ຍົກລະດັບການລົງທຶນຮ່ວມລະຫວ່າງ ພາກລັດ ແລະ ເອກະຊົນ ໃຫ້ມີປະສິດທິຜົນ

364 25 ກ.ພ. 2019 ຂ່າວໜ້າ​ໜຶ່ງ

    ກະ­ຊວງ​ແຜນ­ການ ແລະ ການ​ລົງ­ທຶນ (ຜທ) ຈັດ​ສຳ​ມະ​ນາ​ກ່ຽວ​ກັບ​ການ​ລົງ­ທຶນ​ຮ່ວມ​ລະ­ຫວ່າງ​ພາກ​ລັດ ແລະ ເອ­ກະ​ຊົນ (PPP) ຂຶ້ນ​ວັນ​ທີ 22 ກຸມ­ພາ 2019 ຢູ່​ໂຮງ­ແຮມ​ຄຣາວ​ພລາ​ຊາ ໂດຍ​ເປັນ​ປະ­ທານ​ຂອງ​ທ່ານ ມະ­ໂນ​ທອງ ວົງ​ໄຊ ຫົວ­ໜ້າ​ກົມ​ສົ່ງ­ເສີມ​ການ​ລົງ­ທຶນ ກະ­ຊວງ ຜທ ມີ​ທ່ານ ທິມ​ມໍ​ທີ ເອດ​ເວີດ ອຸ­ປະ​ທູດ​ສະ­ຖານ­ທູດ​ກາ​ນາ​ດາ ປະ­ຈຳ​ລາວ ພ້ອມ​ດ້ວຍ​ຜູ້­ຕາງ­ໜ້າ​ອົງ­ການ​ການ​ເງິນ​ສາ­ກົນ (IFC) ປະ­ຈຳ​ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ມະ­ໂນ​ທອງ ວົງ​ໄຊ ກ່າວ​ວ່າ: ການ​ສົ່ງ­ເສີມ​ຮູບ​ແບບ PPP ໃນ​ເງື່ອນ­ໄຂ​ທີ່​ລັດ­ຖະ­ບານ​ມີ​ຂໍ້​ຈຳ­ກັດ​ດ້ານ​ທຶນ­ຮອນ ຈະ​ສາ­ມາດ​ຊ່ວຍ​ຫຼຸດ­ຜ່ອນ​ພາ­ລະ​ແບກ​ຫາບ​ດ້ານ​ງົບ­ປະ­ມານ​ຂອງ​ພາກ​ລັດ ໄດ້​ຢ່າງ​ຫຼວງ­ຫຼາຍ ໃນ​ການ​ກໍ່­ສ້າງ​ພື້ນ­ຖານ​ໂຄງ​ລ່າງ ແລະ ການ​ສະ­ໜອງ​ການ​ບໍ­ລິ­ການ​ຂອງ​ພາກ​ລັດ ນອກ​ນີ້ PPP ຍັງ​ສາ­ມາດ​ຍົກ​ປະ​ສິດ­ທິ​ຜົນ​ຂອງ​ການ​ລົງ­ທຶນ​ໃຫ້​ສູງ​ຂຶ້ນ​ຢ່າງ​ເດັ່ນ​ຊັດ ພ້ອມ​ຫຼຸດ­ຜ່ອນ​ຄວາມ​ຮັບ­ຜິດ­ຊອບ​ຕໍ່​ຄວາມ​ສ່ຽງ​ຂອງ​ພາກ​ລັດ ຕະ­ຫຼອດ​ວົງ​ຈອນ​ໂຄງ­ການ ເຊິ່ງ​ຈະ​ສາ­ມາດ​ປະ­ກອບ­ສ່ວນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຕາມ​ທິດ​ທາງ​ພັດ­ທະ­ນາ​ແບບ​ຍືນ​ຍົງ ແລະ ເຕີບ​ໂຕ​ແບບ​ສີ­ຂຽວ​ຢ່າງ​ເປັນ​ຮູບ​ປະ​ທຳ.

    ສຳ​ມະ​ນາ​ຄັ້ງ​ນີ້ ຍັງ​ໄດ້​ມີ​ການ​ປຶກ­ສາ​ຫາ­ລື ແລະ ແລກ­ປ່ຽນ​ຄວາມ​ຄິດ​ເຫັນ​ຈາກ​ຜູ້​ຊ່ຽວ­ຊານ​ປະ­ເທດ​ກາ​ນາ​ດາ ແລະ ອົງ­ການ IFC ຜູ້­ຕາງ­ໜ້າ​ອາ­ວຸ­ໂສ​ຂອງ​ລັດ­ຖະ­ບານ ຜູ້​ດຳ­ເນີນ​ວຽກ​ງານ PPP ແລະ ຜູ້​ອອກ​ນະ­ໂຍ­ບາຍ ເພື່ອ​ແລກ­ປ່ຽນ​ຄວາມ​ຮູ້​ກ່ຽວ​ກັບ​ວິ­ທີ​ປະ­ຕິ­ບັດ​ວຽກ​ງານ PPPs ສາ­ມາດ​ເຮັດ​ໃຫ້​ວຽກ​ງານ​ນີ້ ເປັນ​ເຄື່ອງ­ມື​ທີ່​ມີ​ປະ​ສິດ­ທິ​ຜົນ​ໃນ​ການ​ລະ­ດົມ​ທຶນ​ຈາກ​ພາກ­ສ່ວນ​ເອ­ກະ​ຊົນ ພ້ອມ​ທັງ​ນຳ​ສະ­ເໜີ​ການ​ສຶກ​ສາ​ກໍ­ລະ­ນີ​ຈາກ​ເສດ­ຖະ­ກິດ​ທີ່​ກຳ­ລັງ​ພັດ­ທະ­ນາ​ໃນ​ລະ­ດັບ​ສູງ ກ່ຽວ​ກັບ​ການ​ຈັດ​ໂຄງ​ສ້າງ​ສາຍ​ສົ່ງ​ໄຟ­ຟ້າ ຂະ­ແໜງ​ການ­ທ່ອງ­ທ່ຽວ ແລະ ການ​ບໍ­ລິ­ການ​ສຸ­ຂະ­ພາບ ສິ່ງ​ດັ່ງ­ກ່າວ ຈະ​ສະ­ໜອງ​ຂໍ້​ມູນ​ໃນ​ຂັ້ນ​ຕອນ​ຕໍ່​ໄປ​ຂອງ​ລັດ­ຖະ­ບານ ເຊິ່ງ​ຈະ​ເປັນ​ບ່ອນ​ອີງ​ໃນ​ການ​ສ້າງ​ເປັນ​ແຜນ​ງານ​ກ່ຽວ​ກັບ PPP.

ຂ່າວທີ່ກ່ຽວຂ້ອງ