ອິນ​ເດຍ ເກັບ​ພາສີ 200% ກັບ​ສິນ​ຄ້ານ​ນຳ​ເຂົ້າ​ຈາກ​ປາ​ກິດ​ສະຖານ

305 19 ກ.ພ. 2019 ຂ່າວຕ່າງປະເທດ
ອິນ​ເດຍ ເກັບ​ພາສີ 200% ກັບ​ສິນ​ຄ້ານ​ນຳ​ເຂົ້າ​ຈາກ​ປາ​ກິດ​ສະຖານ

    ຂ່າວສານ IANS ລາຍ​ງານ​ວ່າ ໜຶ່ງ​ມື້​ຫຼັງ​ຈາກ​ທີ່​ໄດ້​ຍົກເລີກ​ຂໍ້​ກຳນົດ ການ​ໄດ້​ຮັບ​ນະໂຍບາຍ ພິເສດ​ທາງ​ດ້ານ​ການ​ຄ້າ​ທີ່​ໃຫ້​ແກ່​ປາ​ກິດ​ສະຖານ ມາ​ໃນ​ວັນ​ທີ 16 ກຸມພາ​ນີ້ ອິນ​ເດຍ​ກໍ​ໄດ້ ປະຕິບັດ​ການ​ເກັບ​ພາສີ 200% ກັບ​ສິນຄ້າ​ທີ່​ມີ​ຕົ້ນ​ທາງ ຫຼື​ນຳ​ເຂົ້າ​ມາ​ຈາກ​ປາ​ກິດ​ສະຖານ.

   ການ​ຕັດສິນ​ດັ່ງກ່າວ​ຂອງ​ລັດຖະບານ​ອິນ​ເດຍ ເປັນ​ພາກສ່ວນ​ໜຶ່ງ​ຂອງ​ມາດ​ຕະການ​ຕອບ​ໂຕ້ ແນໃສ່​ປາ​ກິດ​ສະຖານ ທີ່​ເປັນ​ປະເທດ​ເພື່ອນ​ບ້ານ ຫຼັງ​ຈາກ​ກໍລະນີ​ທີ່​ມີ ສະມາຊິກ​ຂອງ​ກອງ​ກຳລັງ ຕຳຫຼວດ​ສຳຮອງ​ຂອງ​ສູນ​ກາງ​ອິນ​ເດຍ (CRPF) ເສຍ​ຊີວິດ 49 ຄົນ ຢູ່​ໃນ​ເຫດການ​ໂຈມ​ຕີ​ກໍ່​ການ​ຮ້າຍ ຢູ່​ໃນ​ລັດ ຈາ​ມູ ແລະ ​ກັສ​ເມຍ ເມື່ອ​ວັນ​ທີ 14 ກຸມພາ​ທີ່​ຜ່ານ​ມາ ໂດຍ​ແມ່ນ​ກຸ່ມ ຈາຍ​​ສ-ອີ-ມໍ​ຮາມ​ເມັດ (Jaish-e-Mohhammed) ທີ່ມ​ມີ​ຖານ​ທີ່​ຕັ້ງ​ຢູ່​ໃນ​ປາ​ກິດ​ສະຖານ ຍອມຮັບ​ວ່າ​ເປັນ​ຜູ້​ດຳເນີນ​ການ​ໂຈມ​ຕີ​ດັ່ງກ່າວ.

    ອິນ​ເດຍ ນຳ​ໃຊ້​ຂໍ້​ກຳນົດ​ການ​ໄດ້​ຮັບ​ນະ​ໂຍບ​​າຍ​ພິເສດ​ທາງ​ດ້ານ​ການ​ຄ້າ ກັບ​ທຸກໆ​ສະມາຊິກ ຂອງ​ອົງການ​ການ​ຄ້າ​ໂລກ (WTO) ຕາມ​ມາດຕາ 1 ຂອງ​ສົນທິສັນຍາ​ລວມ​ກ່ຽວ​ກັບ​ພາສີ​ອາກອນ ແລະ ການ​ຄ້າ (GATT) ສະບັບ​ປີ 1994.

 

ຂ່າວທີ່ກ່ຽວຂ້ອງ