ. 2019 ຂ່າວຕ່າງປະເທດ
ເວ​ເນ​ຊູ​ເອ​ລາ ປະກາດ​ຕັດຂາດ​ການ​ພົວພັນ​ທາງ​ການ​ທູດ​ກັບ​ໂກ​ລົມ​ບີ

     ປະທານາທິບໍດີ ນີ​ໂກ​ລາ​​ສ ມາ​ດູ​ໂຣ ຜູ້ນຳ​ເວ​ເນ​ຊູ​ເອ​ລາ ຖະແຫຼງ​ເມື່ອ​ວັນ​ທີ 23 ກຸມພາ​ນີ້ ໂດຍ​ໄດ້​ປະກາດ​ຕັດຂາດ​ການ​​ພົ​ໄວ​ພັນ​ທາງ​ດ້ານ​ການ​ທູດ​ກັບ​ໂກ​ລົມ​ບີ ຊຶ່ງ​ກ່າວ​ຫາ​ລັດຖະບານ​ປະເທດ​ນີ້​ວ່າ ພວມ​ມີ​ການ​ກະທຳ​ໜູນ​ຫຼັງ​ຢ່າງ​ເປີດ​ແປນ ໃນ​ກົນອຸບາຍ​ເຮັດ​ໃຫ້​ຂາດ​ຄວາມ​ໝັ້ນຄົງ ແລະ ​ໂຄ່ນ​ລົ້ມ​ອຳນາດ​ການ​ປົກຄອງ​ທີ່​ຖືກຕ້ອງ​ຕາມ​ລັດ​ຖະ​ທຳ​ມະນູນ ຊຶ່ງ​ຝ່າຍ​ຄ້ານ​ໃນ​ເວ​ເນ​ຊູ​ເອ​ລາ​ພວມ​ດຳເນີນ​ຢູ່.

    ປະທານາທິບໍດີ ມາ​ດູ​ໂຣ ກ່າວ​ຕໍ່​ງານ​ໂຮມ​ຊຸມນຸມ​ຢູ່​ທີ່​ນະຄອນຫຼວງ ກາ​ຣາ​ກາ​​ສ  ທີ່​ມີ​ຜູ້​ໃຫ້ການ​ສະໜັບສະໜູນ​ລັດຖະບານ​ເຂົ້າ​ຮ່ວມ​ຫຼາຍ​ໝື່ນ​ຄົນ​ນັ້ນ ໂດຍ​ໄດ້​ກ່າວ​ປະນາມ ຕໍ່​ການ​ໃຫ້ການ​ສະໜັບສະໜູນ​ຂອງ​ທ່ານ ອີ​ວານ ດູ​ເກ ປະທານາທິບໍດີ​ໂກ​ລົມ​ບີ ທີ່​ມີ​ຕໍ່​ການ​ກະທຳ​ເກາະ​ຜິດ ທີ່​ເປີດ​ຂະ​ບວນ​ການ​ຂຶ້ນ​ໂດຍ​ກຸ່ມ​ຝ່າຍ​ຄ້ານ​ຫົວ​ຮຸນ​ແຮງ ອັນ​ມີ​ທ່ານ ຈວານ ກວາຍ​ໂດ ຜູ້​ຊຶ່ງ​ປະກາດ​ໃຫ້​ຕົນ​ເອງ​ເປັນ​ປະທານາທິບໍດີ​ຊົ່ວຄາວ ຂອງ​ເວ​ເນ​ຊູ​ເອ​ລາ  ຈາກ​ການ​ໜູນ​ຫຼັງ​ຂອງ​ລັດຖະບານ ສ ອາ​ເມ​ຣິ​ກາ.

    ປະທານາທິບໍດີ ມາ​ດູ​ໂຣ ໄດ້​ໃຫ້​ກຳນົດ​ໃຫ້​ແກ່​ພະນັກງານ​ທູດ​ຂອງ​ໂກ​ລົມ​ບີ​ທຸກໆ​ຄົນ ຕ້ອງ​ອອກ​ໄປ​ຈາກ​ດິນແດນ​ເວ​ເນ​ຊູ​ເອ​ລາ ພາຍ​ໃນ​ເວລາ 24 ຊົ່ວໂມງ. ໃນ​ຂະນະ​ດຽວ​ກັນ ທ່ານ​ກໍ​ຢືນຢັນ​ວ່າ ຈະ​ສືບຕໍ່​ຄຽງ​ບ່າ​ຄຽງ​ໄຫຼ່​ກັບ​ປະຊາຊົນ ໃນ​ການ​ຕໍ່ສູ້​ເພື່ອ​ປົກ​ປ້ອງ​ສັກ​ສີ​ຂອງ​ມະນຸດ ສັນຕິພາບ ແລະ ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ເວ​ເນ​ຊູ​ເອ​​ລ.

    ນະຄອນ ກູ​ກູ​ຕາ ຂອງ​ໂກ​ລົມ​ບີ ພວມ​ຖືກ​ນຳ​ໃຊ້​ໃຫ້​ເປັນ​ໜຶ່ງ​ໃນ​ບັນດາ​ສະຖານທີ່​ເຕົ້າໂຮມ​ເຄື່ອງ​ຊ່ວຍເຫຼືອ​ມະນຸດສະທຳ ໂດຍ​ແມ່ນ ສ ອາ​ເມ​ຣິ​ກາ ແລະ ພັນທະ​ມິດ​ຈຳນວນ​ໜຶ່ງ​ຢູ່​ໃນ​ອາ​ເມ​ຣິ​ກາ ລາ​ຕິນ ເປັນ​ຜູ້​ສະໜອງ​ໃຫ້. ຝ່າຍ​ຄ້ານ​ໃນ​ເວ​ເນ​ຊູ​ເອ​ລາ ພວມ​ເຮັດ​ທຸກໆ​ວິທີ ເພື່ອ​ນຳ​ເອົາ​ເຄື່ອງ​ຊ່ວຍເຫຼືອ​ດັ່ງກ່າວ ເຂົ້າ​ໄປ​ໃນ​ເວ​ເນ​ຊູ​ເອ​ລາ ໂດຍ​ບໍ່​ເອົາ​ຫົວຊາ​ຕໍ່​ການ​ກີດ​ກັນ​ຂອງ​ກອງ​ກຳລັງ​ຮັກສາ​ຄວາມ​ສະຫງົບ ຢູ່​ໃນ​ເຂດ​ຊາຍ​ແດນ​ລະຫວ່າງ​ເວ​ເນ​ຊູ​ເອ​ລາ ກັບ​ໂກ​ລົມ​ບີ ແລະ ບຣາ​ຊີ​​ລ ທີ່​ພວມ​ຜັນ​ແປ​ໄປ​ຢ່າງ​ເຄັ່ງ​ຕຶງ.

 

ຂ່າວທີ່ກ່ຽວຂ້ອງ