ຂ່າວຫຼ້າສຸດ

ຫາລືວຽກງານຂະບວນການໂຕະມົນ ປະຈຳປີ 2019

358 18 ກ.ພ. 2019 ຂ່າວໜ້າ​ໜຶ່ງ
ຫາລືວຽກງານຂະບວນການໂຕະມົນ ປະຈຳປີ 2019

    ກະ­ຊວງ​ແຜນ­ການ ແລະ ການ​ລົງ­ທຶນ ຮ່ວມ​ກັບ​ອົງ­ການ​ສະ­ຫະ​ປະ­ຊາ​ຊາດ​ເພື່ອ​ການ​ພັດ­ທະ­ນາ ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກ່ຽວ​ກັບ​ວຽກ​ງານ​ຂະ​ບວນ​ການ​ໂຕະ­ມົນ ປະ­ຈຳ​ປີ 2019 ໃນ​ວັນ​ທີ 15 ກຸມ­ພາ 2019 ທີ່​ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ແລະ ທ່ານ​ນາງ ຄາ​ຣີ​ນາ ອິມ​ໂມ​ເມັນ ຜູ້​ປະ­ສານ​ງານ​ຂອງ​ອົງ­ການ​ສະ­ຫະ​ປະ­ຊາ​ຊາດ ທັງ​ເປັນ​ຜູ້­ຕາງ­ໜ້າ​ຂອງ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ​ປະ­ຈຳ​ລາວ ມີ​ບັນ­ດາ​ກະ­ຊວງ ຂະ­ແໜງ­ການ​ທີ່​ກ່ຽວ­ຂ້ອງ ຄູ່​ຮ່ວມ​ພັດ­ທະ­ນາ​ພາກ​ເອ­ກະ​ຊົນ ແລະ ອົງ​ການ­ຈັດ­ຕັ້ງ​ສາ­ກົນ​ເຂົ້າ​ຮ່ວມ.

    ທ່ານ ກິ​ແກ້ວ ຈັນ­ທະ​ບູ​ຣີ ໄດ້​ຍົກ​ໃຫ້​ເຫັນ​ເຖິງ​ຄວາມ​ສຳ­ຄັນ​ຂອງ​ປີ 2019 ເຊິ່ງ​ເປັນ​ປີ​ທີ່​ລາວ​ຕ້ອງ​ໄດ້​ເອົາ­ໃຈ­ໃສ່ ຈັດ​ຕັ້ງ​ປະ­ຕິ­ບັດ​ຫຼາຍ​ໜ້າ​ວຽກ ເພື່ອ​ບັນ­ລຸ​ຄາດ­ໝາຍ​ຕ່າງໆ ພ້ອມ​ທັງ​ແກ້​ໄຂ​ບັນ­ດາ​ສິ່ງ​ທ້າ​ທາຍ​ທີ່​ພົບ­ພໍ້​ໃນ​ປີ 2018 ໂດຍ​ສະ­ເພາະ​ແມ່ນ ສຸມ​ໃສ່​ກະ­ກຽມ​ສ້າງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ IX (2021-2025) ໂດຍ​ອີງ​ຕາມ​ຜົນ​ຂອງ​ການ​ສະ­ຫຼຸບ​ກາງ​ສະ­ໄໝ ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ VIII ແລະ ເງື່ອນ­ໄຂ​ການ​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ​ປະ­ເທດ​ດ້ອຍ​ພັດ­ທະ­ນາ ທົບ​ທວນ​ຄວາມ​ຄືບ​ໜ້າ ໃນ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ຂໍ້​ສະ­ເໜີ​ແນະ ທີ່​ໄດ້​ລະ­ບຸ​ໄວ້​ໃນ​ບົດ​ລາຍ​ງານ​ການ​ພັດ­ທະ­ນາ​ມະ­ນຸດ​ແຫ່ງ​ຊາດ ຫົວ­ທີ 5 ແລະ ກະ­ກຽມ​ສົ່ງ​ບົດ​ລາຍ​ງານ​ການ​ພັດ­ທະ­ນາ​ມະ­ນຸດ​ແຫ່ງ​ຊາດ ຫົວ­ທີ 6 ໂດຍ​ອີງ​ຕາມ​ຜົນ​ຂອງ​ການ​ສຳ​ຫຼວດ​ຕ່າງໆ​ທີ່​ໄດ້​ດຳ­ເນີນ​ໃນ​ປີ 2018 ພ້ອມ​ດຽວ​ກັນ​ນີ້ ກໍ​ສືບ­ຕໍ່​ເຜີຍ­ແຜ່​ບົດ​ລາຍ​ງານ​ການ​ທົບ​ທວນ​ແຫ່ງ​ຊາດ​ແບບ​ສະ­ໝັກ​ໃຈ ກ່ຽວ​ກັບ​ການ­ຈັດ­ຕັ້ງ​ຜັນ​ຂະ­ຫຍາຍ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ເພື່ອ​ຮັບ­ປະ­ກັນ​ໃຫ້​ເປົ້າ​ໝາຍ​ດັ່ງ­ກ່າວ ໄດ້​ຖືກ​ເຊື່ອມ​ສານ ແລະ ຈັດ​ຕັ້ງ​ປະ­ຕິ­ບັດ​ຢ່າງ​ມີ​ປະ­ສິດ­ທິ­ພາບ​ຢູ່​ທຸກ​ຂັ້ນ.

    ກອງ​ປະ­ຊຸມ​ໂຕະ­ມົນ​ປະ­ຈຳ​ປີ 2019 ຈະ​ໄດ້​ສຸມ​ໃສ່​ປຶກ­ສາ​ຫາ­ລື​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ ຜົນ​ຂອງ​ກອງ​ປະ­ຊຸມ​ໂຕະ­ມົນ ປະ­ຈຳ​ປີ 2018 ພ້ອມ​ທັງ​ເນື້ອ​ໃນ​ຈິດ­ໃຈ​ຂອງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ IX ທັງ​ໝົດ​ນີ້​ແມ່ນ​ການ​ບູ­ລະ­ນະ​ສ້າງ­ສາ ແລະ ຟື້ນ​ຟູ​ຄວາມ​ເສຍ​ຫາຍ​ທີ່​ເກີດ​ຈາກ​ໄພ­ພິ­ບັດ​ທຳ​ມະ​ຊາດ​ໃຫ້​ດີ​ຂຶ້ນ​ກວ່າ​ເກົ່າ ເຊິ່ງ​ຕ້ອງ​ໄດ້​ມີ​ການ​ສ້າງ ແລະ ຈັດ​ຕັ້ງ​ປະ­ຕິ­ບັດ​ແຜນ­ການ​ຟື້ນ​ຟູ​ຢູ່​ທຸກ​ຂັ້ນ.

ຂ່າວທີ່ກ່ຽວຂ້ອງ