ລາວ-ຈີນ ຮ່ວມມືກັນໃນກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ

    ວັນ​ທີ 15 ກຸມ­ພາ 2019 ທີ່​ກະ­ຊວງ​ການ​ຕ່າງ­ປະ­ເທດ ໄດ້​ມີ​ພິ­ທີ​ລົງ​ນາມ​ໃນ​ສັນ­ຍາ​ຮ່ວມ​ມື​ໂຄງ­ການ​ກອງ​ທຶນ​ພິ­ເສດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ປະ­ຈຳ​ປີ 2018 ລະ­ຫວ່າງ ລັດ­ຖະ­ບານ​ລາວ ແລະ ລັດ­ຖະ­ບານ​ຈີນ ໂດຍ​ຕາງ­ໜ້າ​ໃຫ້​ແກ່​ຝ່າຍ​ລາວ​ແມ່ນ​ທ່ານ ທອງ​ຜ່ານ ສະ­ຫວັນ​ເພັດ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ຕາງ­ໜ້າ​ໃຫ້​ຝ່າຍ​ຈີນ ໂດຍ​ທ່ານ ຈຽງ​ຈາຍ​ຕົງ ເອກ​ອັກ​ຄະ​ລັດ​ຖະ​ທູດ ແຫ່ງ ສປ ຈີນ ປະ­ຈຳ ສປປ ລາວ ມີ​ຜູ້­ຕາງ­ໜ້າ​ຈາກ​ບັນ­ດາ ກະ­ຊວງ ຂະ­ແໜງ­ການ ທີ່​ກ່ຽວ­ຂ້ອງ​ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

    ການ​ລົງ​ນາມ​ໃນ​ສັນ­ຍາ​ຮ່ວມ​ມື​ໂຄງ­ການ​ໃນ​ຄັ້ງ​ນີ້​ແມ່ນ ເພື່ອ​ເປັນ​ການ­ຈັດ­ຕັ້ງ​ຜັນ​ຂະ­ຫຍາຍ​ຜົນ​ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຄັ້ງ​ທີ 4 ທີ່​ຈັດ​ຂຶ້ນ​ຢູ່​ແຂວງ​ຫຼວງ​ພະ​ບາງ ໃນ​ເດືອນ​ທັນ­ວາ 2018 ຊຶ່ງ​ກອງ​ປະ­ຊຸມ​ດັ່ງ­ກ່າວ ໄດ້​ຮັບ­ຮອງ​ເອົາ​ທັງ​ໝົດ 138 ໂຄງ­ການ​ຂອງ 6 ປະ­ເທດ​ສະ­ມາ­ຊິກ (ກຳ­ປູ­ເຈຍ ສປ ຈີນ ສປປ ລາວ ມຽນ​ມາ ໄທ ແລະ ຫວຽດ­ນາມ) ໃນ​ນັ້ນ ສປປ ລາວ ໄດ້​ຮັບ​ຈຳ­ນວນ 21 ໂຄງ­ການ ລວມ​ມູນ​ຄ່າ 4,551,100 ໂດ​ລາ​ສະ­ຫະ­ລັດ ຊຶ່ງ​ປະ­ກອບ​ມີ 7 ກະ­ຊວງ ຂະ­ແໜງ­ການ ຄື: ກະ­ຊວງ​ການ​ຕ່າງ­ປະ­ເທດ ກະ­ຊວງ​ສຶກ​ສາ​ທິ​ການ ແລະ ກີ­ລາ ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ແລະ ກະ­ຊວງ​ກະ­ສິ­ກຳ ແລະ ປ່າ­ໄມ້ ເພື່ອ​ໃຫ້​ແຕ່​ລະ​ພາກ­ສ່ວນ​ທີ່​ໄດ້​ຮັບ​ໂຄງ­ການ ນຳ­ໄປ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ໃຫ້​ເກີດ​ຜົນ.

    ໂຄງ­ການ​ກອງ​ທຶນ​ພິ­ເສດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ເປັນ​ໂຄງ­ການ​ທີ່­ຢູ່​ພາຍ​ໃຕ້​ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຊຶ່ງ​ກອງ​ທຶນ​ດັ່ງ­ກ່າວ ໄດ້​ຮັບ​ການ​ສ້າງ­ຕັ້ງ​ຂຶ້ນ​ໃນ​ໂອ­ກາດ​ກອງ​ປະ­ຊຸມ​ຜູ້­ນຳ​ແມ່­ນ້ຳ​ຂອງ-ແມ່­ນ້ຳ​ລ້ານ ຊ້າງ​ຄັ້ງ​ທີ I ໃນ​ປີ 2016 ທີ່​ເມືອງ​ຊັນ​ຢາ ແຂວງ​ໄຫ​ໜານ ສປ ຈີນ ສຳ­ລັບ ໃນ​ປີ 2017 ສປປ ລາວ ໄດ້​ຮັບ​ທັງ​ໝົດ ຈຳ­ນວນ 13 ໂຄງ­ການ ເຊິ່ງ​ປະ­ກອບ​ມີ 5 ກະ­ຊວງ ຂະ­ແໜງ­ການ ລວມ​ມູນ​ຄ່າ​ຫຼາຍ​ກວ່າ 3 ລ້ານ​ໂດ​ລາ​ສະ­ຫະ­ລັດ ແລະ ປັດ­ຈຸ­ບັນ ກຳ­ລັງ​ຢູ່​ໃນ​ຂັ້ນ​ຕອນ​ການ­ຈັດ­ຕັ້ງ​ປະ­ຕິ­ບັດ​ຕາມ​ແຜນ­ການ​ທີ່​ໄດ້​ວາງ​ໄວ້ ສ່ວນ​ໂຄງ­ການ​ທີ່​ໄດ້​ຮັບ​ອະ­ນຸ­ມັດ ໃນ​ປີ 2018 ຈຳ­ນວນ 21 ໂຄງ­ການ​ນັ້ນ ຈະ​ໄດ້​ຖືກ​ຈັດ​ຕັ້ງ​ປະ­ຕິ­ບັດ​ໃນ​ປີ 2019.