ທພລ ແລະ ສລຍ ຮ່ວມມືເພື່ອສົ່ງເສີມ SMEs

351 18 ກ.ພ. 2019 ຂ່າວໜ້າ​ໜຶ່ງ
ທພລ ແລະ ສລຍ ຮ່ວມມືເພື່ອສົ່ງເສີມ SMEs

    ໃນ​ວັນ​ທີ 14 ກຸມ­ພາ 2019 ທະ­ນາ­ຄານ​ພັດ­ທະ­ນາ​ລາວ (ທພລ) ແລະ ສະ​ຖາ​ບັນ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ລາວ-ຢີ່​ປຸ່ນ (ສລຍ) ໄດ້​ຈັດ​ຕັ້ງ​ການ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ກ່ຽວ​ກັບ​ການ​ພັດ­ທະ­ນາ SME ລະ­ຫວ່າງ​ທ່ານ ອາ­ຄົມ ປຣະ​ເສີດ ຜູ້­ອຳ­ນວຍ­ການ​ໃຫຍ່ ທພລ ກັບ​ທ່ານ ຮອງ​ສາດ­ສະ­ດາ­ຈານ ບຸນ​ລ້ວນ ດ້ວງ​ເງິນ ຜູ້­ອຳ­ນວຍ­ການ ສລຍ ໂດຍ​ມີ​ທ່ານ​ນາງ ໂພ­ທິ​ຈັນ ທຳ​ມະ​ເທ­ວາ ຮອງ​ຫົວ­ໜ້າ​ກົມ​ຄຸ້ມ​ຄອງ​ທະ­ນາ­ຄານ​ທຸ­ລະ​ກິດ ທະ­ນາ­ຄານ​ແຫ່ງ ສປປ ລາວ ທ່ານ​ຮອງ​ສາດ­ສະ­ດາ­ຈານ ສົມ​ຈັນ ບຸນ​ພັນ​ມີ ທ່ານ ໂຢ​ຊິ​ຮາ​ລຸ ໂຢ​ເນ​ຢາ​ມະ ຜູ້­ຕາງ­ໜ້າ​ອົງ­ການ​ໄຈ​ກາ​ປະ­ຈຳ​ລາວ ແລະ ທ່ານ ດາວ​ວອນ ພະ­ຈັນ​ທະ​ວົງ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ບົດ​ບັນ­ທຶກ​ຄວາມ​ເຂົ້າ­ໃຈ​ສະ­ບັບ​ນີ້ ໄດ້​ຮັບ​ການ​ລົງ​ນາມ ພາຍ​ໃຕ້​ການ​ຮ່ວມ​ມື​ຂອງ​ອົງ­ການ​ໄຈ​ກາ​ໃນ​ຂະ­ແໜງ­ການ​ພັດ­ທະ­ນາ SME ໂດຍ​ມີ​ຈຸດ­ປະ­ສົງ​ໃຫ້ ທພລ ແລະ ສລຍ ມີ​ການ​ຮ່ວມ​ມື​ຢ່າງ​ຈິງ​ຈັງ ເພື່ອ​ອຳ­ນວຍ​ຄວາມ​ສະ­ດວກ​ໃນ​ການ​ສົ່ງ­ເສີມ SMEs ແນ­ໃສ່​ການ​ສ້າງ​ຄວາມ​ເຂັ້ມ­ແຂງ​ທາງ​ດ້ານ​ຄວາມ​ອາດ​ສາ­ມາດ​ໃຫ້ SMEs ພາຍ​ໃຕ້​ການ​ຮ່ວມ​ມື​ກັນ​ດ້ວຍ​ການ​ສະ­ໜອງ​ການ​ສຳ​ມະ​ນາ ໂຄງ­ການ​ເຝິກ­ອົບ­ຮົມ​ຂໍ້​ມູນ​ທາງ​ດ້ານ​ການ​ເງິນ ແລະ ອື່ນໆ.

    ທ່ານ​ຜູ້­ອຳ­ນວຍ­ການ​ໃຫຍ່ ທພລ ກ່າວ​ວ່າ: ນັບ​ແຕ່​ປີ 2008 ເປັນ­ຕົ້ນ​ມາ ທພລ ໄດ້​ຮັບ​ການ​ມອບ​ໝາຍ​ຈາກ​ຂັ້ນ​ເທິງ ໃຫ້​ເນັ້ນ​ບໍ­ລິ­ການ​ສິນ​ເຊື່ອ ເພື່ອ​ສົ່ງ­ເສີມ ແລະ ພັດ­ທະ­ນາ​ວິ​ສາ​ຫະ​ກິດ SME ບົນ​ພື້ນ­ຖານ​ການ​ໄລ່​ລຽງ​ທຸ­ລະ​ກິດ​ຢ່າງ​ເຕັມ​ສ່ວນ ຊຶ່ງ​ປັດ­ຈຸ­ບັນ ມີ​ຍອດ​ສິນ​ເຊື່ອ​ສຳ­ລັບ SME ກວມ​ເຖິງ 70,54% ຂອງ​ຍອດ​ສິນ​ເຊື່ອ​ທັງ​ໝົດ ແລະ ກວມ​ເອົາ 99,51% ຂອງ​ຈຳ­ນວນ​ລູກ​ຄ້າ​ທັງ​ໝົດ ທພລ ມີ​ສາ­ຂາ 18 ແຫ່ງ ໜ່ວຍ​ບໍ­ລິ­ການ 79 ແຫ່ງ ແລະ ສະ­ໜອງ​ການ​ບໍ­ລິ­ການ​ທາງ​ດ້ານ​ການ​ເງິນ​ຫຼາຍ​ປະ­ເພດ ເພື່ອ​ສົ່ງ­ເສີມ SMEs ແລະ ໄດ້​ພັດ­ທະ­ນາ​ຫັນ​ເອົາ​ການ​ບໍ­ລິ­ການ​ຂອງ​ທະ­ນາ­ຄານ​ໄປ​ສູ່​ຄວາມ​ທັນ​ສະ­ໄໝ ເພື່ອ​ຮອງ​ຮັບ​ກັບ​ການ​ບໍ­ລິ­ການ​ຮັບ​ໃຊ້​ສັງ­ຄົມ ສ້າງ​ຄວາມ​ສະ­ດວກ​ວ່ອງ­ໄວ, ເພື່ອ​ຮັບ­ປະ­ກັນ​ໃຫ້ ທພລ ສາ­ມາດ​ແຂ່ງ­ຂັນ​ດ້ານ​ການ​ໃຫ້​ບໍ­ລິ­ການ​ໃນ​ຍຸກ​ປັດ­ຈຸ­ບັນ.

    ປັດ­ຈຸ­ບັນ ທພລ ມີ​ຜະ­ລິດ​ຕະ​ພັນ​ທາງ​ດ້ານ​ສິນ​ເຊື່ອ​ເພື່ອ​ສົ່ງ­ເສີມ SME ຫຼາຍ​ປະ­ເພດ​ໃນ​ທົ່ວ​ປະ­ເທດ ໃນ​ນີ້ ມີ​ຕູ້ ATM ຈຳ­ນວນ 227 ຕູ້ ທີ່​ສາ­ມາດ​ບໍ­ລິ­ການ​ຊຳ­ລະ​ຄ່າ​ໄຟ­ຟ້າ ຄ່າ​ນ້ຳ​ປະ­ປາ ຄ່າ​ໂທລະ­ສັບ​ແບບ​ຕັ້ງ​ໂຕະ ມື​ຖື ຊຳ­ລະ​ອາ­ກອນ ແລະ ຊື້​ຫວຍ​ໃຫ້​ບໍ­ລິ­ການ​ບັດ Debit Union Pay ເປັນ​ບັດ​ທີ່​ມີ​ປະ­ສິດ­ທິ­ພາບ ມີ​ຄວາມ​ປອດ​ໄພ​ສູງ ແລະ ທພລ ກໍ​ເປັນ​ທະ­ນາ­ຄານ​ທຳ​ອິດ​ໃນ ສປປ ລາວ ທີ່​ໄດ້​ຍົກ​ລະ­ດັບ​ການ​ໃຫ້​ບໍ­ລິ­ການ​ບັດ ATM ພາຍ​ໃນ​ຈາກ​ບັດ​ທີ່​ເປັນ​ແບບ​ແຖບ​ແມ່​ເຫຼັກ ມາ​ເປັນ​ບັດ Chip ແລະ ເປັນ​ທັງ​ບັດ​ສາ­ກົນ​ໃນ​ບັດ​ດຽວ ສາ­ມາດ​ນຳ​ໃຊ້​ຫຼາຍ​ກວ່າ 160 ປະ­ເທດ​ທົ່ວ​ໂລກ ນອກ​ນີ້​ຍັງ​ມີ​ລະ­ບົບ Mobile Banking ຜ່ານ​ແອັບ LDB Trust ທີ່​ສາ­ມາດ​ໃຊ້​ຊຳ­ລະ​ຄ່າ​ໄຟ­ຟ້າ ຄ່າ​ນ້ຳ​ປະ­ປາ-ໂທລະ­ສັບ ຊື້​ບັດ​ຕື່ມ​ເງິນ ຊື້​ຫວຍ ຊຳ­ລະ​ອາ­ກອນ ສິນ​ເຊື່ອ​ໂຄ​ລາວ ຄ່າ​ງວດ​ຜ່ອນ​ເຄື່ອງ​ກັບ​ອີ​ອອນ ຊຳ­ລະ​ຄ່າ​ປະ­ກັນ​ສັງ­ຄົມ (ຜູ້​ປະ­ກັນ​ຕົນ​ສະ­ໝັກ​ໃຈ​ຢູ່​ນະ­ຄອນ­ຫຼວງ​ວຽງ​ຈັນ) ຊຳ­ລະ​ຄ່າ​ສິນ­ຄ້າ/ຄ່າ​ບໍ­ລິ­ການ​ຕ່າງໆ​ດ້ວຍ QR Code (LDB Pay) ໂອນ​ເງິນ​ລະ­ຫວ່າງ​ບັນ­ຊີ​ພາຍ​ໃນ ທພລ ໂອນ​ເງິນ​ໃຫ້​ບຸກ­ຄົນ​ທີ່​ບໍ່​ມີ​ບັນ­ຊີ​ຢູ່ ທພລ ແລະ ອື່ນໆ.

    ນອກ​ນີ້ ຍັງ​ມີ​ຜະ­ລິດ​ຕະ​ພັນ​ເຄື່ອງ​ຮູດ​ບັດ EDC ໃຫ້​ບໍ­ລິ­ການ​ບັດ​ສາ­ກົນ​ຖອນ­ເງິນ​ໄດ້ ເຊັ່ນ: ບັດ VISA MASTER CUP JCB ແລະ DISCOVER ໄດ້​ທົ່ວ​ລະ­ບົບ ຜະ­ລິດ​ຕະ​ພັນ​ບໍ­ລິ­ການ​ຊຳ­ລະ​ສະ​ສາງ​ຕ່າງ­ປະ­ເທດ ຜ່ານ​ລະ­ບົບ​ໂອນ​ເງິນ​ດ່ວນ Western Union ແລະ ບໍ­ລິ­ການ​ຊຳ­ລະ​ສະ​ສາງ​ຕ່າງ­ປະ­ເທດ​ຜ່ານ​ລະ­ບົບ SWIFT ແລະ ບໍ­ລິ­ການ​ໜັງ­ສື​ສິນ​ເຊື່ອ LC ຊຳ­ລະ​ອາ­ກອນ​ຜ່ານ​ທະ­ນາ­ຄານ​ພັດ­ທະ­ນາ​ລາວ ຜ່ານ​ລະ­ບົບ Easy Tax ລະ­ບົບ​ສັ່ງ​ຈ່າຍ​ງົບ­ປະ­ມານ​ຜ່ານ​ທະ­ນາ­ຄານ​ພັດ­ທະ­ນາ​ລາວ ຜ່ານ​ລະ­ບົບ Smart Cash ແລະ ນອກ​ນັ້ນ ທພລ ຍັງ​ມີ 2 ບໍ­ລິ­ສັດ​ລູກ​ຄື: ບໍ­ລິ­ສັດ ລ້ານ​ຊ້າງ​ປະ­ກັນ​ໄພ ມະ­ຫາ­ຊົນ ແລະ ບໍ­ລິ­ສັດ ຫຼັກ​ຊັບ​ລ້ານ​ຊ້າງ ມະ­ຫາ­ຊົນ.

ຂ່າວທີ່ກ່ຽວຂ້ອງ