ຂ່າວຫຼ້າສຸດ

ຄາດຄະເນໝົດປີສາມາດປະຕິບັດລາຍຮັບ 25 ພັນຕື້ກວ່າກີບ

803 15 ກ.ພ. 2019 ຂ່າວໜ້າ​ໜຶ່ງ
ຄາດຄະເນໝົດປີສາມາດປະຕິບັດລາຍຮັບ 25 ພັນຕື້ກວ່າກີບ

    ກະ­ຊວງ​ການ​ເງິນ ຈັດ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ພັກ ເປີດ​ກວ້າງ ຄັ້ງ​ທີ 7 ສະ­ໄໝ​ທີ II ຂຶ້ນ​ວັນ​ທີ 13 ກຸມ­ພາ 2019 ທີ່​ກະ­ຊວງ​ຂອງ​ຕົນ ໂດຍ​ເປັນ​ປະ­ທານ​ຂອງ​ສະ­ຫາຍ ສົມ​ດີ ດວງ​ດີ ກຳ­ມະ­ການ​ສູນ​ກາງ​ພັກ ເລ­ຂາ​ຄະ­ນະ​ພັກ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ມີ​ຮອງ​ເລ­ຂາ​ຄະ­ນະ​ພັກ ຄະ­ນະ​ປະ­ຈຳ​ພັກ ຄະ­ນະ​ພັກ ແລະ ເລ­ຂາ​ຄະ­ນະ​ພັກ​ຮາກ​ຖານ​ເຂົ້າ​ຮ່ວມ.

    ສະ­ຫາຍ ສົມ​ດີ ດວງ​ດີ ໄດ້​ສະ­ຫຼຸບ​ຕີ​ລາ­ຄາ​ການ​ຊີ້​ນຳ-ນຳ­ພາ​ຮອບ­ດ້ານ​ຂອງ​ຄະ­ນະ​ພັກ​ກະ­ຊວງ​ການ​ເງິນ​ປີ 2018 ແລະ ທິດ​ທາງ​ປີ 2019 ໂດຍ​ໄດ້​ເອົາ­ໃຈ­ໃສ່​ຊີ້​ນຳ-ນຳ­ພາ​ຄະ­ນະ​ພັກ​ແຕ່​ລະ​ຂັ້ນ ເອົາ­ໃຈ­ໃສ່​ປະ­ຕິ­ບັດ​ໜ້າ­ທີ່​ການ­ເມືອງ​ທີ່​ໄດ້​ຮັບ​ມອບ​ໝາຍ​ໃຫ້​ມີ​ປະ­ສິດ­ທິ­ພາບ ແລະ ມີ​ຜົນ­ສຳ­ເລັດ​ໃນ​ແຕ່​ລະ​ດ້ານ ພ້ອມ​ດຽວ​ກັນ​ນັ້ນ ຄະ­ນະ​ພັກ​ແຕ່​ລະ​ຂັ້ນ ໄດ້​ສຸມ​ໃສ່​ແກ້​ໄຂ​ສະ­ພາບ​ແນວ​ຄິດ​ຂອງ​ພະ­ນັກ­ງານ​ຈຳ­ນວນ​ໜຶ່ງ ທີ່​ມີ​ຄວາມ​ຮັບ­ຜິດ­ຊອບ​ທາງ​ດ້ານ​ການ­ເມືອງ​ບໍ່​ທັນ​ສູງ ແນວ​ຄິດ​ເຫັນ­ແກ່​ຜົນ​ປະ­ໂຫຍດ​ສ່ວນ​ຕົວ ຂາດ​ຄວາມ​ກະ​ຕື​ລື​ລົ້ນ​ສວຍ​ໃຊ້​ໜ້າ­ທີ່ ທີ່​ບໍ່​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ ໃຫ້​ມີ​ການ​ຫັນ­ປ່ຽນ​ຢ່າງ​ຕັ້ງ­ໜ້າ ໂດຍ​ການ​ນຳ​ໃຊ້​ຫຼາຍ​ຮູບ​ແບບ​ຫຼາຍ​ວິ­ທີ ເປັນ­ຕົ້ນ ໄດ້​ຫັນ​ເອົາ​ແນວ­ທາງ​ມະ­ຕິ​ຄຳ​ສັ່ງ​ຂອງ​ພັກ ແລະ ບັນ­ດາ​ກົດ­ໝາຍ​ລະ­ບຽບ​ການ​ທີ່​ກ່ຽວ­ຂ້ອງ​ມູນ­ເຊື້ອ​ຂອງ​ພັກ​ຂອງ​ຊາດ ມາ​ຈັດ​ຕັ້ງ​ເຜີຍ­ແຜ່​ໃຫ້​ພະ­ນັກ­ງານ​ລັດ­ຖະ­ກອນ​ເປັນ​ປົກ­ກະ­ຕິ ປັບ­ປຸງ​ການ­ຈັດ­ຕັ້ງ​ບັນ­ດາ​ຮາກ​ຖານ​ພັກ​ໃຫ້​ສອດ­ຄ່ອງ​ກັບ​ການ­ຈັດ­ຕັ້ງ​ຂອງ​ລັດ ຕາມ​ກົດ​ລະ­ບຽບ​ຂອງ​ພັກ​ທີ່​ໄດ້​ກຳ­ນົດ​ໄວ້​ເຊັ່ນ: ໄດ້​ສ້າງ­ຕັ້ງ​ໜ່ວຍ​ພັກ​ເພີ່ມ​ຂຶ້ນ 12 ໜ່ວຍ​ພັກ ໃນ​ນີ້ ໜ່ວຍ​ພັກ​ຮາກ​ຖານ 1 ໜ່ວຍ ໜ່ວຍ​ພັກ​ທີ່​ຂຶ້ນ​ກັບ​ຄະ­ນະ​ຮາກ​ຖານ 11 ໜ່ວຍ ປັດ­ຈຸ­ບັນ​ມີ 46 ຮາກ​ຖານ​ພັກ ໃນ​ນັ້ນ ມີ 5 ຄະ­ນະ​ພັກ​ຮາກ​ຖານ 28 ໜ່ວຍ​ຂຶ້ນ​ກັບ​ຄະ­ນະ​ພັກ​ຮາກ​ຖານ ແລະ 13 ໜ່ວຍ​ພັກ​ຮາກ​ຖານ ຜ່ານ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ມາດ​ຕະ­ການ ໃນ​ການ​ປັບ­ປຸງ​ທາງ​ດ້ານ​ແນວ​ຄິດ​ທົ່ວ​ອົງ­ຄະ​ນະ​ພັກ​ກະ­ຊວງ​ການ​ເງິນ ໃນ​ໄລ­ຍະ​ຜ່ານ​ມາ​ສາ­ມາດ​ຕີ​ຄາ​ລາ​ໄດ້​ວ່າ ສະ­ມາ­ຊິກ​ພັກ​ພະ­ນັກ­ງານ-ລັດ­ຖະ­ກອນ​ຈຳ­ນວນ​ຫຼາຍ ມີ​ແນວ​ຄິດ​ຫຼັກ​ໝັ້ນ​ການ­ເມືອງ​ໜັກ​ແໜ້ນ ທຸ່ນ​ທ່ຽງ ແລະ ປະ­ຕິ­ບັດ​ວຽກ​ງານ​ທີ່​ໄດ້​ຮັບ​ມອບ​ໝາຍ ແລະ ມີ​ການ​ຫັນ­ປ່ຽນ​ດີ​ຂຶ້ນ.

    ພ້ອມ​ນີ້ ກໍ​ໄດ້​ເອົາ­ໃຈ­ໃສ່​ດ້ານ​ວິ­ຊາ​ສະ­ເພາະ​ກ່ຽວ​ກັບ​ລາຍ​ຮັບ​ງົບ­ປະ­ມານ​ປີ 2018 ທີ່​ສະ­ພາ​ຮັບ­ຮອງ​ລວມ​ຍອດ​ລາຍ​ຮັບ 25.452 ຕື້​ກີບ ໃນ​ນີ້ ມີ​ລາຍ​ຮັບ​ພາຍ​ໃນ 22.700 ຕື້​ກີບ ແລະ ລາຍ​ຮັບ​ຈາກ​ການ​ຊ່ວຍ­ເຫຼືອ​ລ້າ 2.752 ຕື້​ກີບ ຜ່ານ​ມາ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ​ເກັບ​ໄດ້​ທັງ​ໝົດ 17.063,88 ຕື້​ກີບ ເທົ່າ​ກັບ 67,04% ໃນ​ນີ້ ມີ​ລາຍ​ຮັບ​ຈາກ​ການ​ຊ່ວຍ­ເຫຼືອ​ລ້າ 1.243,86 ຕື້​ກີບ ເທົ່າ​ກັບ 69,69% ລາຍ​ຮັບ​ພາຍ​ໃນ​ຂອງ​ບາງ​ຂະ­ແໜງ­ການ ທີ່​ຄາດ​ວ່າ​ຈະ​ເກັບ​ໄດ້​ເກີນ​ແຜນ​ແມ່ນ​ຈາກ​ລາຍ​ຮັບ​ອື່ນໆ ໂດຍ​ສະ­ເພາະ ເງິນ​ຊຳ­ລະ​ໜີ້​ສິນ​ຂອງ​ລັດ​ວິ​ສາ​ຫະ​ກິດ ເງິນ​ປັນ​ຜົນ​ຈາກ​ການ​ຂາຍ​ຮຸ້ນ​ຂອງ​ບໍ­ລິ­ສັດ​ລົງ­ທຶນ ນອກ​ນີ້​ຍັງ​ມີ​ລາຍ​ຮັບ​ຂະ­ແໜງ​ວິ­ຊາ​ການ ເພື່ອ​ຈົດ​ຮັບ-ຈົດ​ຈ່າຍ​ເພີ່ມ ຕາມ​ການ​ສະ­ເໜີ​ຂອງ​ຂະ­ແໜງ­ການ ແລະ ທ້ອງ­ຖິ່ນ​ນຳ​ອີກ​ປະ­ຕິ­ບັດ​ລາຍ​ຈ່າຍ​ໄດ້ 22.363,61 ຕື້​ກີບ ເທົ່າ​ກັບ 68,16% ໃນ​ນັ້ນ ໄດ້​ເອົາ­ໃຈ­ໃສ່​ບັນ­ດາ​ລາຍ​ຈ່າຍ​ບຸ­ລິ­ມະ­ສິດ​ເງິນ­ເດືອນ ເງິນ​ນະ­ໂຍ­ບາຍ​ຕ່າງໆ​ປະ­ຕິ­ບັດ​ໄດ້ 70% ຊຳ­ລະ​ໜີ້​ສິນ 74,64% ແລະ ລາຍ​ຈ່າຍ​ບໍ­ລິ­ຫານ​ກົງ­ຈັກ​ລັດ​ຂອງ​ຂະ­ແໜງ­ການ ແລະ ທ້ອງ­ຖິ່ນ​ປະ­ຕິ­ບັດ​ໄດ້ 52% ພ້ອມ​ນັ້ນ ໄດ້​ຈ່າຍ​ເງິນ​ລົງ­ທຶນ ແລະ ໜີ້​ສິນ​ອື່ນໆ ຄາດ​ຄະ­ເນ​ປະ­ຕິ­ບັດ​ລາຍ​ຮັບ 3 ເດືອນ​ທ້າຍ​ປີ ລາຍ​ຮັບ​ລວມ​ປະ­ມານ 8.432,28 ຕື້​ກີບ ເທົ່າ​ກັບ 33,13% ໃນ​ນີ້ ລາຍ​ຮັບ​ພາຍ​ໃນ 6.601,33 ຕື້​ກີບ ເທົ່າ​ກັບ 29,08% ຄາດ​ຄະ­ເນ​ໝົດ​ປີ ສາ­ມາດ​ປະ­ຕິ­ບັດ​ໄດ້​ທັງ​ໝົດ 25.496,15 ຕື້​ກີບ ເທົ່າ​ກັບ 100,17% ໃນ​ນີ້ ລາຍ​ຮັບ​ພາຍ​ໃນ​ປະ­ຕິ­ບັດ​ໄດ້ 22.421.32 ຕື້​ກີບ ເທົ່າ​ກັບ 98,77% ໃນ​ນີ້ ລາຍ​ຮັບ​ສ່ວຍ​ສາ​ອາ­ກອນ​ປະ­ຕິ­ບັດ​ໄດ້ 94,33% ລາຍ​ຮັບ​ພາ­ສີ​ປະ­ຕິ­ບັດ​ໄດ້ 96,07% ລາຍ​ຮັບ​ຄຸ້ມ​ຄອງ​ວິ​ສາ​ຫະ​ກິດ​ລັດ​ລົງ­ທຶນ ແລະ ປະ­ກັນ​ໄພ​ປະ­ຕິ­ບັດ​ໄດ້ 172,27% ລາຍ​ຮັບ​ຈາກ​ຊັບ​ສິນ​ລັດ​ປະ­ຕິ­ບັດ​ໄດ້ 103,85% ຄາດ​ຄະ­ເນ​ໝົດ​ປີ 2018 ຕົວ​ເລກ​ໃນ​ເບື້ອງ​ຕົ້ນ​ຢູ່​ໃນ​ລະ­ດັບ 32.692.74 ຕື້​ກີບ ເທົ່າ​ກັບ 99,64% ໃນ​ນັ້ນ ລວມ​ທັງ​ລາຍ​ຂະ­ແໜງ ແລະ ທ້ອງ­ຖິ່ນ ສະ­ເໜີ​ເຂົ້າ​ໃນ​ທ້າຍ​ປີ ມີ​ລາຍ​ຈ່າຍ​ວິ­ຊາ​ການ ເງິນ​ບຳ​ເນັດ​ເກັບ​ລາຍ​ຮັບ​ເກີນ​ແຜນ​ຂອງ​ບັນ­ດາ​ແຂວງ ແລະ ແກ້​ໄຂ​ໄພ­ພິ­ບັດ 100 ຕື້​ກີບ ໄດ້​ຈັດ​ສັນ​ເຂົ້າ​ໃນ​ລາຍ​ຈ່າຍ​ການ​ລົງ­ທຶນ​ລັດ.

    ໂດຍ​ອີງ­ໃສ່​ຕົວ​ເລກ​ຄາດ​ຄະ­ເນ​ການ­ຈັດ­ຕັ້ງ​ປະ­ຕິ­ບັດ​ລາຍ​ຮັບ ແລະ ລາຍ​ຈ່າຍ​ງົບ­ປະ­ມານ​ໝົດ​ປີ 2018 ຂ້າງ​ເທິງ ຄາດ​ວ່າ​ປີ 2018 ຈະ​ມີ​ການ​ຂາດ­ດູນ​ງົບ­ປະ­ມານ 7.196,59 ຕື້​ກີບ ຫຼື ປະ­ມານ 4,72% ຂອງ GDP ແຜນ​ຄາດ​ດູນ​ທີ່​ສະ­ພາ​ຮັບ­ຮອງ 7.357,41 ຕື້​ກີບ ຫຼື ເທົ່າ​ກັບ 4,92% ຂອງ GDP ເຊິ່ງ GDP ຄາດ​ວ່າ​ຈະ​ບັນ­ລຸ​ໄດ້ 152.425 ຕື້​ກີບ.

ຂ່າວທີ່ກ່ຽວຂ້ອງ