ຂ່າວຫຼ້າສຸດ

ສະຫຼອງວັນສ້າງຕັ້ງສາຍພົວພັນການທູດ ລາວ-ສິງກະໂປ ຄົບຮອບ 45 ປີ

278 22 ກ.ພ. 2019 ຂ່າວໜ້າ​ໜຶ່ງ
ສະຫຼອງວັນສ້າງຕັ້ງສາຍພົວພັນການທູດ ລາວ-ສິງກະໂປ ຄົບຮອບ 45 ປີ

    ສະ­ຖານ​ເອກ​ອັກ​ຄະ​ລັດ​ຖະ​ທູດ​ສິງ­ກະ­ໂປ ປະ­ຈຳ ສປປ ລາວ ຈັດ​ງານ​ສະ­ແດງ​ສິ­ລະ​ປະ​ເຕັ້ນ​ບາ​ເລ້ ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ສາຍ​ພົວ­ພັນ​ການ​ທູດ ລາວ-ສິງ­ກະ­ໂປ ຄົບ­ຮອບ 45 ປີ ຂຶ້ນ​ວັນ​ທີ 20 ກຸມ­ພາ 2019 ຢູ່​ຫໍ​ວັດ­ທະ­ນະ­ທຳ​ແຫ່ງ​ຊາດ ໂດຍ​ມີ​ທ່ານ ເອກ​ສະ­ຫວ່າງ ວົງ​ວິ­ຈິດ ປະ­ທານ​ຄະ­ນະ​ກຳ­ມາ​ທິ​ການ​ການ​ຕ່າງ­ປະ­ເທດ ສະ­ພາ​ແຫ່ງ​ຊາດ ທ່ານ ບົວ​ເງິນ ຊາ​ພູ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ທ່ານ ດໍ​ເມີ​ນິກ ໂກ ເອກ​ອັກ​ຄະ​ລັດ​ຖະ​ທູດ​ສິງ­ກະ­ໂປ ປະ­ຈຳ ສປປ ລາວ ພ້ອມ​ດ້ວຍ​ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ ດໍ​ເມີ​ນິກ ໂກ ກ່າວ​ວ່າ: ຂ້າ­ພະ­ເຈົ້າ ມີ​ຄວາມ​ພາກ­ພູມ​ໃຈ​ຫຼາຍ ແລະ ຖື​ເປັນ​ກຽດ​ນຳ​ສະ­ເໜີ​ນັກ​ເຕັ້ນ​ບາ​ເລ້​ຈາກ​ໂຮງ​ລະ­ຄອນ​ເຕັ້ນ​ບາ​ເລ້​ສິງ­ກະ­ໂປ ມາ​ສະ­ແດງ​ໃນ​ຄັ້ງ​ນີ້ ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ສາຍ​ພົວ­ພັນ​ການ​ທູດ ລາວ-ສິງ­ກະ­ໂປ ຄົບ­ຮອບ 45 ປີ ໂຮງ​ລະ­ຄອນ​ເຕັ້ນ​ບາ​ເລ້​ສິງ­ກະ­ໂປ ເປັນ​ບໍ­ລິ­ສັດ​ເຕັ້ນ​ບາ​ເລ້​ທີ່​ມີ​ຊື່​ສຽງ​ໂດ່ງ​ດັງ ແລະ ໄດ້​ສະ­ແດງ​ເຕັ້ນ​ບາ​ເລ້​ໃນ​ທົ່ວ​ໂລກ ເຊັ່ນ: ຈີນ ຮົງ​ກົງ ອົດ​ສະ​ຕຣາ​ລີ ຝຣັ່ງ ສ ອາ​ເມ​ຣິ​ກາ ແລະ ອັງ­ກິດ ການ­ສະ­ແດງ​ຄັ້ງ​ນີ້ ແມ່ນ​ສະ­ແດງ​ໃຫ້​ເຫັນ​ວັດ­ທະ­ນະ­ທຳ​ອັນ​ຫຼວງ­ຫຼາຍ​ຂອງ​ສິງ­ກະ­ໂປ ແລະ ເປັນ​ການ​ແລກ­ປ່ຽນ​ວັດ­ທະ­ນະ­ທຳ ລະ­ຫວ່າງ ລາວ-ສິງ­ກະ­ໂປ ໃຫ້​ບັນ­ດາ​ທ່ານ​ຮັບ​ຊົມ​ການ­ສະ­ແດງ​ຢ່າງ​ມ່ວນ­ຊື່ນ.

    ງານ​ສະ­ແດງ​ຄັ້ງ​ນີ້ ປະ­ກອບ​ມີ​ການ​ປະ­ສົມ​ປະ­ສານ​ທີ່​ຫຼວງ­ຫຼາຍ ເຊິ່ງ​ເປັນ​ຜົນ­ງານ​ເກົ່າ​ແກ່​ທີ່​ສຸດ​ຂອງ​ທ່ານ ຈູ ຊັນ ສຽງ ໃນ​ຍາມ​ຄ່ຳ​ຄືນ ໂດຍ​ທ່ານ ທີມ ຣັດ​ສ​ເຕິນ ຫິ­ມະ​ສີ­ຟ້າ ຂອງ​ທ່ານ ໂຕ​ຣຸ ຊີ​ມາ​ຊາ​ກິ ບົດ​ສະ­ແດງ​ເຕັ້ນ​ບາ​ເລ້​ໃນ​ເທື່ອ​ນີ້ ແມ່ນ​ຄື​ກັບ​ການ​ອ່ານ​ປຶ້ມ​ເລື່ອງ ທີ່​ເລົ່າ​ເລື່ອງ​ປະ­ຫວັດ​ຄວາມ​ເປັນ​ມາ ແລະ ໄລ­ຍະ​ທາງ​ຂອງ​ໂຮງ​ລະ­ຄອນ​ເຕັ້ນ​ບາ​ເລ້​ສິງ­ກະ­ໂປ ເຮັດ​ໃຫ້​ພວກ​ເຮົາ​ມາ​ເຖິງ​ທຸກ​ວັນ​ນີ້ ນອກ​ນີ້ ຍັງ​ໄດ້​ຮັບ​ຊົມ​ສິ­ລະ​ປະ­ການ​ຟ້ອນ​ປະ­ສານ​ສຽງ​ລຳ ແລະ ສຽງ​ເພງ​ຂອງ​ໜ່ວຍ​ງານ​ສິ­ລະ​ປະ​ໂຮງ­ຮຽນ​ສິ­ລະ​ປະ​ແຫ່ງ​ຊາດ​ລາວ ຕື່ມ​ອີກ.

ຂ່າວທີ່ກ່ຽວຂ້ອງ