ລາວໂທລະຄົມ ສ້າງລາຍຮັບໄດ້ເກືອບ 2 ພັນຕື້ກີບ

601 15 ກ.ພ. 2019 ຂ່າວໜ້າ​ໜຶ່ງ
ລາວໂທລະຄົມ ສ້າງລາຍຮັບໄດ້ເກືອບ 2 ພັນຕື້ກີບ

    ບໍ­ລິ­ສັດ ລັດ​ວິ​ສາ​ຫະ​ກິດ​ລາວ​ໂທລະ​ຄົມ­ມະ­ນາ­ຄົມ (ລລທ) ຈັດ​ກອງ​ປະ­ຊຸມ​ສະ­ຫຼຸບ​ຜົນ­ງານ​ການ­ເຄື່ອນ­ໄຫວ​ວຽກ​ງານ ປະ­ຈຳ​ປີ 2018 ຂຶ້ນ​ວັນ​ທີ 13 ກຸມ­ພາ 2019 ຢູ່​ສຳ­ນັກ­ງານ​ໃຫຍ່​ບໍ­ລິ­ສັດ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ຖາ­ວອນ ສົມ​ສະ­ກຸນ ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ລລທ ມີ​ທ່ານ ທັນ​ສະ­ໄໝ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ ກຳ­ມະ­ການ​ສະ­ພາ​ຂາ​ຮຸ້ນ ຄະ­ນະ​ອຳ­ນວຍ​ການ​ຈາກ ລລທ ສູນ​ກາງ ສາ­ຂາ​ແຂວງ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ໃນ​ກອງ​ປະ­ຊຸມ​ທ່ານ ຖາ­ວອນ ສົມ​ສະ­ກຸນ ໄດ້​ຍົກ​ໃຫ້​ເຫັນ​ຜົນ­ງານ​ພົ້ນ​ເດັ່ນ​ທີ່ ລລທ ຍາດ​ມາ​ໄດ້​ໃນ​ໄລ­ຍະ​ໜຶ່ງ​ປີ­ຜ່ານ­ມາ ເປັນ­ຕົ້ນ ໄດ້​ລົງ­ທຶນ​ຂະ­ຫຍາຍ​ຕາ​ໜ່າງ​ລະ­ບົບ​ໂທລະ​ຄົມ­ມະ­ນາ­ຄົມ​ໃນ​ມູນ​ຄ່າ​ປະ­ມານ 485 ຕື້​ກີບ ຫຼື 60 ລ້ານ​ໂດ​ລາ​ສະ­ຫະ­ລັດ ປັດ­ຈຸ­ບັນ ລລທ ມີ​ສະ­ຖາ­ນີ​ມື​ຖື 2G 3G 4G ແລະ 4,5G ທັງ​ໝົດ 6.653 ສະ­ຖາ­ນີ ມີ​ສັນ­ຍານ​ໂທລະ­ສັບ​ມື​ຖື​ຄວບ​ຄຸມ​ໄດ້ 18 ແຂວງ 148 ເມືອງ ແລະ 8.500 ກວ່າ​ບ້ານ ມີ​ລູກ​ຄ້າ​ໃຊ້​ໂທລະ­ສັບ​ມື​ຖື​ໃນ​ລະ­ບົບ 1,6 ລ້ານ​ເລກ​ໝາຍ ໂທລະ­ສັບ​ຕັ້ງ​ໂຕະ 40 ພັນ​ເລກ​ໝາຍ ໂທລະ­ສັບ​ວິນ​ໂຟນ 430 ພັນ​ເລກ​ໝາຍ ແລະ ອິນ​ເຕີ​ເນັດ 1,4 ລ້ານ​ລູກ​ຄ້າ ສາ­ມາດ​ສ້າງ​ລາຍ​ຮັບ​ໄດ້​ທັງ​ໝົດ 1.868,7 ຕື້​ກີບ (ລວມ​ອາ­ກອນ) ເພີ່ມ​ຂຶ້ນ​ຈາກ​ປີ 2017 ເທົ່າ​ກັບ 1,4% ໃນ​ນັ້ນ ມີ​ກຳ­ໄລ​ສຸດ­ທິ 322,7 ຕື້​ກີບ ສາ­ມາດ​ປະ­ຕິ­ບັດ​ພັນ­ທະ​ໃຫ້​ລັດ­ຖະ­ບານ​ໄດ້​ທັງ​ໝົດ 541,5 ຕື້​ກີບ ເຊິ່ງ​ກວມ​ເອົາ​ອັດ­ຕາ​ສ່ວນ 34,6% ຂອງ​ລາຍ​ຮັບ​ທີ່ ລລທ ປະ­ຕິ­ບັດ​ໄດ້​ໃນ​ປີ 2018.

    ສຳ­ລັບ​ແຜນ­ການ​ປີ 2019 ລລທ ຈະ​ສູ້​ຊົນ​ສ້າງ​ຖານ​ລູກ​ຄ້າ​ໃຫ້​ເພີ່ມ 149.706 ເລກ​ໝາຍ ແລະ ສ້າງ​ລາຍ​ຮັບ​ໃຫ້​ໄດ້​ທັງ​ໝົດ 1.974,1 ຕື້​ກີບ ທຽບ­ໃສ່​ປີ 2018 ເພີ່ມ​ຂຶ້ນ 6,3% ຄາດ​ຄະ­ເນ​ກຳ­ໄລ​ສຸດ­ທິ​ໃຫ້​ໄດ້ 391,2 ຕື້​ກີບ ເພີ່ມ​ຂຶ້ນ 19,8% ແລະ ຄາດ​ຄະ­ເນ​ຈະ​ສາ­ມາດ​ມອບ​ພັນ­ທະ ແລະ ເງິນ​ປັນ​ຜົນ​ໃຫ້​ລັດ­ຖະ­ບານ 579,5 ຕື້​ກີບ ກວມ​ເອົາ​ອັດ­ຕາ​ສ່ວນ​ບໍ່​ຫຼຸດ 28,6% ຂອງ​ລາຍ​ຮັບ​ປີ 2019 ແລະ ຈະ​ລົງ­ທຶນ​ປັບ­ປຸງ ແລະ ຂະ­ຫຍາຍ​ຕາ​ໜ່າງ​ລະ­ບົບ​ໂທລະ​ຄົມ­ມະ­ນາ­ຄົມ ໂດຍ​ສະ­ເພາະ​ອິນ​ເຕີ​ເນັດ ເພື່ອ​ຮັບ­ປະ­ກັນ​ທາງ​ດ້ານ​ປະ­ລິ­ມານ ແລະ ຄຸນ​ນະ​ພາບ​ຂໍ້​ມູນ​ມີ​ຄວາມ​ປອດ​ໄພ ແລະ ເປັນ​ລະ­ບົບ​ທັນ​ສະ­ໄໝ ເພື່ອ​ຮັບ­ປະ­ກັນ​ໃຫ້​ແກ່​ການ​ບໍ­ລິ­ການ​ສັງ­ຄົມ.

ຂ່າວທີ່ກ່ຽວຂ້ອງ