ຂ່າວຫຼ້າສຸດ

WHO ແຈ້ງ​ເຕືອນ​ຜູ້​ຕິດ​ພະຍາດໝາກແດງ​ເພີ່ມ​ຂຶ້ນ​ເກືອບ 50% ໃນ​ປີ 2018

240 19 ກ.ພ. 2019 ຂ່າວຕ່າງປະເທດ
WHO ແຈ້ງ​ເຕືອນ​ຜູ້​ຕິດ​ພະຍາດໝາກແດງ​ເພີ່ມ​ຂຶ້ນ​ເກືອບ 50% ໃນ​ປີ 2018

   ອົງການ​ອະນາໄມ​ໂລກ (WHO) ໄດ້​ສະແດງ​ຄວາມ​ກັງວົນ​ອອກ​ມາ​ເມື່ອ​ວັນ​ທີ 14 ກຸມພາ​ທີ່​ຜ່ານ​ມາ ວ່າການ​ສະກັດ​ກັ້ນ​ຕໍ່​ການ​ແຜ່​ລາມ​ຂອງ​ພະຍາດໝາກແດງ ພວມ​ກ້າວ​ຖອຍຫຼັງ ທ່າມກາງ​ທີ່​ຈຳນວນ​ຜູ້​ຕິດພະຍາດ​ນີ້​ໃນ​ທົ່ວ​ໂລກ ໄດ້​ເພີ່ມ​ຂຶ້ນ​ເກືອບ 50% ໃນ​ປີ 2018.

    ຜ່ານ​ສະຖິຕິ​ເບື້ອງ​ຕົ້ນ WHO ເຫັນ​ວ່າ​ທ່າ​ອ່ຽງ​ຂອງ​ກໍລະນີ​ຜູ້​ຕິດ​ພະຍາດໝາກແດງ ພວມ​ເພີ່ມ​ຂຶ້ນ​ຢູ່​ໃນ​ຂັ້ນ​ທົ່ວ​ໂລກ ແລະ ບັນດາ​ປະເທດ​ທີ່​ລ້ຳ​ລວຍ ຊຶ່ງ​ມັກ​ມີ​ອັດຕາ​ສ່ວນ​ການ​ສັກ​ວັກ​ແຊງ​ໃນ​ລະດັບ​ສູງ ກໍ​ບໍ່​ນອກ​ເໜືອ​ຈາກ​ສະພາບ​ລວມ​ທົ່ວ​ໂລກ ຄື​ດັ່ງກ່າວ.

    ທ່ານ​ນາງ ກາ​ຕຣີ​ນາ ເກຣດ​ຊິງ​ເກີ ຫົວໜ້າ​ໂຄງການ​ສັກ​ຢາ​ກັນ​ພະຍາດ​ເປີດ​ກວ້າງ​ຂອງ  WHO ເວົ້າ​ວ່າ ມາ​ຮອດ​ປີ 2016 ຈຳນວນ​ຜູ້​ຕິດ​ພະຍາດໝາກແດງ ມີ​ທ່າ​ອ່ຽງ​ເພີ່ມ​ຂຶ້ນ​ໜ້ອຍ​ໜຶ່ງ ແຕ່​ມາ​ຮອດ​ປີ 2017 ໄດ້​ເພີ່ມ​ສູງ​ຂຶ້ນ. ການ​ລະບາດ​ຂອງ​ພະຍາດໝາກແດງ ຕົ້ນຕໍ​ແມ່ນ​ເຕົ້າໂຮມ​ຢູ່​ໃນ​ອູ​ແກຣນ ມາ​ດາກ​​ັສ​ກາ ​ສປ ກົງ​ໂກ ຈາດ ແລະ ເຊຍ​ຣາ ເລ​ອອນ. ສະເພາະ​ແຕ່​ຢູ່​ໃນ​ມາ​ດາກ​​ັສ​ກາ ເທົ່າ​ນັ້ນ ນັບ​ແຕ່​ເດືອນ​ຕຸລາ ປີ 2018 ຮອດ​ເດືອນ​ກຸມພາ ປີ 2019 ລວມ​ແລ້ວ​ມີ​ຜູ້​ຕິດ​ພະຍາດໝາກແດງ​ເກືອບ 67.000 ຄົນ ແລະ​ມີ​ຜູ້​ເສຍ​ຊີວິດ​ກວ່າ 920 ກໍລະນີ.

    ບັນດາ​ຊ່ຽວຊານ​ຂອງ WHO ໃຫ້​ຮູ້​ວ່າ ມີ​ການ​ລະບາດ​ຂອງ​ພະຍາດໝາກແດງ​ຫຼາຍ​ງວດ ແກ່ຍາວ ທີ່​ມີ​ຄວາມ​ສ່ຽງ​ແຜ່​ລາມ​ຢ່າງ​ໄວ ແຕ່​ວ່າ​ມີ​ບໍ່​ເຖິງ 10% ຂອງ​ຈຳນວນ​ຜູ້​ຕິດ​ພະຍາດໝາກແດງ ໄດ້​ຮັບ​ການ​ຈົດ​ແຕ້ມ​ໃນ​ປັດຈຸບັນ. ເຖິງ​ຢ່າງໃດ​ກໍ​ຕາມ ຈາກ​ອັດຕາ​ສ່ວນ​ຜູ້​ຕິດ​ພະຍາດໝາກແດງ​ເພີ່ມ​ຂຶ້ນ 50% ນັ້ນ​ເປັນ​ການ​ຈະ​ແຈ້ງວ່າ ຄວາມ​ພະຍາຍາມ​ໃນ​ການ​ສະກັດ​ກັ້ນ​ພະຍາດ​ດັ່ງກ່າວ ພວມ​ໄປ​ຜິດ​ທິດ​ທາງ ແລະ​ຈຳນວນ​ຜູ້​ຕິດພະຍາດ​ນີ້​ໃນ​ຄວາມ​ເປັນ​ຈິງ ຕ້ອງ​ມີ​ເຖິງ​ຫຼາຍ​ລ້ານ​ຄົນ.

    ປະເທດ​ຕ່າງໆ​ໃນ​ໂລກ ມີ​ກຳນົດ​ເວລາ​ຮອດ​ເດືອນ​ເມສາ​ປີ​ນີ້ ເພື່ອ​ແຈ້ງ​ໃຫ້​ຮູ້​ເຖິງ​ກໍລະນີ​ຜູ້​ຕິດ​ພະຍາດໝາກແດງ ພາຍ​ໃນ​ປີ 2018. ແຕ່​ເຖິງ​ຢ່າງໃດ​ກໍ​ຕາມ ທ່ານ​ນາງ ກາ​ເຕີ​ຣິນ ໂອບ​ຣຽນ ຜູ້ອຳນວຍການ​ຮັບຜິດຊອບ​ກ່ຽວ​ກັບ​ການ​ປະ​ສະ​ຈາກ​ພະຍາດ ສັກ​ຢາ​ກັນ​ພະຍາດ ແລະ ​ຊີວະ​ສາດ​ຂອງ WHO ເວົ້າ​ວ່າ ສະຖິຕິ​ກ່ຽວ​ກັບ​ຈຳນວນ​ຜູ້​ຕິດ​ພະຍາດໝາກແດງ ໃນ​ປີ 2018 ຊຶ່ງ WHO ໄດ້​ຮັບ​ມາ​ຮອດ​ເວລາ​ນີ້ ຢຸດ​ຢູ່​ທີ່​ພຽງ​ລະດັບ 230.000 ຄົນ. WHO ໃຫ້ການ​ຄາດ​ຄະເນ​ວ່າ ພະຍາດໝາກແດງ ເປັນ​ສາເຫດ​ເຮັດ​ໃຫ້​ມີ​ຜູ້​ເສຍ​ຊີວິດ 136.000 ຄົນ ໃນ​ປີ 2018.

 

ຂ່າວທີ່ກ່ຽວຂ້ອງ