ຂ່າວຫຼ້າສຸດ

ຫາລືພັດທະນາຍຸດທະສາດການເຝິກອົບຮົມ ພາສາອັງກິດໃຫ້ພະນັກງານລັດຖະກອນ

300 19 ກ.ພ. 2019 ຂ່າວໜ້າ​ໜຶ່ງ

    ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ຈັດ​ກອງ​ປະ­ຊຸມ​ວິ­ຊາ​ການ​ເພື່ອ​ປຶກ­ສາ​ຫາ­ລື ກ່ຽວ​ກັບ​ການ​ພັດ­ທະ­ນາ​ຍຸດ​ທະ​ສາດ ແລະ ວາງ​ແຜນ​ຈັດ​ຕັ້ງ​ການ​ເຝິກ­ອົບ­ຮົມ​ພາ­ສາ​ອັງ­ກິດ​ໃຫ້​ພະ­ນັກ­ງານ-ລັດ­ຖະ­ກອນ ຂຶ້ນ​ວັນ​ທີ 14 ກຸມ­ພາ 2019 ຢູ່​ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ກອງ​ສີ ແສງ​ມະ­ນີ ຮອງ​ລັດ­ຖະ­ມົນ­ຕີ​ກະ­ຊວງ ສສກ ແລະ ທ່ານ Hugh Evans ເອກ​ອັກ​ຄະ​ລັດ​ຖະ​ທູດ​ຣາ​ຊະ​ອາ­ນາ­ຈັກ​ອັງ­ກິດ ປະ­ຈຳ ສປປ ລາວ ມີ​ຜູ້­ຕາງ­ໜ້າ​ຈາກ​ບັນ­ດາ​ສະ­ຖານ­ທູດ​ຕ່າງ­ປະ­ເທດ ປະ­ຈຳ​ລາວ ເຂົ້າ​ຮ່ວມ.

    ທ່ານ ກອງ​ສີ ແສງ​ມະ­ນີ ກ່າວ​ວ່າ: ກອງ​ປະ­ຊຸມ​ຄັ້ງ​ນີ້ ເປັນ​ກອງ​ປະ­ຊຸມ​ລັກ­ສະ­ນະ​ດຽວ​ກັນ​ທີ່​ຈັດ​ຂຶ້ນ​ໃນ​ເດືອນ​ສິງ­ຫາ 2018 ທີ່​ໄດ້​ມີ​ການ​ແຕ່ງ­ຕັ້ງ​ຄະ­ນະ​ວິ­ຊາ​ການ​ໃນ​ການ​ພັດ­ທະ­ນາ​ຍຸດ​ທະ​ສາດ-ແຜນ​ຈັດ​ຕັ້ງ​ການ​ເຝິກ­ອົບ­ຮົມ​ພາ­ສາ​ອັງ­ກິດ ເພື່ອ​ຄົ້ນ­ຄວ້າ​ຄວາມ​ເປັນ​ໄປ​ໄດ້ ແລະ ທົບ​ທວນ­ຄືນ​ການ­ຈັດ­ຕັ້ງ​ປະ­ຕິ­ບັດ​ຜ່ານ​ມາ ແລະ ສ້າງ​ໂອ­ກາດ​ໃຫ້­ການ​ພັດ­ທະ­ນາ​ຍຸດ​ທະ​ສາດ-ແຜນ​ຈັດ​ຕັ້ງ​ເຝິກ­ອົບ­ຮົມ​ໃນ­ຕໍ່­ໜ້າ ແລະ ກອງ​ປະ­ຊຸມ​ຄະ­ນະ​ກຳ­ມາ​ທິ​ການ​ແຫ່ງ​ຊາດ ເພື່ອ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ຄັ້ງ​ທີ 7 ໃນ​ຕົ້ນ​ເດືອນ​ກຸມ­ພາ 2019 ກໍ​ໄດ້​ເນັ້ນ​ໃສ່​ການ​ສ້າງ​ແຜນ​ເຝິກ­ອົບ­ຮົມ​ພາ­ສາ​ອັງ­ກິດ ໃຫ້​ພະ­ນັກ­ງານ-ລັດ­ຖະ­ກອນ​ເຊັ່ນ​ດຽວ​ກັນ.

    ພັກ ແລະ ລັດ­ຖະ­ບານ​ລາວ ເຫັນ​ໄດ້​ເຖິງ​ຄວາມ​ຈຳ­ເປັນ ແລະ ຄວາມ​ສຳ­ຄັນ​ຂອງ​ພາ­ສາ​ອັງ­ກິດ ທີ່​ມີ​ບົດ­ບາດ​ຫຼາຍ​ໃນ​ການ​ປະ­ຕິ­ບັດ​ໜ້າ­ທີ່​ຂອງ​ພະ­ນັກ­ງານ-ລັດ­ຖະ­ກອນ ໃນ​ໄລ­ຍະ​ທີ່​ປະ­ເທດ​ຊາດ​ກຳ­ລັງ​ສູ້​ຊົນ ເພື່ອ​ໃຫ້​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ​ການ​ເປັນ​ປະ­ເທດ​ດ້ອຍ​ພັດ­ທະ­ນາ​ໃນ​ປີ 2020 ແລະ ໃນ​ຍຸກ​ແຫ່ງ​ການ​ເຊື່ອມ​ໂຍງ​ກັບ​ພາກ​ພື້ນ ແລະ ສາ­ກົນ​ທີ່​ມີ​ການ​ປ່ຽນ­ແປງ ການ​ແຂ່ງ­ຂັນ​ດ້ານ​ເສດ­ຖະ­ກິດ ແລະ ການ​ພັດ­ທະ­ນາ​ດ້ານ​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ​ຢ່າງ​ໄວ­ວາ ຄວາມ​ສາ­ມາດ​ນຳ​ໃຊ້​ພາ­ສາ​ອັງ­ກິດ​ຍິ່ງ​ມີ​ຄວາມ​ຈຳ­ເປັນ ເພື່ອ​ຊ່ວຍ​ໃຫ້​ພະ­ນັກ­ງານ-ລັດ­ຖະ­ກອນ​ສາ­ມາດ​ປະ­ຕິ­ບັດ​ໜ້າ­ທີ່ ແລະ ຊຸກ­ຍູ້​ການ­ເຄື່ອນ­ໄຫວ​ວຽກ​ງານ ເພື່ອ​ຮັບ​ໃຊ້​ທຸກ​ຮູບ​ແບບ​ການ​ສື່­ສານ ນຳ­ໄປ​ສູ່​ຜົນ­ສຳ­ເລັດ.

    ກອງ​ປະ­ຊຸມ​ຄັ້ງ​ນີ້ ຜູ້​ເຂົ້າ​ຮ່ວມ​ໄດ້​ຮັບ​ຟັງ​ການ​ນຳ​ສະ­ເໜີ​ລາຍ​ງານ​ສຸດ​ທ້າຍ ກ່ຽວ​ກັບ​ຜົນ​ການ​ວິ­ເຄາະ​ການ­ຈັດ­ຕັ້ງ​ການ​ພັດ­ທະ­ນາ ແຜນ­ການ​ເຝິກ­ອົບ­ຮົມ​ພາ­ສາ​ອັງ­ກິດ ແລະ ແຜນ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ​ໃນ​ສະ­ເພາະ​ໜ້າ​ໃຫ້​ມີ​ປະ​ສິດ­ທິ​ຜົນ.

ຂ່າວທີ່ກ່ຽວຂ້ອງ