ບັນດາ​ປະເທດ EU ບັນລຸ​ຂໍ້​ຕົກລົງ​ເບື້ອງ​ຕົ້ນ​ກ່ຽວ​ກັບ​ການ​ຈຳກັດ​ການ​ປ່ອຍ​ແກ​​ັສ​ຈາກ​ລົດ​ຂົນສົ່ງ

375 25 ກ.ພ. 2019 ຂ່າວຕ່າງປະເທດ
ບັນດາ​ປະເທດ EU ບັນລຸ​ຂໍ້​ຕົກລົງ​ເບື້ອງ​ຕົ້ນ​ກ່ຽວ​ກັບ​ການ​ຈຳກັດ​ການ​ປ່ອຍ​ແກ​​ັສ​ຈາກ​ລົດ​ຂົນສົ່ງ

     ຫຼັງ​ຈາກ​ທີ່​ໄດ້​ເຈລະຈາ​ຢ່າງ​ເຄັ່ງ​ຕຶງ​ມາ​ເປັນ​ເວລາ​ຫຼາຍ​ເດືອນ ເມື່ອ​ວັນ​ທີ 19 ກຸມພາ​ຜ່ານ​ມາ ລັດ​ຖະ​ສະພາ​ເອີ​ຣົບ ແລະ ສະພາ​ເອີ​ຣົບ ຊຶ່ງ​ເປັນ​ຕົວ​ແທນ​ໃຫ້​ແກ່ 28 ປະເທດ​ສະມາຊິກ​ສະຫະພາບ​ເອີ​ຣົບ (EU) ກໍ​ໄດ້​ລົງ​ນາມ​ຂໍ້​ຕົກລົງ​ໃໝ່​ສະບັບ​ໜຶ່ງ ກ່ຽວ​ກັບ​ການ​ຈຳກັດ​ປະລິມານ​ການ​ປ່ອຍ​ແກ​​ັສ CO2 ຈາກ​ລົດ​ຂົນສົ່ງ.

  ຂໍ້​ຕົກລົງ​ເບື້ອງ​ຕົ້ນ​ນັ້ນ​ລະບຸ​ວ່າ ປະລິມານ​ແກ​​ັສ CO2 ທີ່​ປ່ອຍ​ອອກ​ມາ​ຈາກ​ລົດ​ຂົນສົ່ງ​ຂະໜາດ​ໜັກ ຈະ​ຫຼຸດ​ລົງ 15% ພາຍ​ໃນ​ປີ 2025 ແລະ​ຫຼຸດ​ລົງ  30% ພາຍ​ໃນ​ປີ 2030 ເມື່ອ​ທຽບໃສ່​ລະດັບ​ກຳນົດ​ຂອງ​ປີ 2019.

   ລະດັບ​ການ​ຈຳກັດ​ດັ່ງກ່າວ ມີ​ບົດບາດ​ສຳຄັນ​ຢູ່​ໃນ​ຄວາມ​ພະຍາຍາມ​ຂອງ EU ເພື່ອ​ໃຫ້​ບັນລຸ​ບັນດາ​ຄາດໝາຍ​ທີ່​ໃຫ້​ສັນຍາ​ໄວ້​ຢູ່​ໃນ​ສັນຍາ​ປາ​ຣີ ກ່ຽວ​ກັບ​ການ​ປ່ຽນແປງ​ສະພາບ​ດິນ​ຟ້າ​ອາກາດ ຊຶ່ງ​ຕາມ​ນັ້ນແລ້ວ​ກໍ​ແມ່ນ​ຫຼຸດ​ການ​ປ່ອຍ​ແກ​​ັສ ທີ່​ພາໃຫ້​ເກີດ​ປະກົດ​ການເຮືອນ​ແກ້ວ​ລົງ​ຢ່າງ​ໜ້ອຍ 40% ພາຍ​ໃນ​ປີ 2030 ເມື່ອ​ທຽບໃສ່​ລະດັບ​ຂອງ​ປີ 1990.

   ຕາມ​ການ​ກຳນົດ​ແລ້ວ ຂໍ້​ຕົກລົງ​ດັ່ງກ່າວ ຍັງ​ຕ້ອງ​ໄດ້​ຮັບ​ການ​ຮັບຮອງ​ຢ່າງ​ເປັນ​ທາງ​ການ ຈາກ​ສະພາ​ເອີ​ຣົບ ແລະ​ບັນດາ​ສະມາຊິກ​ລັດ​ຖະ​ສະພາ​ເອີ​ຣົບ ກ່ອນ​ທີ່​ຈະ​ມີ​ການ​ເລືອກ​ຕັ້ງ​ລັດ​ຖະ​ສະພາ​ເອີ​ຣົບ ພາຍ​ໃນ​ເດືອນ​ພຶດສະພາ​ໜ້າ​ນີ້.

    ມາ​ຮອດ​ເວລາ​ນີ້ 180 ປະເທດ ທີ່​ໄດ້​ລົງ​ນາມ​ສັນຍາ​ປາ​ຣີ ວ່າ​ດ້ວຍ​ການ​ປ່ຽນແປງ​ສະພາບ​ດິນ​ຟ້າ​ອາກາດ ຫາ​ກໍ​ປະຕິບັດ​ການ​ຕັດ​ຫຼຸດ​ປະລິມານ​ການ​ປ່ອຍ​ແກ​​ັສ CO2 ໄດ້ 1/3 ຂອງ​ປະລິມານ​ທີ່​ຈຳເປັນ ເພື່ອ​ຄວບ​ຄຸມ​ລະດັບ​ເພີ່ມ​ຂຶ້ນ​ຂອງ​ອຸ່ນ​ຫະ​ພູມ​ໂລກ ໃຫ້​ຢູ່​ຕ່ຳ​ກວ່າ​ແດນ 1,5 ອົງສາ C ເມື່ອ​ຮອດ​ປີ 2020.

 

ຂ່າວທີ່ກ່ຽວຂ້ອງ