ກຽມຈັດການແຂ່ງຂັນແລ່ນວຽງຈັນ ຮາຟມາຣາທອນນາໆຊາດ

255 19 ກ.ພ. 2019 ວົງຈອນກີລາ
ກຽມຈັດການແຂ່ງຂັນແລ່ນວຽງຈັນ ຮາຟມາຣາທອນນາໆຊາດ

    ສະ­ຫະ­ພັນ​ແລ່ນ-ລານ​ແຫ່ງ​ຊາດ​ລາວ ຮ່ວມ​ກັບ​ວິ​ສາ​ຫະ​ກິດ​ສ່ວນ​ບຸກ­ຄົນ​ອີ​ເວັ້ນ​ຟໍ​ກູດ ກຽມ​ຈັດ­ການ​ແຂ່ງ­ຂັນ​ແລ່ນ​ວຽງ​ຈັນ​ຮາ​ຟ​ມາ​ຣາ​ທອນ​ນາໆຊາດ ຄັ້ງ​ທີ 4 ຂຶ້ນ​ລະ­ຫວ່າງ​ຕົ້ນ​ມີ­ນາ​ນີ້ ເຊິ່ງ​ພິ­ທີ​ຖະ­ແຫຼງ​ຂ່າວ​ຈັດ​ຂຶ້ນ​ໃນ​ວັນ​ທີ 14 ກຸມ­ພາ 2019 ທີ່​ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ແສງ​ພອນ ພົນ​ອາ­ມາດ ຫົວ­ໜ້າ​ກົມ​ກິ­ລາ​ລະ­ດັບ​ສູງ ກະ­ຊວງ​ສຶກ​ສາ​ທິ​ການ ແລະ ກິ­ລາ ທ່ານ ຈັນ​ດີ ພົມ​ມະ​ບຸດ ປະ­ທານ​ສະ­ຫະ­ພັນ​ແລ່ນ-ລານ​ແຫ່ງ​ຊາດ​ລາວ ພ້ອມ​ດ້ວຍ​ຕາງ­ໜ້າ​ຈາກ​ຜູ້​ສະ­ໜັບ­ສະ­ໜູນ​ຕ່າງໆ ແລະ ນັກ​ກິ­ລາ​ເຂົ້າ.

    ທ່ານ ສິດ­ທິ­ໄຊ ສັກ​ປະ­ເສີດ ເລ­ຂາ­ທິ­ການ​ສະ­ຫະ­ພັນ​ແລ່ນ-ລານ​ແຫ່ງ​ຊາດ​ລາວ ກ່າວ​ວ່າ: ສະ­ຫະ­ພັນ​ແລ່ນ-ລານ ຮ່ວມ​ກັບ​ອີ​ເວັ້ນ​ຟໍ​ກູດ ກຽມ​ຈັດ­ການ​ແຂ່ງ­ຂັນ​ແລ່ນ​ວຽງ​ຈັນ​ຮາ​ຟ​ມາ​ຣາ​ທອນ​ນາໆຊາດ ປະ­ຈຳ​ປີ 2019 ເຊິ່ງ​ຈັດ​ຂຶ້ນ​ເປັນ​ຄັ້ງ​ທີ 4 ສືບ​ເນື່ອງ​ຈາກ​ຜົນ­ສຳ­ເລັດ​ການ​ແຂ່ງ­ຂັນ 3 ປີ­ຜ່ານ­ມາ ເຊິ່ງ​ມີ​ຈຳ­ນວນ​ນັກ​ແລ່ນ​ທັງ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ຮ່ວມ​ເພີ່ມ​ຂຶ້ນ​ໃນ​ແຕ່​ລະ​ປີ ເພື່ອ​ເປັນ​ການ​ສົ່ງ­ເສີມ​ການ​ອອກ­ກຳ­ລັງ​ກາຍ​ເພື່ອ​ສຸ­ຂະ­ພາບ ແລະ ມິດ­ຕະ­ພາບ​ລະ­ຫວ່າງ​ນັກ​ແລ່ນ​ດ້ວຍ​ກັນ ພ້ອມ​ກັນ​ນັ້ນ ກໍ່​ເພື່ອ​ເຮັດ​ໃຫ້​ນະ­ຄອນ­ຫຼວງ​ວຽງ​ຈັນ​ກາຍ­ເປັນ​ນະ­ຄອນ­ຫຼວງ ທີ່​ມີ​ການ​ຈັດ­ການ​ແຂ່ງ­ຂັນ​ກິ­ລາ​ມວນ​ຊົນ​ລະ­ດັບ​ນາໆຊາດ ນອກ​ນັ້ນ ຍັງ​ເປັນ​ການ​ສົ່ງ­ເສີມ​ການ­ທ່ອງ­ທ່ຽວ​ລາວ ໃຫ້​ມີ​ຄວາມ​ຄຶກ­ຄື້ນ​ໃນ​ປີ​ທ່ອງ​ທ່ຽວ​ລາວ-ຈີນ 2019.

    ໂອ­ກາດ​ດັ່ງ­ກ່າວ ທ່ານ ຈັນ​ດີ ພົມ​ມະ​ບຸດ ກ່າວ​ວ່າ: ຈາກ​ການ​ຈັດ 3 ຄັ້ງ​ທີ່​ຜ່ານ​ມາ ເຫັນ​ວ່າ​ມີ​ນັກ​ກິ­ລາ​ເຂົ້າ​ຮ່ວມ​ນັບ​ມື້​ນັບ​ເພີ່ມ​ຂຶ້ນ ເຊິ່ງ​ສະ­ແດງ​ຄື​ຄັ້ງ​ທີ 1 ມີ​ຈຳ­ນວນ​ນັກ­ກີ­ລາ 1.600 ຄົນ ຄັ້ງ​ທີ 2 ມີ 2.200 ຄົນ ແລະ ຄັ້ງ​ທີ 3 ມີ 2.700 ຄົນ ແນ່­ນອນ​ໃນ​ປີ​ນີ້​ພວກ​ເຮົາ​ຄາດ​ວ່າ​ຈະ​ມີ​ຜູ້​ເຂົ້າ​ຮ່ວມ 4.000 ຄົນ ເພື່ອ​ສົ່ງ­ເສີມ​ການ​ອອກ­ກຳ­ລັງ​ກາຍ ພ້ອມ​ທັງ​ເປັນ​ການ​ສະ­ຫຼອງ​ປີ​ທ່ອງ​ທ່ຽວ​ລາວ-ຈີນ​ອີກ​ດ້ວຍ.

    ສຳ­ລັບ​ການ​ແລ່ນ​ແບ່ງ​ອອກ​ເປັນ 3 ປະ­ເພດ​ຄື: ຮາ​ຟ​ມາ​ຣາ​ທອນ 21 ກິ­ໂລ­ແມັດ 10 ກິ­ໂລ­ແມັດ ແລະ ແລ່ນ-ຍ່າງ​ເພື່ອ​ສຸ­ຂະ­ພາບ 5 ກິ­ໂລ­ແມັດ ໂດຍ​ອັນ​ດັບ​ທີ 1 ເຖິງ​ອັນ​ດັບ​ທີ 5 ຂອງ​ທັງ​ເພດ​ຍິງ ແລະ ຊາຍ​ຂອງ​ປະ­ເພດ 21 ກິ­ໂລ­ແມັດ ແລະ ປະ­ເພດ 10 ກິ­ໂລ­ແມັດ ໃນ​ລຸ້ນ​ທົ່ວ​ໄປ ແລະ ກຸ່ມ​ຜູ້​ມີ​ອາ­ຍຸ​ມີ​ເງິນ​ລາ­ງວັນ ແລະ ຂັນ​ລາ­ງວັນ ສາ­ມາດ​ລົງ­ທະ­ບຽນ​ໄດ້​ແຕ່​ມື້­ນີ້​ເປັນ­ຕົ້ນ​ໄປ​ຜ່ານ​ເວັບ​ໄຊ www.gotorace.com/event/Vientiane-halfmarathon-2019.

    ສ່ວນ​ຈຸດ​ປ່ອຍ ແລະ ເສັ້ນ​ໄຊ​ແມ່ນ​ບໍ­ລິ­ເວນ​ປະ­ຕູ­ໂຂງ​ເດີ່ນ​ທາດ­ຫຼວງ ແຂ່ງ­ຂັນ​ມື້​ດຽວ ທີ 3 ມີ­ນາ 2019.

ຂ່າວທີ່ກ່ຽວຂ້ອງ