ຂ່າວຫຼ້າສຸດ

ຜູ້ນຳ​ຣັດ​ເຊຍ ໃຫ້​ຄວາມ​ເອົາໃຈໃສ່​ຕໍ່​ການ​ດຳລົງ​ຊີວິດ​ຂອງ​ປະຊາຊົນ

332 25 ກ.ພ. 2019 ຂ່າວຕ່າງປະເທດ
ຜູ້ນຳ​ຣັດ​ເຊຍ ໃຫ້​ຄວາມ​ເອົາໃຈໃສ່​ຕໍ່​ການ​ດຳລົງ​ຊີວິດ​ຂອງ​ປະຊາຊົນ

     ໃນ​ຖະແຫຼງການ​ປະຈຳ​ປີ 2019 ຊຶ່ງ​ປະທານາທິບໍດີ ວາ​ລາ​ດີ​ເມຍ ປູ​ຕິນ ຜູ້ນຳ​ຣັດ​ເຊຍ ອ່ານ​ໄປ​ເມື່ອ​ວັນ​ທີ 20 ກຸມພາ​ທີ່​ຜ່ານ​ມາ​ນັ້ນ ໄດ້​ເນັ້ນ​ໜັກ​ວ່າ ໃນ​ປີ 2019 ປະຊາຊົນ​ຣັດ​ເຊຍ​ຄວນ​ຕ້ອງ​ຮູ້ສຶກ​ໄດ້​ວ່າ ຊີວິດ​ການ​ເປັນ​ຢູ່​ໄດ້​ຮັບ​ການ​ແກ້​ໄຂ​ດີ​ຂຶ້ນ ຍ້ອນ​ການ​ປະຕິບັດ​ບັນດາ​ໂຄງການ​ແຫ່ງ​ຊາດ ແລະ ອີງ​ໃສ່​​ການ​ຕີ​ລາຄາ​ຂອງ​ປະຊາຊົນ. ປະທານາທິບໍດີ ປູ​ຕິນ ໄດ້​ເນັ້ນ​ໜັກ​ວ່າ ໃນ​ຖະແຫຼງການ​ເທື່ອ​ນີ້ ເປັນ​ການ​ສຸມ​ໃສ່​ບັນດາ​ບັນຫາ​ການ​ພັດທະນາ​ເສດຖະກິດ-ສັງຄົມ ຂອງ​ປະເທດ​ຣັດ​ເຊຍ.

ປະທານາທິບໍດີ ປູ​ຕິນ ຖະແຫຼງ​ວ່າ ປະເທດ​ຣັດ​ເຊຍ ຕ້ອງ​ໄດ້​ກ້າວ​ໄປ​ດ້ານ​ໜ້າ ເພີ່ມ​ທະວີ​ຈັງຫວະ​ການ​ພັດທະນາ ຊຶ່ງ​ກ່ອນ​ອື່ນ​ໝົດ ລັດຖະບານ​ຄວນ​ຮັບຜິດຊອບ ກ່ຽວ​ກັບ​ການ​ປ່ຽນແປງ​ທີ່​ດີ ກວ່າ​ຢູ່​ພາຍ​ໃນ​ປະເທດ. ສິ່ງ​ທີ່​ສຳຄັນ​ສຳລັບ​ປະຊາຊົນ ກໍ​ແມ່ນ​ສິ່ງ​ທີ່​ເຮັດ​ໄດ້ ແລະ​ສິ່ງ​ນັ້ນ​ເປັນ​ການ​ແກ້​ໄຂ​ຊີວິດ​ການ​ເປັນ​ຢູ່​ຂອງ​ເຂົາເຈົ້າ ແລະ ຄອບຄົວ​ໃຫ້​ດີ​ຂຶ້ນ​ຄື​ແນວໃດ​ຢູ່​ໃນ​ເວລາ​ນີ້.

   ທ່ານ ປູ​ຕິນ ໄດ້​ສະເໜີ​ໃຫ້​ຫຼຸດ​ພາສີ​ອະສັງຫາລິມະ​ຊັບ ຕໍ່​ຄອບຄົວ​ທີ່​ມີ​ລູກ​ຫຼາຍ​ຄົນ  ແລະ ບັນດາ​ຄອບຄົວ​ທີ່​ມີ​ລູກ 3 ຄົນ​ຂຶ້ນ​ໄປ ຈະ​ໄດ້​ຮັບ​ຄວາມ​ຊ່ວຍເຫຼືອ​ເພີ່ມ​ເຕີມ​ຈາກ​ງົບປະມານ ຂອງ​ສ່ວນ​ກາງ. ລັດຖະບານ ແລະ​ທະນາຄານ​ກາງ​ຣັດ​ເຊຍ ຄວນ​ນຳ​ເອົາ​ໂຄງການ​ຊ່ວຍເຫຼືອ​ອອກ​ມາ ໃນ​ການ​ກໍ່ສ້າງ​ເຮືອນ​ຢູ່​ຂອງ​ບຸກຄົນ ພ້ອມ​ທັງ​ຄວນ​ອຳນວຍ​ຄວາມ​ສະດວກ ເພື່ອ​ໃຫ້​ບັນດາ​ຄອບຄົວ ບໍ່​ສະເພາະ​ແຕ່​ຊື້​ເຮືອນ​ທີ່​ກໍ່ສ້າງ​ແລ້ວ​ເທົ່າ​ນັ້ນ ຫາກ​ຍັງ​ກໍ່ສ້າງ​ເຮືອນ​ຢູ່​ເທິງ​ຜືນ​ດິນ​ຂອງ​ຕົນ​ດ້ວຍ. ໃນ​ຂະນະ​ດຽວ​ກັນ ກໍ​ຕ້ອງ​ໄດ້​ປະກອບ​ຕື່ມ​ອີກ 90.000 ທີ່ ຢູ່​ໃນ​ເຮືອນ​ລ້ຽງ​ເດັກ​ແຫ່ງ​ຕ່າງໆ ພາຍ​ໃນ​ປີ 2019. ພ້ອມ​ກັນ​ນັ້ນ ປະທານາທິບໍດີ ປູ​ຕິນ ກໍ​ຫວັງ​ວ່າ ການ​ເພີ່ມ​ປະຊາກອນ​ຂອງ​ຣັດ​ເຊຍ ໃນ​ໄລຍະ​ປີ 2023-2024 ຈະ​ໄດ້​ຮັບ​ການ​ຟື້ນ​ຟູ.

ທ່ານ ປູ​ຕິນ ໄດ້​ສະເໜີ​ຫຼຸດ​ພາສີ​ໃຫ້​ແກ່​ບັນດາ​ບໍລິສັດ​ກໍ່ສ້າງ ສຳລັບ​ບັນດາ​ກິດຈະການ ທາງ​ສັງຄົມ ທີ່​ໄດ້​ສົ່ງ​ມອບ​ໃຫ້​ແກ່​ລັດ ເພື່ອ​ຊຸກຍູ້​ການ​ພັດທະນາ​ຕົວ​ເມືອງ ແລະ ບ້ານ​ຕ່າງໆ. ທ່ານ ປູ​ຕິນ ໄດ້​ມອບ​ໜ້າທີ່​ອອກ​ມາ​ວ່າ​ເມື່ອ​ຮອດ​ທ້າຍ​ປີ 2020 ປະຊາຊົນ​ຣັດ​ເຊຍ ຄວນ​ເຂົ້າ​ເຖິງ ການ​ບໍລິການ​ດ້ານ​ສາທາລະນະ​ສຸກ ຢູ່​ໃນ​ທຸກໆ​ເຂດ​ຂອງ​ປະເທດ ໃນ​ຂະນະ​ທີ່​ການ​ຫັນ​ຂົງເຂດ ສາທາລະນະ​ສຸກ​ສູ່​ດີ​ຈີ​ຕາ​​ລ ຄວນ​ໄດ້​ຮັບ​ການ​ປະຕິບັດ​ພາຍ​ໃນ​ຮອບ​ເວລາ 3 ປີ.

ຂ່າວທີ່ກ່ຽວຂ້ອງ