ຂ່າວຫຼ້າສຸດ

ເຊີນທ່ຽວງານບຸນມະໂຫລານສົ່ງເສີມການອ່ານ

694 15 ກ.ພ. 2019 ຂ່າວໜ້າ​ໜຶ່ງ
ເຊີນທ່ຽວງານບຸນມະໂຫລານສົ່ງເສີມການອ່ານ

    ກອງ​ປະ­ຊຸມ​ປຶກ­ສາ​ຫາ­ລື ແລະ ກະ­ກຽມ​ເປີດ​ງານ​ບຸນ­ມະ­ໂຫ­ລານ​ສົ່ງ­ເສີມ​ການ​ອ່ານ ນະ­ຄອນ­ຫຼວງ​ວຽງ​ຈັນ ຄັ້ງ​ທີ 1 ຈັດ​ຂຶ້ນ​ວັນ​ທີ 14 ກຸມ­ພາ 2019 ທີ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ມີ​ບັນ­ດາ​ຮອງ​ຫົວ­ໜ້າ​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ພະ­ແນກ­ການ ແລະ ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ໃນ​ຄັ້ງ​ນີ້ ໄດ້​ມີ​ການ​ປຶກ­ສາ​ຫາ­ລື​ກ່ຽວ​ກັບ​ການ​ແຕ່ງ­ຕັ້ງ​ຄະ­ນະ​ກຳ­ມະ­ການ​ຮັບ­ຜິດ­ຊອບ ແລະ ແຜນ​ການ­ຈັດ­ຕັ້ງ​ປະ­ຕິ­ບັດ ສະ­ເໜີ​ຈຸດ­ປະ­ສົງ ລະ­ດັບ​ຄາດ­ໝາຍ​ຂອງ​ງານ ແລະ ກິດ­ຈະ­ກຳ​ດັ່ງ­ກ່າວ ເວົ້າ​ລວມ​ແລ້ວ ມາ​ເຖິງ​ປັດ­ຈຸ­ບັນ ການ­ຈັດ­ຕັ້ງ​ປະ­ຕິ­ບັດ​ງານ​ດັ່ງ­ກ່າວ​ແມ່ນ​ມີ​ຄວາມ​ພ້ອມ​ແລ້ວ.

    ງານ​ສຳ­ລັບ​ບຸນ­ມະ­ໂຫ­ລານ​ສົ່ງ­ເສີມ​ການ​ອ່ານ ນະ­ຄອນ­ຫຼວງ​ວຽງ​ຈັນ ຄັ້ງ​ທີ 1 ຈັດ​ຂຶ້ນ​ໂດຍ​ການ​ຮ່ວມ​ມື​ຂອງ​ໂຮງ­ພິມ ປານ​ຄຳ ຈຳ­ປາ ຈຳ­ກັດ ແລະ ບໍ­ລິ­ສັດ ເອັກ​ແຊັກ ເຊິ່ງ​ຈະ​ໄດ້​ຈັດ​ຂຶ້ນ​ວັນ​ທີ 7-17 ມີ­ນາ ທີ່​ສູນ​ການ​ຄ້າ​ສາ­ກົນ ເວີ​ລ​ເທຣດ​ເຊັນ​ເຕີ ນະ­ຄອນ­ຫຼວງ​ວຽງ​ຈັນ ເລີ່ມ​ແຕ່​ເວ­ລາ 9:00-21:00 ໂມງ ໃນ​ບຸນ​ດັ່ງ­ກ່າວ ຈະ​ໄດ້​ພົບ​ກັບ​ປຶ້ມ​ອ່ານ 1.000.000 ຫົວ ມີ​ຫຼາຍ​ກວ່າ 5.000 ຫົວ​ເລື່ອງ ໃຫ້​ເລືອກ​ຊື້​ໃນ​ລາ­ຄາ​ເໝາະ​ສົມ ແລະ ເລືອກ​ອ່ານ ພ້ອມ​ທັງ​ມີ​ກິດ­ຈະ­ກຳ​ສົ່ງ­ເສີມ​ການ​ອ່ານ​ຫຼາຍ​ຢ່າງ​ເຊັ່ນ: ກິດ­ຈະ­ກຳ​ມອບ​ປຶ້ມ​ການ​ສຶກ​ສາ ການ​ແຂ່ງ­ຂັນ​ກີ­ລາ ປາ­ຖະ­ກະ­ຖາ ແລະ ການ­ສະ­ແດງ​ສິ­ລະ​ປະ​ວັນ­ນະ­ຄະ­ດີ.

    ການ​ຈັດ​ງານ​ຄັ້ງ​ນີ້ ເພື່ອ​ສະ­ເຫຼີມ­ສະ­ຫຼອງ​ວັນ​ປຶ້ມ​ໂລກ ແລະ ວັນ​ແມ່­ຍິງ​ສາ­ກົນ ວັນ​ທີ 8 ເດືອນ​ມີ­ນາ ພ້ອມ​ນັ້ນ ເປັນ​ການ​ລະ­ດົມ​ໃຫ້​ຄົນ​ລາວ ເລັ່ງ​ເຫັນ​ຄວາມ​ສຳ­ຄັນ​ຂອງ​ການ​ອ່ານ ແລະ ສົ່ງ­ເສີມ​ໃຫ້­ການ​ອ່ານ­ໜັງ­ສື​ຢ່າງ​ຕໍ່​ເນື່ອງ ລວມ​ເຖິງ​ການ​ຊ່ວຍ­ເຫຼືອ​ພໍ່​ແມ່​ຜູ້​ປົກ­ຄອງ​ຄູ ແລະ ບັນ­ນາ­ລັກ ຮັບ​ຮູ້ ແລະ ມີ​ຄວາມ​ເຂົ້າ­ໃຈ ເຕັກ­ນິກ​ວິ­ທີ​ການ​ສົ່ງ­ເສີມ​ການ​ອ່ານ​ແກ່​ເດັກ ແລະ ເຍົາ­ວະ​ຊົນ​ຢ່າງ​ເໝາະ​ສົມ ແລະ ໄດ້​ຮັບ​ຜົນ ນອກ​ນີ້ ຍັງ​ໄດ້​ເປີດ​ໂອ­ກາດ​ໃຫ້​ຄົນ​ລາວ ໄດ້​ສຳ­ຜັດ​ກັບ​ປຶ້ມ​ນາໆຊາດ​ເພື່ອ​ເປີດ​ໂລ​ກະ­ທັດ ແລະ ເບິ່ງ​ເຫັນ​ການ​ພັດ­ທະ­ນາ​ອຸດ­ສາ­ຫະ­ກຳ​ປຶ້ມ​ໃນ​ຕ່າງ­ປະ­ເທດ ຂະ­ນະ​ດຽວ​ກັນ ກໍ​ເປີດ​ໂອ­ກາດ​ໃຫ້​ຄົນ​ຕ່າງ­ປະ­ເທດ ຄົນ​ຕ່າງ​ຊາດ ສຳ­ຜັດ​ກັບ​ປຶ້ມ​ອ່ານ​ຂອງ​ລາວ ແລະ ຍັງ​ເປັນ​ສື່​ກາງ ໃນ​ການ​ສ້າງ​ໂອ­ກາດ​ໃຫ້​ກັບ​ນັກ​ຂຽນ ແລະ ສຳ­ນັກ​ພິມ​ຂອງ​ລາວ ການ­ຈຳ­ໜ່າຍ​ລິ​ຂະ​ສິດ​ໃຫ້​ກັບ​ຕ່າງ­ປະ­ເທດ ຄຽງ​ຄູ່​ກັນ​ນັ້ນ ຍັງ​ເປັນ​ການ​ສົ່ງ­ເສີມ​ໃຫ້​ສຳ­ນັກ​ພິມ​ໃນ​ປະ­ເທດ​ລາວ ເກີດ​ຄວາມ​ຕື່ນ​ຕົວ​ປັບ­ປຸງ ແລະ ພັດ­ທະ­ນາ​ຜະ­ລິດ​ປຶ້ມ​ອ່ານ​ໃຫ້​ມີ​ຄຸນ​ນະ​ພາບ ເປັນ​ປະ­ໂຫຍດ​ຕໍ່​ຜູ້​ອ່ານ ແລະ ການ​ພັດ­ທະ­ນາ​ປະ­ເທດ​ຊາດ​ໃນ​ທຸກ​ດ້ານ.

ຂ່າວທີ່ກ່ຽວຂ້ອງ