ຂ່າວຫຼ້າສຸດ

ຊ່ຽວຊານ​ແຈ້ງ​ເຕືອນ​ລະດັບ​ສີແດງ ຕໍ່​ລະບົບ​ແມ່ນ້ຳ​ດາ​ລິງ ໃນ​ອົດ​ສະ​ຕຣາ​ລີ

437 25 ກ.ພ. 2019 ຂ່າວຕ່າງປະເທດ
ຊ່ຽວຊານ​ແຈ້ງ​ເຕືອນ​ລະດັບ​ສີແດງ ຕໍ່​ລະບົບ​ແມ່ນ້ຳ​ດາ​ລິງ ໃນ​ອົດ​ສະ​ຕຣາ​ລີ

     ບັນດາ​ນັກວິທະຍາສາດ​ຂອງ​ອົດ​ສະ​ຕຣາ​ລີ ໄດ້​ມີ​ຄຳ​ແຈ້ງ​ເຕືອນ​ອອກ​ມາ​ວ່າ ແມ່ນ້ຳ​ດາ​ລິງ (Darling) ທີ່​ມີ​ບົດບາດ​ສຳຄັນ ໃນ​ການ​ສະໜອງ​ນ້ຳ​ໃຫ້​ແກ່​ປະເທດ​ດັ່ງກ່າວ ພວມ​ປະ​ເຊີນ​ກັບ​ຄວາມ​ສ່ຽງ​ຫາຍ​ຕົວ​ໄປ ​ຖ້າ​ຫາ​ກວ່າ​ເງື່ອນໄຂ​ດ້ານ​ສິ່ງແວດລ້ອມ ບໍ່​ໄດ້​ຮັບ​ການ​ແກ້​ໄຂ​ພາຍ​ໃນ​ເວລາ 6 ເດືອນ.

   ຫຼັງ​ຈາກ​ທີ່​ເກີດ​ມີ​ສະພາບ​ປາ​ຕາຍ​ພາບ​ກັນ​ເປັນ​ຈຳນວນ​ຫຼາຍ​ມາ​ແລ້ວ 3 ງວດ ພາຍ​ໃນ​ເດືອນ​ທັນວາ ປີ 2018 ແລະ ໃນ​ເດືອນ​ມັງກອນ​ປີ 2019 ຢູ່​ໃນ​ເຂດ​ລົ່ງ​ແມ່ນ້ຳ ມູ​ເຣ-ດາ​ລິງ (Murray-Darling) ທີ່​ມີ​ຄວາມ​ຍາວ​ຫຼາຍ​ກີ​ໂລ​ແມັດ ໄຫຼ​ຜ່ານ​ລັດ​ຕ່າງໆ ແລະ​ສະໜອງ​ສະບຽງ​ອາຫານ ທີ່​ອຸດົມສົມບູນ​ໃຫ້​ແກ່​ອົດ​ສະ​ຕຣາ​ລີ ນັ້ນ​ໄດ້​ຖືກ​ຕິດຕາມ​ກວດກາ. ເຈົ້າ​ໜ້າທີ່​ອົດ​ສະ​ຕຣາ​ລີ ຢືນຢັນ​ວ່າ ສາເຫດ​ທີ່​ເຮັດ​ໃຫ້​ປາ​ຕາຍ​ພາບ​ກັນ​ເປັນ​ຈຳນວນ​ຫຼາຍ ຢູ່​ໃນ​ແມ່ນ້ຳ​ດາ​ລິງ ແມ່ນ​ເປັນ​ຍ້ອນ​ປະລິມານ​ນ້ຳ ແລະ ລະດັບ​ໂອ​ຊີ​ໃນ​ນ້ຳ​ມີ​ຕ່ຳ ຍິ່ງ​ໄປ​ກວ່າ​ນັ້ນ ອາດ​ເປັນ​ຍ້ອນ​ສະ​ຫຼ່າຍ​ເປັນ​ພິດ.

    ກ່ອນ​ໜ້າ​ນີ້ ເມື່ອ​ປີ 2014 ທາງ​ການ​ອົດ​ສະ​ຕຣາ​ລີ ໄດ້​ຜັນ​ຂະຫຍາຍ​ແຜນການ​ລົ່ງ​ແມ່ນ້ຳ ມູ​ເຣ-ດາ​ລິງ ເພື່ອ​ຄວບ​ຄຸມ​ປະລິມານ​ນ້ຳ ແລະ ​ລະດັບ​ການ​ນຳ​ໃຊ້​ລຽບ​ຕາມ​ລວງ​ຍາວ​ຂອງ​ແມ່ນ້ຳ ທີ່​ໄຫຼ​ຜ່ານ 5 ລັດ ແລະ ເຂດ​ແຄວ້ນ​ຂອງ​ອົດ​ສະ​ຕຣາ​ລີ.

    ບັນດາ​ນັກ​ເຄື່ອນ​ໄຫວ​ດ້ານ​ສິ່ງແວດລ້ອມ ແລະ ປະຊາຊົນ​ທີ່​ອາ​ໃສ​ຢູ່​ລຽບ​ຕາມ​ຕອນ​ໃຕ້​ລົ່ງ​ແມ່ນ້ຳ​ມູ​ເຣ-ດາ​ລິງ ໄດ້​ຕິຕຽນ​ຕໍ່​ການ​ນຳ​ໃຊ້​ນ້ຳ ໃຫ້​ແກ່​ການເຄື່ອນໄຫວ​ທາງ​ດ້ານ​ກະສິກຳ ໃນ​ນັ້ນ​ມີ​ບັນດາ​ຟາມ​ຜະລິດ​ຝ້າຍ ຢູ່​ໃນ​ລັດ ກວິນ​​ສ​ແລນ ແລະ​ລັດ ນີວ ເຊົາ​ແວ​​ລ. ເຖິງ​ຢ່າງໃດ​ກໍ​ຕາມ ອຳນາດ​ການ​ປົກຄອງ​ສ່ວນ​ກາງ​ພັດ​ເຫັນ​ວ່າ ຜົນ​ກະທົບ​ຂອງ​ໄພ​ແຫ້ງແລ້ງ ແລະ ອາກາດ​ຮ້ອນ​ເປັນ​ປະຫວັດ​ການ​ໃນ​ລະດູແລ້ງ​ຢູ່​ທາງ​ພາກ​ໃຕ້ ເປັນ​ສາເຫດ​ເຮັດ​ໃຫ້ ລະດັບ​ນ້ຳ​ມີ​ຕ່ຳ​ຢູ່​ໃນ​ແມ່ນ້ຳ​ດາ​ລິງ.

 

ຂ່າວທີ່ກ່ຽວຂ້ອງ