ຂ່າວຫຼ້າສຸດ

ປະທານາທິບໍດີ ວາ​ລາ​ດີ​ເມຍ ປູ​ຕິນ ອ່ານ​ຖະແຫຼງການ​ປະຈຳ​ປີ 2019

395 22 ກ.ພ. 2019 ຂ່າວຕ່າງປະເທດ
ປະທານາທິບໍດີ ວາ​ລາ​ດີ​ເມຍ ປູ​ຕິນ ອ່ານ​ຖະແຫຼງການ​ປະຈຳ​ປີ 2019

    ວັນ​ທີ 20 ກຸມພາ​ນີ້ ປະທານາທິບໍດີ ວາ​ລາ​ດີ​ເມຍ ປູ​ຕິນ ຜູ້ນຳ​ຣັດ​ເຊຍ ໄດ້​ອ່ານ ຖະແຫຼງການ​ປະຈຳ​ປີ 2019 ຕໍ່​ສະພາ​ສະຫະພັນ ຊຶ່ງ​ມີ​ຂຶ້ນ​ທີ່​ວັງ ​ກົສ​ຕີ​ນີ ໂດຍ​ມີ​ຜູ້​ເຂົ້າ​ຮ່ວມ​ເກືອບ 1.000 ຄົນ. ນີ້​ເປັນ​ການ​ອ່ານ​ຖະແຫຼງການ​ເທື່ອ​ທຳ​ອິດ ໃນ​ການ​ດຳລົງ​ຕຳແໜ່ງ​ປະທານາທິບໍດີ ສະໄໝ​ທີ​ສີ່​ຂອງ​ທ່ານ ປູ​ຕິນ ແລະ ​ກໍ​ເປັນ​ຖະແຫຼງການ​ສະບັບ​ທີ 15 ຂອງ​ທ່ານ ໃນ​ຊຸມ​ປີ​ທີ່ຢູ່​ໃນ ຕຳແໜ່ງ​ການ​ນຳ​ສູງ​ສຸດ​ຂອງ​ປະເທດ​ຣັດ​ເຊຍ.

    ຕາມ​ທີ່​ເປັນ​ມາ​ແລ້ວ ຖະແຫຼງການ​ປະຈຳ​ປີ ແມ່ນ​ເວົ້າ​ເຖິງ​ສະພາບ​ການ​ພາຍ​ໃນ​ປະເທດ ແລະ ບັນດາ​ທິດ​ທາງ​ຕົ້ນຕໍ ໃນ​ນະໂຍບາຍ​ຢູ່​ພາຍ​ໃນ​ປະເທດ ແລະ ການ​ພົວພັນ​ກັບ​ພາຍ​ນອກ. ນີ້​ເປັນ​ເອ ກະ​ສານ​ຂອງ​ໂຄງການ​ດ້ານ​ນິຕິ​ກຳ-ການເມືອງ ທີ່​ສະແດງ​ອອກ​ເຖິງ​ວິໄສ​ທັດ​ຂອງ​ທິດ​ທາງ​ຍຸດ​ທະ​ສາດ ການ​ພັດທະນາ​ປະເທດ​ຣັດ​ເຊຍ ໃນ​ອະນາຄົດ​ອັນ​ໃກ້. ເອກະສານ​ດັ່ງກ່າວ ປະກອບ​ດ້ວຍ ສະພາບ​ການ​ທາງ​ດ້ານ​ການເມືອງ ເສດຖະກິດ ແນວ​ຄິດ ກໍ​ຄື​ການ​ນຳ​ສະເໜີ​ຕົວ​ຈິງ ກ່ຽວ​ກັບ​ການເຄື່ອນໄຫວ​ດ້ານ​ນິຕິບັນຍັດ​ຂອງ​ສອງ​ສະພາ ໃນ​ສະພາ​ແຫ່ງ​ຊາດ.

    ຢ້ອນ​ຄືນ​ຫຼັງ ໃນ​ຖະແຫຼງການ​ເມື່ອ​ປີ​ກາຍ​ນັ້ນ ປະທານາທິບໍດີ ປູ​ຕິນ ໄດ້​ເວົ້າ​ເຖິງ​ບັນດາ​ໜ້າທີ່ ຍຸດ​ທະ​ສາດ ໃນ​ການ​ພັດທະນາ​ປະເທດ​ຊາດ ດ້ວຍ​ເປົ້າ​ໝາຍ​ກໍ​ແມ່ນ​ຮອດ​ປີ 2025 ຍອດ​ຜະລິດ​ຕະ​ພັນ ພາຍ​ໃນ​ປະເທດ (GDP) ຂອງ​ຣັດ​ເຊຍ ໄລ່​ຕາມ​ຫົວ​ຄົນ ເພີ່ມ​ຂຶ້ນ 1,5 ເທົ່າ. ຄຽງ​ຄູ່​ກັນ​ນັ້ນ ຜູ້ນຳ​ຣັດ​ເຊຍ ກໍ​ເວົ້າ​ເຖິງ​ບັນດາ​ປະເພດ​ອາວຸດ​ໃໝ່​ຫຼ້າ​ສຸດ ທີ່​ສາມາດ​ຮັບປະກັນ​ຄວາມ​ໝັ້ນຄົງ ແລະ​ ອຳນາດ​ອະທິປະ​ໄຕ​ຂອງ​ປະເທດ​ຣັດ​ເຊຍ.

ຂ່າວທີ່ກ່ຽວຂ້ອງ