ຂ່າວຫຼ້າສຸດ

ອາ​ຣາ​ບີ ຊາ​ອຸ​ດິດ ຊອກ​ຫາ​ໂອກາດ​ລົງທຶນ 100 ຕື້​ໂດ​ລາ​ຢູ່​ໃນ​ອິນ​ເດຍ

346 22 ກ.ພ. 2019 ຂ່າວຕ່າງປະເທດ
ອາ​ຣາ​ບີ ຊາ​ອຸ​ດິດ ຊອກ​ຫາ​ໂອກາດ​ລົງທຶນ 100 ຕື້​ໂດ​ລາ​ຢູ່​ໃນ​ອິນ​ເດຍ

    ມົງ​ກຸດ​ລາດ​ຊະ​ກຸມມານ ມໍ​ຮາມ​ເມັດ ບິນ ຊາ​​ລ​ມານ ແຫ່ງ​ອາ​ຣາ​ບີ ຊາ​ອຸ​ດິດ ກ່າວ​ໃນ​ລະຫວ່າງ​ການ​ຢູ່​ຢ້ຽມຢາມ​ອິນ​ເດຍ ເມື່ອ​ວັນ​ທີ 20 ກຸມພາ​ນີ້​ວ່າ ປະເທດ​ຂອງ​ຕົນ​ພວມ​ມອງ​ເຫັນ​ໂອກາດ​ການ​ລົງທຶນ​ເປັນ​ມູນ​ຄ່າ 100 ຕື້ ໂດ​ລາ​ສະຫະລັດ ຢູ່​ໃນ​ອິນ​ເດຍ ໃນ​ຫຼາຍ​ຂົງເຂດ​ທີ່​ແຕກ​ຕ່າງ​ກັນ.

    ມົງ​ກຸດ​ລາດ​ຊະ​ກຸມມານ ມໍ​ຮາມ​ເມັດ ບິນ ຊາ​​ລ​ມານ ຍັງ​ແຈ້ງ​ໃຫ້​ຮູ້​ຢູ່​ໃນ​ກອງ​ປະຊຸມ ຖະແຫຼງ​ຂ່າວ​ຮ່ວມ​ກັບ​ນາຍົກລັດຖະມົນຕີ​ອິນ​ເດຍ ນາ​ເຣນ​ດຣາ ໂມ​ດີ ຊຶ່ງ​ຈັດ​ຂຶ້ນ​ຫຼັງ​ຈາກ​ທີ່ ຜູ້ນຳ​ທັງ​ສອງ​ໄດ້​ດຳເນີນ​ການ​ເຈລະຈາ​ວ່າ ອາ​ຣາ​ບີ ຊາ​ອຸ​ດິດ ໄດ້​ລົງທຶນ​ໄປ​ແລ້ວ  44 ຕື້​ໂດ​ລາ​ສະຫະລັດ ນັບ​ແຕ່​ຫຼັງ​ການ​ຢ້ຽມຢາມ ອາ​ຣາ​ບີ ຊາ​ອຸ​ດິດ ຂອງ​ນາຍົກລັດຖະມົນຕີ ໂມ​ດີ ເມື່ອ​ປີ 2016 ເປັນຕົ້ນ​ມາ ໂດຍ​ໄດ້​ລົງທຶນ​ຢູ່​ໃນ​ຂົງເຂດ​ເປ​ໂຕຣ​ເຄ​ມີ​ຂອງ​ອິນ​ເດຍ ແລະ ພວມ​ຫັນ​ລາຍການ ລົງທຶນ​ໃຫ້​ເປັນ​ຫຼາຍ​ຮູບ​ແບບ​ຢູ່​ໃນ​ຂົງເຂດ​ອື່ນໆ ເຊັ່ນ ພະລັງງານ ແລະ ການ​ຜະລິດ ພ້ອມ​ທັງ​ຄາດ​ວ່າ ການ​ລົງທຶນ​ຂອງ ອາ​ຣາ​ບີ ຊາ​ອຸ​ດິດ ຢູ່​ໃນ​ອິນ​ເດຍ ຈະ​ບັນລຸ 100 ຕື້ ໂດ​ລາ​ສະຫະລັດ ພາຍ​ໃນ​ສອງ​ປີ​ຕໍ່ໜ້າ.

    ນອກຈາກ​ນັ້ນແລ້ວ ມົງ​ກຸດ​ລາດ​ຊະ​ກຸມມານ ມໍ​ຮາມ​ເມັດ ບິນ ຊາ​​ລ​ມານ ກໍ​ໄດ້​ຍົກຍ້ອງ ກຳລັງ​ແຮງ​ຂອງ​ອິນ​ເດຍ ໃນ​ຂົງເຂດ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ແລະ​ໃຫ້​ຄວາມ​ໃສ່ໃຈ​ວ່າ ອາ​ຣາ​ບີ ຊາ​ອຸ​ດິດ ກໍ​ພວມ​ລົງທຶນ​ຢ່າງ​ແຮງ​ເຂົ້າ​ໃນ​ຂົງເຂດ​ນີ້.

ຂ່າວທີ່ກ່ຽວຂ້ອງ