ມອບ-ຮັບໜ້າທີ່ ຫົວໜ້າບັນນາທິການໜັງສືພິມວຽງຈັນໃໝ່

310 18 ກ.ພ. 2019 ຂ່າວໜ້າ​ໜຶ່ງ
ມອບ-ຮັບໜ້າທີ່ ຫົວໜ້າບັນນາທິການໜັງສືພິມວຽງຈັນໃໝ່

    ອີງ​ຕາມ​ຂໍ້​ຕົກ­ລົງ​ຂອງ​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທີ່​ໄດ້​ອະ­ນຸ­ມັດ​ໃຫ້​ທ່ານ ທອງ​ເລື່ອນ ພິມ​ມະ​ສານ ຫົວ­ໜ້າ​ບັນ­ນາ­ທິ­ການ​ໜັງ­ສື­ພິມ​ວຽງ​ຈັນ​ໃໝ່ ແລະ ວຽງ​ຈັນ​ທຸ­ລະ​ກິດ-ສັງ­ຄົມ​ເຂົ້າ​ຮັບ​ເບ້ຍ​ບຳ­ນານ​ຕາມ​ກົດ­ໝາຍ​ລັດ­ຖະ­ກອນ ດັ່ງ­ນັ້ນ ທ່ານ​ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ ຈຶ່ງ​ໄດ້​ແຕ່ງ­ຕັ້ງ​ທ່ານ​ນາງ ແກ້ວ​ຊ້ອນ ຈັນ­ທະ​ນາມ ຮອງ​ຫົວ­ໜ້າ​ບັນ­ນາ­ທິ­ການ​ໜັງ­ສື​ພິ​ວຽງ​ຈັນ​ໃໝ່ ແລະ ວຽງ​ຈັນ​ທຸ­ລະ​ກິດ-ສັງ­ຄົມ ເປັນ​ຜູ້​ຮັກ­ສາ​ການ​ຫົວ­ໜ້າ​ບັນ­ນາ­ທິ­ການ​ໜັງ­ສື­ພິມ​ວຽງ​ຈັນ​ໃໝ່ ແລະ ວຽງ​ຈັນ​ທຸ­ລະ​ກິດ-ສັງ­ຄົມ ເພື່ອ​ສືບ­ຕໍ່​ນຳ­ພາ​ພະ­ນັກ­ງານ​ເຮັດ​ວຽກ​ງານ​ວິ­ຊາ​ສະ­ເພາະ​ໃຫ້​ສຳ­ເລັດ​ເປັນ​ກ້າວໆ.

    ພິ­ທີ​ມອບ-ຮັບ​ໜ້າ­ທີ່​ລະ­ຫວ່າງ​ທ່ານ ທອງ​ເລື່ອນ ພິມ​ມະ​ສານ ຫົວ­ໜ້າ​ບັນ­ນາ­ທິ­ການ​ໜັງ­ສື­ພິມ​ວຽງ​ຈັນ​ໃໝ່ ແລະ ວຽງ​ຈັນ​ທຸ­ລະ​ກິດ-ສັງ­ຄົມ​ຜູ້​ເກົ່າ ແລະ ທ່ານ​ນາງ ແກ້ວ​ຊ້ອນ ຈັນ­ທະ​ນາມ ຮັກ­ສາ​ການ​ຫົວ­ໜ້າ​ບັນ­ນາ­ທິ­ການ​ໜັງ­ສື­ພິມ​ວຽງ​ຈັນ​ໃໝ່ ແລະ ວຽງ​ຈັນ​ທຸ­ລະ​ກິດ-ສັງ­ຄົມ ໄດ້​ຈັດ​ຂຶ້ນ​ວັນ​ທີ 14 ກຸມ­ພາ 2019 ທີ່​ສຳ­ນັກ­ງານ​ໜັງ­ສື­ພິມ​ວຽງ​ຈັນ​ໃໝ່ ແລະ ວຽງ​ຈັນ​ທຸ­ລະ​ກິດ-ສັງ­ຄົມ ໂດຍ​ມີ​ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ ທ່ານ​ຮອງ​ຫົວ­ໜ້າ​ພະ​ແນກ ຫົວ­ໜ້າ​ຂະ­ແໜງ­ການ​ທີ່​ກ່ຽວ­ຂ້ອງ ແລະ ພະ­ນັກ­ງານ​ວິ­ຊາ​ການ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ຄຳ​ປະ­ດິດ ເຂັມ​ມາ­ນິດ ໄດ້​ໃຫ້​ກຽດ​ໂອ້​ລົມ​ເຊິ່ງ​ທ່ານ​ໄດ້​ເນັ້ນ​ໃຫ້​ຄະ­ນະ​ບັນ­ນາ­ທິ­ການ​ໜັງ­ສື­ພິມ​ວຽງ​ຈັນ​ໃໝ່ ແລະ ວຽງ​ຈັນ​ທຸ­ລະ​ກິດ-ສັງ­ຄົມ​ສືບ­ຕໍ່​ເຮັດ​ວຽກ​ງານ​ດ້ານ​ແນວ​ຄິດ-ການ­ເມືອງ​ໃຫ້​ສະ­ມາ­ຊິກ​ພັກ ແລະ ພະ­ນັກ­ງານ​ວິ­ຊາ​ການ​ໃຫ້​ມີ​ຄວາມ​ໜັກ​ແໜ້ນ​ເຂັ້ມ­ແຂງ ເພື່ອ​ພ້ອມ​ກັນ​ເຮັດ​ໜ້າ­ທີ່​ວິ­ຊາ​ສະ­ເພາະ​ທີ່​ພັກ-ລັດ​ມອບ​ໝາຍ​ໃຫ້​ສຳ­ເລັດ ເປັນ­ຕົ້ນ ກໍ​ແມ່ນ​ວຽກ​ງານ​ສື່​ມວນ​ຊົນ ໃນ​ການ​ເປັນ​ກະ­ບອກ​ສຽງ​ອັນ​ແຫຼມ​ຄົມ ໃນ​ການ​ໂຄ­ສະ­ນາ​ເຜີຍ­ແຜ່​ແນວ­ທາງ​ນະ­ໂຍ­ບາຍ​ຂອງ​ພັກ ລະ­ບຽບ​ກົດ­ໝາຍ​ຂອງ​ລັດ ແລະ ເຫດ­ການ​ຕ່າງໆ​ທີ່​ເກີດ​ຂຶ້ນ​ຢູ່​ພາຍ​ໃນ ແລະ ຕ່າງ­ປະ­ເທດ​ໃຫ້​ກວ້າງ­ຂວາງ ພ້ອມ​ນີ້ ກໍ​ເພີ່ມ​ການ​ຈັດ​ພິມ​ຈຳ­ໜ່າຍ​ໃຫ້​ຫຼາຍ​ຂຶ້ນ ແລະ ເອົາ­ໃຈ­ໃສ່​ເຮັດ​ການ​ຕະ­ຫຼາດ​ຊອກ​ຫາ​ໂຄ­ສະ­ນາ​ມາ​ລົງ​ໜັງ­ສື­ພິມ ເພື່ອ​ສ້າງ​ລາຍ​ຮັບ​ໃນ​ການ​ກຸ້ມ​ຕົນ​ເອງ​ທາງ​ດ້ານ​ງົບ­ປະ­ມານ ແລະ  ສະ­ໜອງ​ຂໍ້​ມູນ​ຂ່າວ­ສານ​ໃຫ້​ໜັກ​ແໜ້ນ​ເຂັ້ມ­ແຂງ​ຂຶ້ນ​ໄປ​ເລື້ອຍໆ.

ຂ່າວທີ່ກ່ຽວຂ້ອງ