ຂ່າວຫຼ້າສຸດ

ລາວ-ຈີນ ເສີມຂະຫຍາຍສາຍພົວພັນຄູ່ຮ່ວມຍຸດທະສາດ

432 22 ກ.ພ. 2019 ຂ່າວໜ້າ​ໜຶ່ງ
ລາວ-ຈີນ ເສີມຂະຫຍາຍສາຍພົວພັນຄູ່ຮ່ວມຍຸດທະສາດ

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ ໜິງ ຈີ​ເຈີ ຮອງ​ປະ­ທານ​ຄະ­ນະ​ກຳ­ມະ­ການ​ພັດ­ທະ­ນາ ແລະ ປະ­ຕິ​ຮູບ​ແຫ່ງ​ຊາດ​ຈີນ ພ້ອມ​ຄະ­ນະ ວັນ​ທີ 20 ກຸມ­ພາ 2019 ຢູ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໃນ​ໂອ­ກາດ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ວັນ​ທີ 19-20 ກຸມ­ພາ​ນີ້.

    ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ ກໍ​ໄດ້​ຕີ​ລາ­ຄາ​ສູງ​ຕໍ່​ການ​ເຂົ້າ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ຂອງ​ທ່ານ ໜິງ ຈີ​ເຈີ ພ້ອມ​ຄະ­ນະ ເຊິ່ງ​ເປັນ​ການ​ເສີມ​ຂະ­ຫຍາຍ​ມິດ­ຕະ­ພາບ​ອັນ​ເປັນ​ມູນ­ເຊື້ອ ແລະ ສາຍ​ພົວ­ພັນ​ແບບ​ຄູ່​ຮ່ວມ​ຍຸດ​ທະ​ສາດ​ຮອບ­ດ້ານ ບົນ​ຈິດ­ໃຈ 4 ດີ ລະ­ຫວ່າງ ລາວ-ຈີນ ພ້ອມ​ທັງ​ໄດ້​ຕີ​ລາ­ຄາ​ສູງ​ຕໍ່​ການ​ຮ່ວມ​ມື​ດ້ານ​ຕ່າງໆ ໂດຍ​ສະ­ເພາະ​ດ້ານ​ເສດ­ຖະ­ກິດ ການ​ຄ້າ ແລະ ການ​ລົງ­ທຶນ ລະ­ຫວ່າງ ລາວ-ຈີນ ໄດ້​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ແລະ ນັບ​ມື້​ເພີ່ມ​ຂຶ້ນ ປະ­ກອບ­ສ່ວນ​ສຳ­ຄັນ ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ລາວ ໃນ​ໄລ­ຍະ​ຜ່ານ​ມາ ປັດ­ຈຸ­ບັນ ຈີນ​ຈັດ​ຢູ່​ອັນ​ດັບ 1 ຂອງ​ການ​ລົງ­ທຶນ​ຕ່າງ­ປະ­ເທດ​ຢູ່​ລາວ ມີ 777 ໂຄງ­ການ ມູນ​ຄ່າ 11 ຕື້​ກວ່າ​ໂດ​ລາ​ສະ­ຫະ­ລັດ ສະ­ເພາະ​ປີ 2018 ການ​ຄ້າ​ລະ­ຫວ່າງ​ສອງ​ຝ່າຍ​ບັນ­ລຸ 3 ຕື້​ກວ່າ​ໂດ​ລາ​ສະ­ຫະ­ລັດ ເພີ່ມ​ຂຶ້ນ 17% ການ­ທ່ອງ­ທ່ຽວ​ບັນ­ລຸ 800.000 ກວ່າ​ຄົນ ເພີ່ມ​ຂຶ້ນ 25%.

    ພັກ-ລັດ­ຖະ­ບານ ສປ ຈີນ ຍັງ​ໄດ້​ໃຫ້­ການ​ຊ່ວຍ­ເຫຼືອ ສປປ ລາວ ດ້ວຍ​ຫຼາຍ​ຮູບ​ການ ລວມ​ທັງ​ການ​ຊ່ວຍ­ເຫຼືອ​ລ້າ ແລະ ເງິນ​ກູ້​ປະ­ເພດ​ຕ່າງໆ​ເປັນ​ຈຳ­ນວນ​ຫຼວງ­ຫຼາຍ ພິ­ເສດ ໃນ​ເວ­ລາ​ມາ​ຢາມ​ລັດ​ຖະ​ກິດ​ຢູ່ ສປປ ລາວ ຂອງ​ສະ­ຫາຍ ສີ ຈິ້ນ​ຜິງ ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ສປ ຈີນ ໃນ​ທ້າຍ​ປີ 2017 ກໍ​ໄດ້​ປະ­ກາດ​ໃຫ້­ການ​ຊ່ວຍ­ເຫຼືອ​ລ້າ​ແກ່​ລາວ ແຕ່​ປີ 2018-2020 ຈຳ­ນວນ 4 ຕື້​ຢວນ ເພື່ອ​ຈັດ​ຕັ້ງ​ປະ­ຕິ­ບັດ 8 ໂຄງ­ການ​ໃຫຍ່ ນອກ​ນີ້ ຝ່າຍ​ຈີນ​ຍັງ​ໄດ້​ຕົກ­ລົງ​ຊ່ວຍ­ເຫຼືອ​ລ້າ 250 ລ້ານ​ຢວນ ແກ່​ຝ່າຍ​ລາວ ເພື່ອ​ສ້າງ​ບ້ານ​ຈັດ​ສັນ​ໃຫ້​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ​ຈາກ​ໂຄງ­ການ​ທາງ​ລົດ­ໄຟ ລາວ-ຈີນ ແລະ ເງິນ​ກູ້​ຈຳ­ນວນ​ໜຶ່ງ ເພື່ອ​ແກ້​ໄຂ​ວຽກ​ງານ​ນີ້​ຕື່ມ​ອີກ ນອກ​ນີ້​ຍັງ​ໄດ້​ສະ­ເໜີ​ບາງ​ຄຳ​ເຫັນ ເປັນ­ຕົ້ນ ກ່ຽວ​ກັບ​ແຜນ​ແມ່​ບົດ​ແລວ​ທາງ​ເສດ­ຖະ­ກິດ ລາວ-ຈີນ ໄດ້​ສະ­ເໜີ​ໃຫ້​ສອງ​ຝ່າຍ ສ້າງ​ກົນ​ໄກ​ທີ່​ສາ­ມາດ​ຕິດ­ຕໍ່​ປະ­ສານ​ງານ​ກັນ​ໄດ້​ຢ່າງ​ສະ­ດວກ ເປີດ​ອົກ​ເປີດ​ໃຈ ຊ່ວຍ­ເຫຼືອ​ກັນ​ຢ່າງ​ຈິງ​ຈັງ ສູ້​ຊົນ​ໃຫ້​ສອງ​ຝ່າຍ​ສາ­ມາດ​ເປັນ​ເອ­ກະ​ພາບ ແລະ ໄດ້​ເຊັນ​ແຜນ​ແມ່​ບົດ​ນຳ​ກັນ ໃນ​ໂອ­ກາດ​ການ​ນຳ​ຂັ້ນ​ສູງ​ພົບ​ປະ­ກັນ​ໃນ​ທ້າຍ​ເດືອນ​ເມ­ສາ 2019 ແລະ ສະ­ເໜີ​ໃຫ້​ຝ່າຍ​ຈີນ ມີ​ຄະ­ນະ​ຄົ້ນ­ຄວ້າ​ມາ​ຊ່ວຍ​ຝ່າຍ​ລາວ​ຢູ່​ລາວ ເຊິ່ງ​ຈະ​ຊ່ວຍ​ເຮັດ​ໃຫ້​ແຜນ​ແທດ­ເໝາະ​ກັບ​ສະ­ພາບ​ຕົວ​ຈິງ ພາຍ­ຫຼັງ​ທີ່​ແຜນ​ແມ່​ບົດ​ແລວ​ທາງ​ເສດ­ຖະ­ກິດ ລາວ-ຈີນ ໄດ້​ເຊັນ​ກັນ​ແລ້ວ ສະ­ເໜີ​ໃຫ້​ຝ່າຍ​ຈີນ​ສົ່ງ​ຄະ­ນະ​ຄົ້ນ­ຄວ້າ​ມາ​ຊ່ວຍ​ຝ່າຍ​ລາວ ເພື່ອ​ພ້ອມ​ກັນ​ຄົ້ນ­ຄວ້າ​ສ້າງ​ແຜນ​ພັດ­ທະ­ນາ​ລົງ​ເລິກ​ສະ­ເພາະ​ແຕ່​ລະ​ດ້ານ ກ່ຽວ​ກັບ​ສັນ­ຍາ​ຄວາມ​ສາ­ມາດ​ການ​ຜະ­ລິດ ແລະ ການ​ລົງ­ທຶນ ສະ­ເໜີ​ໃຫ້​ຝ່າຍ​ຈີນ ລົງ​ເລິກ​ກຳ­ນົດ​ໂຄງ­ການ​ທີ່​ຝ່າຍ​ລາວ​ມີ​ທ່າ­ແຮງ​ໄດ້​ປຽບ ທັງ​ແທດ­ເໝາະ​ກັບ​ຄວາມ​ສາ­ມາດ​ລົງ­ທຶນ​ຂອງ​ຝ່າຍ​ຈີນ ສຳ­ຄັນ​ແມ່ນ​ສາ­ມາດ​ຕີ​ຕະ­ຫຼາດ​ຢູ່​ຈີນ ແລະ ປະ­ເທດ​ອ້ອມ​ຂ້າງ ສະ­ເໜີ​ໃຫ້​ມີ​ການ​ກຳ­ນົດ​ນະ­ໂຍ­ບາຍ​ຈະ­ແຈ້ງ​ຕື່ມ ເພື່ອ​ດຶງ​ດູດ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ໂຄງ­ການ​ໃນ​ບັນ­ຊີ​ໃຫ້​ໄດ້​ຫຼາຍ ແລະ ມີ​ປະ​ສິດ­ທິ​ຜົນ ນຳ​ເອົາ​ຜົນ​ປະ­ໂຫຍດ​ມາ­ສູ່​ສອງ​ຝ່າຍ ສຳ­ລັບ​ການ​ຄ້າ ແລະ ໂກ​ຕ້າ​ສິນ­ຄ້າ​ສົ່ງ​ອອກ​ໄປ ສປ ຈີນ ສະ­ເໜີ​ໃຫ້​ຝ່າຍ​ຈີນ ສືບ­ຕໍ່​ໃຫ້​ໂກ​ຕ້າ​ການ​ສົ່ງ​ເຂົ້າ​ລາວ​ໄປ ສປ ຈີນ ຕື່ມ​ອີກ ໂດຍ​ມີ​ນະ­ໂຍ­ບາຍ​ຍົກ­ເວັ້ນ​ພາ­ສີ ສະ­ເໜີ​ໃຫ້​ຝ່າຍ​ຈີນ ພິ­ຈາ­ລະ­ນາ​ຊ່ວຍ​ໃຫ້​ໂກ​ຕ້າ​ສິນ­ຄ້າ​ອຸດ­ສາ­ຫະ­ກຳ​ປຸງ​ແຕ່ງ​ສຳ­ເລັດ​ຮູບ​ຕ່າງໆ ໂດຍ​ມີ​ນະ­ໂຍ­ບາຍ​ພິ­ເສດ​ໃນ​ການ​ໃຫ້​ໂກ​ຕ້າ ແລະ ຫຼຸດ­ຜ່ອນ​ພາ­ສີ​ສົ່ງ​ອອກ​ໄປ​ຈີນ ເພື່ອ​ຊ່ວຍ​ສົ່ງ­ເສີມ​ອຸດ­ສາ­ຫະ­ກຳ​ປຸງ​ແຕ່ງ​ຂອງ​ລາວ ທັງ​ຊ່ວຍ​ຊຸກ­ຍູ້​ການ​ຮ່ວມ​ມື​ຄວາມ​ສາ­ມາດ​ການ​ຜະ­ລິດ​ຂອງ​ສອງ​ຝ່າຍ ສາ­ມາດ​ຊຸກ­ຍູ້​ການ​ລົງ­ທຶນ ແລະ ຍັງ​ສາ­ມາດ​ເພີ່ມ​ມູນ​ຄ່າ​ການ​ຄ້າ​ຂອງ​ສອງ​ຝ່າຍ​ໃຫ້​ຫຼາຍ​ຂຶ້ນ​ໃນ­ຕໍ່­ໜ້າ.

ຂ່າວທີ່ກ່ຽວຂ້ອງ