ຮ່ວມມືກັນສ້າງເງື່ອນໄຂ ໃຫ້ນັກທຸລະກິດເຂົ້າສູ່ແຫຼ່ງທຶນ SMEs

558 15 ກ.ພ. 2019 ຂ່າວໜ້າ​ໜຶ່ງ
ຮ່ວມມືກັນສ້າງເງື່ອນໄຂ ໃຫ້ນັກທຸລະກິດເຂົ້າສູ່ແຫຼ່ງທຶນ SMEs

    ທະ­ນາ­ຄານ​ພັດ­ທະ­ນາ​ລາວ (ທພລ) ແລະ ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ (ສຄອຊ) ໄດ້​ຕົກ­ລົງ​ກ່ຽວ​ກັບ​ການ​ເປີດ​ໃຫ້​ຜູ້​ປະ­ກອບ​ການ​ທຸ­ລະ​ກິດ​ຂະ­ໜາດ​ນ້ອຍ ແລະ ກາງ (SMEs) ໄດ້​ເຂົ້າ​ມາ​ສອບ​ຖາມ​ການ​ເຂົ້າ​ເຖິງ​ແຫຼ່ງ​ທຶນ​ຂອງ ທພລ ໄດ້​ຢ່າງ​ສະ­ດວກ ງ່າຍ­ດາຍ ແລະ ວ່ອງ­ໄວ ເຊິ່ງ​ເປັນ​ການ​ຮັບ​ໃຊ້​ນະ­ໂຍ­ບາຍ​ຂອງ​ລັດ­ຖະ­ບານ ແລະ ໄດ້​ເປັນ​ນິ­ມິດ​ໝາຍ​ທີ່​ດີ ທີ່​ຈະ​ເຮັດ​ໃຫ້​ຜູ້​ປະ­ກອບ​ການ​ໃນ​ພາກ SMEs ທີ່​ກວມ​ອັດ­ຕາ​ສ່ວນ​ຫຼາຍ​ກວ່າ​ໝູ່​ໄດ້​ສາ­ມາດ​ເຂົ້າ​ເຖິງ​ແຫຼ່ງ​ທຶນ ໂດຍ​ການ​ພົບ​ກັນ​ລະ­ຫວ່າງ ທພລ ແລະ ສຄອຊ ໄດ້​ຈັດ​ຂຶ້ນ​ວັນ​ທີ 13 ກຸມ­ພາ 2019 ທີ່​ສຳ­ນັກ­ງານ ສຄອຊ ນະ­ຄອນ­ຫຼວງ​ວຽງ​ຈັນ ລະ­ຫວ່າງ​ທ່ານ ອາ­ຄົມ ປຣະ​ເສີດ ຜູ້­ອຳ­ນວຍ­ການ​ໃຫຍ່ ທພລ ແລະ ທ່ານ ດາວ​ວອນ ພະ­ຈັນ​ທະ​ວົງ ຮອງ​ປະ­ທານ ສຄອຊ.

    ການ​ພົບ​ກັນ​ລະ­ຫວ່າງ 2 ພາກ­ສ່ວນ​ນີ້ ເປັນ​ການ​ປະ­ຕິ­ບັດ​ຕາມ​ບົດ​ບັນ­ທຶກ​ຊ່ວຍ​ຈຳ (MOU) ຂອງ​ທັງ​ສອງ​ຝ່າຍ​ໃນ​ເດືອນ​ພຶດ­ສະ­ພາ 2018 ແລະ ໄດ້​ມີ​ການ­ຈັດ­ຕັ້ງ​ປະ­ຕິ­ບັດ​ຫຼາຍ​ກິດ­ຈະ­ກຳ​ຮ່ວມ​ກັນ​ເຊັ່ນ: ການ​ຈັດ​ສຳ​ມະ​ນາ​ໃນ​ຫົວ­ຂໍ້: “ການ​ເຂົ້າ​ຫາ​ແຫຼ່ງ​ທຶນ” ແລະ ການ​ເປີດ​ໂຕະ​ໃຫ້​ຄຳ​ປຶກ­ສາ​ແກ່​ຜູ້​ປະ­ກອບ​ການ​ທຸ­ລະ​ກິດ SMEs ທັງ​ໃນ​ນະ­ຄອນ­ຫຼວງ​ວຽງ​ຈັນ ແຂວງ​ຫຼວງ​ພະ​ບາງ ແລະ ຈະ​ຂະ­ຫຍາຍ​ໄປ​ແຂວງ​ສະ­ຫວັນ​ນະ​ເຂດ ແຂວງ​ຈຳ­ປາ​ສັກ ແລະ ແຂວງ​ອື່ນໆ​ຕື່ມ​ອີກ ໃນ­ຕໍ່­ໜ້າ​ນີ້ ແລະ ນັບ​ແຕ່​ນີ້​ເປັນ­ຕົ້ນ​ໄປ ການ​ເປີດ​ໂຕະ​ໃຫ້​ຄຳ​ປຶກ­ສາ​ແກ່​ຜູ້​ປະ­ກອບ​ການ​ທຸ­ລະ​ກິດ SMEs ຈະ​ຈັດ​ໃນ​ວັນ​ພຸດ​ຂອງ​ທຸກ​ອາ­ທິດ​ເຊິ່ງ​ໃຫ້​ເວ­ລາ​ຫຼາຍ​ຂຶ້ນ ແລະ ເມື່ອ​ກ່ອນ​ແມ່ນ​ເດືອນ​ລະ​ຄັ້ງ.

    ການ​ເປີດ​ໂຕະ​ໃຫ້​ຄຳ​ປຶກ­ສາ​ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ມາ 3 ຄັ້ງ​ເດືອນ​ລະ​ຄັ້ງ​ຄື: ເດືອນ​ກັນ­ຍາ ເດືອນ​ຕຸ­ລາ ແລະ ເດືອນ​ພະ­ຈິກ 2018 ລວມ​ມີ 13 ຫົວ­ໜ່ວຍ​ທຸ­ລະ​ກິດ​ເຂົ້າ​ຮ່ວມ ແລະ ມີ 3 ຜູ້​ປະ­ກອບ​ການ​ໄດ້​ມາ​ພົວ­ພັນ​ກັບ ທພລ ເພື່ອ​ປະ­ກອບ​ເອ­ກະ­ສານ​ການ​ຂໍ​ກູ້​ຢືມ ເພື່ອ​ຂະ­ຫຍາຍ​ທຸ­ລະ​ກິດ ແລະ ປັດ­ຈຸ­ບັນ ທພລ ໄດ້​ອະ­ນຸ­ມັດ​ເງິນ​ກູ້​ຢືມ​ໃຫ້​ລູກ​ຄ້າ​ແລ້ວ 1 ລາຍ ສ່ວນ​ທີ່​ເຫຼືອ​ຍັງ​ຢູ່​ໃນ​ຂັ້ນ​ຕອນ​ພິ­ຈາ­ລະ­ນາ ສຳ­ລັບ​ການ​ເປີດ​ໂຕະ​ໃຫ້​ຄຳ​ປຶກ­ສາ 1 ວັນ​ແກ່​ຜູ້​ປະ­ກອບ​ການ ກໍ​ເພື່ອ​ເປັນ​ການ​ເປີດ​ໂອ­ກາດ​ໃຫ້​ຜູ້​ປະ­ກອບ​ການ​ທຸ­ລະ​ກິດ SMEs ສາ­ມາດ​ປຶກ­ສາ​ຫາ­ລື​ກ່ຽວ​ກັບ​ຫຼາຍ​ຫົວ­ຂໍ້​ເຊັ່ນ: ການ​ເຂົ້າ​ຫາ​ແຫຼ່ງ​ທຶນ​ຂອງ​ທະ­ນາ­ຄານ ການ​ຕະ­ຫຼາດ ການ​ຄ້າ ວຽກ​ງານ​ການ​ລົງ​ບັນ­ຊີ​ເປັນ­ຕົ້ນ ໂດຍ​ຈະ​ມີ​ພະ­ນັກ­ງານ​ຈາກ ທພລ ແລະ ສຄອຊ ໃຫ້​ຄຳ​ປຶກ­ສາ ຫາກ​ຜູ້​ປະ­ກອບ​ການ​ທ່ານ​ໃດ​ມີ​ຄວາມ​ສົນ­ໃຈ​ກະ­ລຸ­ນາ​ເຂົ້າ​ໄປ​ປຶກ­ສາ​ຫາ­ລື​ຕາມ​ວັນ ແລະ ເວ­ລາ​ດັ່ງ­ກ່າວ (ກຳ­ນົດ​ເວ­ລາ 1 ຊົ່ວ­ໂມງ​ກັບ 30 ນາ­ທີ​ຕໍ່​ຄົນ ຫຼື ວິ​ສາ​ຫະ​ກິດ​ໃນ​ທຸກ​ວັນ​ພຸດ) ໂດຍ​ບໍ່​ມີ­ຄ່າ​ທຳ­ນຽມ​ໃດໆ ກະ­ລຸ­ນາ​ຕິດ­ຕໍ່​ພົວ­ພັນ​ໄດ້​ທີ່​ສູນ​ໃຫ້​ບໍ­ລິ­ການ​ທຸ­ລະ​ກິດ​ຂະ­ໜາດ​ນ້ອຍ ແລະ ກາງ (LNCCI SME Service Center ໂທລະ­ສັບ: 021-416266-7 020 59548789 020 99165564 ອີ​ເມວ: [email protected] ; [email protected]

    ໂຄງ­ການ​ຮ່ວມ​ມື​ທັງ​ສອງ​ຝ່າຍ​ລະ­ຫວ່າງ ທພລ ແລະ ສຄອຊ ແມ່ນ​ໜຶ່ງ​ໃນ​ໂຄງ­ການ​ພາຍ​ໃຕ້​ການ​ຮ່ວມ​ມື​ຂອງ​ອົງ­ການ​ໄຈ​ກາ (JICA) ໃນ​ການ​ຊຸກ­ຍູ້​ສົ່ງ­ເສີມ​ຂະ­ແໜງ­ການ​ທຸ­ລະ​ກິດ SMEs ໃນ​ລາວ ແລະ ທັງ​ເປັນ​ການ​ສ້າງ​ຄວາມ​ເຂັ້ມ­ແຂງ ໃຫ້​ຜູ້​ປະ­ກອບ​ການ​ທຸ­ລະ​ກິດ​ໄດ້​ມີ​ທຶນ​ເຂົ້າ​ໃນ​ການ​ຜະ­ລິດ ແລະ ທຸ­ລະ​ກິດ ປະ­ກອບ­ສ່ວນ​ເຂົ້າ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ (ແຜນ­ການ 5 ປີ) ຄັ້ງ​ທີ 8 (NSEDP).

ຂ່າວທີ່ກ່ຽວຂ້ອງ