ແບ່ງສາຍແລ້ວ ກີລານັກຮຽນສາມັນສຶກສາ ທົ່ວນະຄອນຫຼວງ

341 21 ກ.ພ. 2019 ວົງຈອນກີລາ
ແບ່ງສາຍແລ້ວ ກີລານັກຮຽນສາມັນສຶກສາ ທົ່ວນະຄອນຫຼວງ

    ກອງ​ປະ­ຊຸມ​ກະ­ກຽມ​ຄວາມ​ພ້ອມ ແລະ ຈັບ​ສະ­ຫຼາກ​ແບ່ງ​ສາຍ​ການ​ແຂ່ງ­ຂັນ​ກີ­ລາ​ນັກ­ຮຽນ​ສາ­ມັນ​ສຶກ​ສາ ທົ່ວ​ນະ­ຄອນ­ຫຼວງ​ວຽງ​ຈັນ (ນວ) ໄດ້​ຈັດ​ຂຶ້ນ​ວັນ​ທີ 19 ກຸມ­ພາ 2019 ຜ່ານ​ມາ ທີ່​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ໂດຍ​ມີ​ທ່ານ ຫົງ​ແກ້ວ ທຳ​ມະ​ວົງ ຫົວ­ໜ້າ​ຂະ­ແໜງ​ພະ­ລະ-ສິ­ລະ​ປະ​ສຶກ​ສາ ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ທ່ານ ກອງ​ແກ້ວ ແຫ່ງ​ດາ​ວົງ​ໄຊ ຫົວ­ໜ້າ​ຂະ­ແໜງ​ກີ­ລາ​ລະ­ດັບ​ສູງ ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ມີ​ຫົວ­ໜ້າ-ຮອງ​ຫົວ­ໜ້າ​ຂະ­ແໜງ ຫົວ­ໜ້າ​ໜ່ວຍ​ງານ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ 9 ເມືອງ ໂຮງ­ຮຽນ​ຂຶ້ນ​ກັບ ແລະ ພະ­ນັກ­ງານ​ວິ­ຊາ​ການ​ເຂົ້າ​ຮ່ວມ.

    ສຳ­ລັບ​ການ​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້ ປະ­ກອບ​ມີ: 9 ເມືອງ ແລະ 3 ໂຮງ­ຮຽນ​ຂຶ້ນ​ກັບ ຄື: ຫ້ອງ­ການ​ສຶກ​ສາ​ທິ​ການ ແລະ ກີ­ລາ ເມືອງ​ຈັນ­ທະ​ບູ​ລີ ສີ​ໂຄດ​ຕະ­ບອງ ສີ​ສັດ­ຕະ​ນາກ ໄຊ​ເຊດ​ຖາ ນາ​ຊາຍ​ທອງ ຫາດ​ຊາຍ​ຟອງ ໄຊ​ທາ­ນີ ປາກ​ງື່ມ ແລະ ເມືອງ​ສັງ​ທອງ ໂຮງ­ຮຽນ​ຂຶ້ນ​ກັບ ປະ­ກອບ​ດ້ວຍ​ໂຮງ­ຮຽນ​ມັດ­ທະ­ຍົມ​ສົມ­ບູນ​ວຽງ​ຈັນ ໂຮງ­ຮຽນ​ມິດ­ຕະ­ພາບ​ລາວ-ຫວຽດ­ນາມ ແລະ ໂຮງ­ຮຽນ​ມິດ­ຕະ­ພາບ ນວ-ນະ­ຄອນ​ໂຮ່​ຈິ​ມິງ.

    ການ​ແຂ່ງ­ຂັນ​ໃນ​ຄັ້ງ​ນີ້ ມີ 5 ປະ­ເພດ​ກີ­ລາ ຄື: ເຕະ­ບານ ມີ 20 ທີມ ຍິງ 9 ທີມ (ໃຊ້​ເດີ່ນ​ເຈົ້າ​ອາ​ນຸ​ວົງ​ເປັນ​ຫຼັກ) ບານ­ສົ່ງ​ໃນ​ຮົ່ມ​ຊາຍ ມີ 20 ທີມ ຍິງ 9 ທີມ ແລະ ບານ­ສົ່ງ​ຫາດ​ຊາຍ ຍິງ-ຊາຍ ມີ 8 ທີມ (ໃຊ້​ເດີ່ນ​ໃນ​ຮົ່ມ​ໂຮງ­ຮຽນ ມສ ວຽງ​ຈັນ) ກະ­ຕໍ້ ມີ 20 ທີມ ຍິງ 9 ທີມ (ໃຊ້​ເດີ່ນ​ໃນ​ຮົ່ມ​ໂຮງ­ຮຽນ​ມິດ­ຕະ­ພາບ ນວ-ນະ­ຄອນ​ໂຮ່​ຈິ​ມິງ) ເປ​ຕັງ ມີ 20 ທີມ ຍິງ 9 ທີມ (ໃຊ້​ເດີ່ນ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ເຂດ​ບຶງ​ຂະ​ຫຍອງ) ແລະ ປະ­ເພດ​ແລ່ນ 100 ແມັດ 200 ແມັດ 400 ແມັດ 800 ແມັດ 1.500 ແລະ 3.000 ແມັດ​ຍິງ-ຊາຍ ແລ່ນ​ປ່ຽນ​ໄມ້ 4x100 ແມັດ 4x400 ແມັດ​ຍິງ-ຊາຍ ປະ­ເພດ​ລານ​ເຕັ້ນ​ຍາວ ເຕັ້ນ​ສາມ​ກ້າວ​ຍິງ-ຊາຍ ຊຸກ​ນ້ຳ­ໜັກ ເຕັ້ນ​ສູງ ຊັດ​ຫຼາວ ແກວ່ງ​ຄ້ອນ ແລະ ແກວ່ງ​ຈານ​ຍິງ-ຊາຍ (ໃຊ້​ເດີ່ນ​ເຈົ້າ​ອາ​ນຸ​ວົງ).

    ສ່ວນ​ການ​ແຂ່ງ­ຂັນ​ແຕ່​ລະ​ລາຍ­ການ ແມ່ນ​ແຂ່ງ​ຄັ້ງ​ດຽວ​ເສຍ​ຄັດ​ອອກ​ເລືອກ​ເອົາ​ທີ 1 ແລະ ທີ 2 ຂອງ​ແຕ່​ລະ​ປະ­ເພດ​ໄປ​ຫຼິ້ນ​ໃນ​ຮອບ​ຕໍ່​ໄປ ການ​ແຂ່ງ­ຂັນ​ຈະ​ເລີ່ມ​ແຕ່​ວັນ​ທີ 22 ກຸມ­ພາ ຫາ ວັນ​ທີ 15 ເມ­ສາ 2019 ໃຫ້​ສຳ­ເລັດ.

ຂ່າວທີ່ກ່ຽວຂ້ອງ