ຂ່າວ​ສັ້ນ

417 21 ກ.ພ. 2019 ຂ່າວຕ່າງປະເທດ
ຂ່າວ​ສັ້ນ

   ສ ອາ​ເມ​ຣິ​ກາ: ມີ 16 ຄົນ ຖືກ​ຕິດ​ຄ້າງ​ຢູ່​ໃນ​ຫ້ອງ​ຂອງ​ກະຕ່າ​ໄຟຟ້າ​ທີ່​ແຂວນ​ຢູ່​ກາງ​ອາກາດ ເທິງ​ອ່າວ ຄາ​ລີ​ຟໍ​ເນຍ (ສ ອາ​ເມ​ຣິ​ກາ) ເປັນ​ເວລາ 4 ຊົ່ວໂມງ ທ່າມກາງ​ອາກາດ​ໜາວ​ເຢັນ ເມື່ອ​ຄ່ຳ​ຄືນ​ຂອງ​ວັນ​ທີ 18 ກຸມພາ​ນີ້. ເຫດການ​ດັ່ງກ່າວ​ເກີດ​ຂຶ້ນ​ທີ່​ສວນ​ສາທາລະນະ​ທາງ​ທະເລ SeaWorld San Diego ຫຼັງ​ຈາກ​ທີ່​ລົມ​ພັດ​ເຮັດ​ໃຫ້​ຫົວ​ແຈກ​ໄຟຟ້າ​ສົ້ນ​ໜຶ່ງ​ຖືກ​ເປ່​ເພ. ເຈົ້າ​ໜ້າທີ່​ຈາກ ພະ​ແນກ​ດັບ​ເພີງ ຊານ ດີ​ເອ​ໂກ (SDFR) ໄດ້​ນຳ​ເອົາ ຜູ້ໂດຍສານ​ເຫຼົ່ານັ້ນ​ລົງ​ສູ່​ເຮືອ​ຢູ່​ໃນ​ອ່າວ​ໄມ​ເຊິນ ແລະ ຕໍ່​ມາ​ກໍ​ນຳ​ຂຶ້ນ​ສູ່​ຝັ່ງ​ທະເລ ເພື່ອ​ໃຫ້​ເຈົ້າ​ໜ້າທີ່​ການ​ແພດ​ດູ​ແລ​ດ້ານ​ສຸຂະພາບ.

    ອິນ​ເດຍ: ເຈົ້າ​ໜ້າທີ່​ຕຳຫຼວດ​ອິນ​ເດຍ ແຈ້ງ​ໃຫ້​ຮູ້ເມື່ອ​ວັນ​ທີ 19 ກຸມພາ​ນີ້​ວ່າ  ມີ​ຜູ້​ເສຍ​ຊີວິດ 13 ຄົນ ແລະ​ບາດເຈັບ​ອີກ 18 ຄົນ ຫຼັງ​ຈາກ​ທີ່​ມີ​ລົດ​ຂົນສົ່ງ​ຄັນ​ໜຶ່ງ ແລ່ນ​ດ້ວຍ​ຄວາມ​ໄວ​ສູງ ເກີນ​ຂອບ​ເຂດ ໄປ​ຕຳ​ໃສ່​ຜູ້​ຄົນ​ທີ່​ເຂົ້າ​ຮ່ວມ​ໃນ​ງານ​ແຫ່​ໃພ້​ລາຍ​ໜຶ່ງ ຢູ່​ໃນ​ລັດ​ຣາ​ຈາ​ສະຖານ (ພາກ​ຕາເວັນຕົກ​ຂອງ​ອິນ​ເດຍ).

    ສ ເກົາຫຼີ: ກອງ​ກຳລັງ​ດັບ​ເພີງ​ຂອງ ສ ເກົາຫຼີ ແຈ້ງ​ໃຫ້​ຮູ້ເມື່ອ​ວັນ​ທີ 19 ກຸມພາ​ນີ້​ວ່າ ມີ​ຜູ້​ເສຍ​ຊີວິດ 2 ຄົນ ແລະ​ບາດເຈັບ​ອີກ 20 ກວ່າ​ຄົນ ຢູ່​ໃນ​ເຫດການ​ໄຟ​ໄໝ້​ສະຖານທີ່ ຮົມ​ອາຍ​ນ້ຳ​ສາທາລະນະ​ແຫ່ງ​ໜຶ່ງ ຊຶ່ງ​ເກີດ​ຂຶ້ນ​ໃນ​ວັນ​ດຽວ​ກັນ  ຢູ່​ໃນ​ນະຄອນ ເດ​ກູ (ພາກ​ຕາເວັນ​ອອກ​ສ່ຽງ​ໃຕ້ ສ ເກົາຫຼີ).

    ໂບ​ລີ​ວີ: ເຈົ້າ​ໜ້າທີ່​ໂບ​ລີ​ວີ ແຈ້ງ​ໃຫ້​ຮູ້​ວ່າ ມີ​ຜູ້​ເສຍ​ຊີວິດ 24 ຄົນ ແລະ​ບາດເຈັບ​ອີກ 15 ຄົນ ຢູ່​ໃນ​ອຸບັດເຫດ​ການ​ຄົມມະນາຄົມ​ຄັ້ງ​ຮ້າຍ​ແຮງ​ລາຍ​ໜຶ່ງ ເມື່ອ​ລົດ​ບັດ​ຄັນ​ໜຶ່ງ ຕຳ​ກັບ​ລົດ​ຂົນສົ່ງ ອີກ​ຄັນ​ໜຶ່ງ ຊຶ່ງ​ເກີດ​ຂຶ້ນ​ຢູ່​ໃນ​ເຂດ​ທິດຕາເວັນຕົກ​ຂອງ​ໂບ​ລີ​ວີ ເມື່ອ​ວັນ​ທີ 18 ກຸມພາ​ນີ້. ຂ່າວ​ແຈ້ງວ່າ ໃນ​ຂະນະ​ທີ່​ເກີດ​ເຫດ​ນັ້ນ ຢູ່​ໃນ​ລົດ​ບັດ ມີ​ຜູ້ໂດຍສານ 44 ຄົນ ແລະ ຄົນ​ຂັບ​ລົດ 3 ຄົນ.

    ກ່ອນ​ໜ້າ​ນັ້ນ ເມື່ອ​ວັນ​ທີ 19 ມັງກອນ​ທີ່​ຜ່ານ​ມາ ກໍ​ໄດ້​ເກີດ​ອຸບັດເຫດ​ຂຶ້ນ​ຢູ່​ໃນ​ຍ່ານ​ທາງ ດັ່ງກ່າວ​ມາ​ແລ້ວ ໂດຍ​ໃນ​ເຫດການ​ນັ້ນ ເປັນ​ການ​ຕຳ​ກັນ​ຂອງ​ລົດ​ບັດ​ສອງ​ຄັນ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 22 ຄົນ ແລະ​ບາດເຈັບ​ອີກ 37 ຄົນ.

ຂ່າວທີ່ກ່ຽວຂ້ອງ