ການ​ປະ​ທ້ວງ​ຢູ່​ໃນ​ຝຣັ່ງ ແກ່ຍາວ​ມາ​ເປັນ​ອາທິດ​ທີ 14

312 19 ກ.ພ. 2019 ຂ່າວຕ່າງປະເທດ
ການ​ປະ​ທ້ວງ​ຢູ່​ໃນ​ຝຣັ່ງ ແກ່ຍາວ​ມາ​ເປັນ​ອາທິດ​ທີ 14

     ການ​ປະ​ທ້ວງ​ຂອງ​ກຸ່ມ “ເສື້ອ​ເຫຼືອງ” ຍັງ​ຄົງ​ສືບຕໍ່​ເກີດ​ຂຶ້ນ ໃນ​ວັນ​ທີ 16 ກຸມພາ​ນີ້ ຢູ່​ໃນ​ຫຼາຍ​ຕົວ​ເມືອງ​ໃຫຍ່​ໃນ​ທົ່ວ​ປະເທດ​ຝຣັ່ງ ໂດຍ​ມີ​ຜູ້​ເຂົ້າ​ຮ່ວມ​ຫຼາຍ​ໝື່ນ​ຄົນ ຊຶ່ງ​ນີ້​ເປັນ​ການ ປະ​ທ້ວງ​ໃນ​ທ້າຍ​ອາທິດ ເປັນ​ເທື່ອ​ທີ 14 ຕິດຕໍ່​ກັນ.

   ກະຊວງ​ພາຍ​ໃນ​ຂອງ​ຝຣັ່ງ​ໃຫ້​ຮູ້​ວ່າ ມີ​ຜູ້​ເຂົ້າ​ຮ່ວມ​ການ​ປະ​ທ້ວງ​ໃນ​ທ້າຍ​ອາທິດ​ຫຼ້າ​ສຸດ​ດັ່ງກ່າວ ໃນ​ທົ່ວ​ປະເທດ​ຝຣັ່ງ ປະມານ 41.500 ຄົນ  ໃນ​ນັ້ນ ສະເພາະ​ແຕ່​ຢູ່​ໃນ​ນະຄອນຫຼວງ​ປາ​ຣີ ມີ​ຜູ້​ເຂົ້າ​ຮ່ວມ​ການ​ປະ​ທ້ວງ 5.000 ຄົນ.

    ການເຄື່ອນໄຫວ​ປະ​ທ້ວງ​ຂອງ​ກຸ່ມ​ຄົນ “ເສື້ອ​ເຫຼືອງ” ເກີດ​ຂຶ້ນ​ຢູ່​ໃນ​ຝຣັ່ງ ມາ​ຕັ້ງແຕ່​ກາງ​ເດືອນ​ພະຈິກ ປີ 2018 ໂດຍ​ເລີ່ມ​ຕົ້ນ​ຈາກ​ກະແສ​ຄື້ນ​ຄັດຄ້ານ​ນະໂຍບາຍ ຂຶ້ນ​ລາຄາ​ນ້ຳມັນ​ເຊື້ອ​ໄຟ ແລະ​ໄດ້​ແຜ່​ກວ້າງ​ກາຍເປັນ​ບັ້ນ​ປະ​ທ້ວງ​ປະຈຳ​ສັບປະດາ ເພື່ອ​ຄັດຄ້ານ​ຕໍ່​ນະໂຍບາຍ​ຕ່າງໆ​ຂອງ​ລັດຖະບານ.

    ລັດຖະບານ​ຝຣັ່ງ​ໄດ້​ປະຕິບັດ​ບາງ​ມາດ​ຕະການ ເພື່ອ​ບັນເທົາ​ສະຖານະ​ການ ເຊັ່ນ​ຍົກເລີກ​ນະໂຍບາຍ​ຂຶ້ນ​ພາ​ສີນ້ຳມັນ​ເຊື້ອ​ໄຟ ປະກາດ​ການ​ຂຶ້ນ​ເງິນເດືອນ​ມູນ​ຄ່າ​ລວມ 10 ຕື້​ເອີ​ໂຣ (ເທົ່າ​ກັບ (11,5 ຕື້​ໂດ​ລາ​ສະຫະລັດ) ແລະ​ຫຼຸດ​ພາສີ​ໃຫ້​ແກ່​ຜູ້​ທີ່​ມີ​ລາຍ​ຮັບ​ຕ່ຳ ຫຼື​ຜູ້​ທີ່​ຮັບ​ເບ້ຍ​ບຳນານ. ເຖິງ​ຢ່າງໃດ​ກໍ​ຕາມ ການ​ຍິນ​ຍອມ​ດັ່ງກ່າວ  ຍັງ​ຖື​ວ່າ​ບໍ່​ທັນ​ພໍໃຈ​ສຳລັບ​ຜູ້​ປະ​ທ້ວງ “ເສື້ອ​ເຫຼືອງ” ໃນ​ການ​ສະເໜີ​ໃຫ້​ມີ​ການ​ປ່ຽນແປງ​ນະໂຍບາຍ​ອັນ​ເປັນ​ພື້ນຖານ ທີ່​ມີ​ຜົນ​ປະໂຫຍດ​ຫຼາຍ​ຂຶ້ນ ໃຫ້​ແກ່​ກຸ່ມ​ຄົນ​ທີ່​ມີ​ລາຍ​ຮັບ​ຕ່ຳ.

    ຜົນ​ການ​ສຳ​ຫຼວດ​ລາຍການ​ໜຶ່ງ ຊຶ່ງ​ປະຕິບັດ​ກັບ 1.001 ຄົນ ນັ້ນ​ມີ​ຄວາມ​ເຫັນ 56% ໃຫ້ການ​ສະໜັບສະໜູນ​ຕໍ່​ການ​ຢຸດຕິ​ການ​ປະ​ທ້ວງ ໃນ​ຂະນະ​ທີ່​ມີ​ຄວາມ​ເຫັນ 58% ໃຫ້​ຮັກສາ​ການ​ປະ​ທ້ວງ​ນັ້ນ​ເອົາ​ໄວ້.

 

ຂ່າວທີ່ກ່ຽວຂ້ອງ