ໄດ້ແລ້ວ 20 ຄົນ ຄັດເລືອກນາງສາວນະຄອນຫຼວງ

710 15 ກ.ພ. 2019 ຂ່າວໜ້າ​ໜຶ່ງ
ໄດ້ແລ້ວ 20 ຄົນ ຄັດເລືອກນາງສາວນະຄອນຫຼວງ

    ເພື່ອ​ເປັນ​ການ​ສົ່ງ­ເສີມ​ມໍ­ລະ­ດົກ​ທາງ​ວັດ­ທະ­ນະ­ທຳ ນຳ​ຄຸນ­ຄ່າ​ສູ່​ແມ່­ຍິງ​ລາວ ທັງ​ເປັນ​ການ​ສົ່ງ­ເສີມ​ແມ່­ຍິງ​ລາວ​ຮຸ່ນ​ໃໝ່ ອະ­ນຸ​ຮັກ​ວັດ­ທະ­ນະ­ທຳ​ທາງ​ດ້ານ​ການ​ນຸ່ງ​ຖື ແລະ ສະ­ແດງ​ຄວາມ​ສາ­ມາດ​ຂອງ​ຕົນ​ຢູ່​ເທິງ​ວີ​ທີ​ໃຫ້​ສັງ­ຄົມ​ໄດ້​ເຫັນ ໃນ​ວັນ​ທີ 9 ກຸມ­ພາ 2019 ບໍ­ລິ­ສັດ ກຣິດ​ຕະ​ພົງ​ກຣຸບ ຈຳ­ກັດ ໂດຍ​ໄດ້​ຮັບ​ການ​ຊີ້​ນຳ​ຈາກ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ຈັດ​ພິ­ທີ​ຄັດ​ເລືອກ​ນາງ​ສາວ ນວ ປະ­ຈຳ​ປີ 2019 ຂຶ້ນ​ທີ່​ໂຮງ­ແຮມ​ແລນ​ມາກ ມີ​ທ່ານ​ນາງ ອໍ­ລະ­ໄທ ສັນ­ຕິ​ຄົງ​ຄາ ຜູ້­ອຳ­ນວຍ­ການ​ບໍ­ລິ­ສັດ ກຣິດ​ຕະ​ພົງ​ກຣຸບ ຈຳ­ກັດ ທັງ​ເປັນ​ປະ­ທານ​ການ​ຈັດ​ງານ​ຄັດ​ເລືອກ​ນາງ​ສາວ ນວ ປະ­ຈຳ​ປີ 2019 ທ່ານ ສາ­ລີ ນັນ­ທະ​ວົງ ຫົວ­ໜ້າ​ຂະ­ແໜງ​ວັດ­ທະ­ນະ­ທຳ ພະ​ແນກ ຖວ​ທ ນວ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ອົງ​ການ­ຈັດ­ຕັ້ງ​ມະ­ຫາ­ຊົນ ຄະ­ນະ​ກຳ­ມະ­ການ ແລະ ມວນ​ຊົນ​ເຂົ້າ​ຮ່ວມ.

    ການ​ຄັດ​ເລືອກ​ຄັ້ງ​ນີ້ ມີ​ນາງ​ສາວ​ເຂົ້າ​ຮ່ວມ​ທັງ​ໝົດ 85 ຄົນ ໂດຍ​ຜ່ານ​ການ​ຄັດ​ເລືອກ​ຈາກ​ຄະ­ນະ​ກຳ­ມະ­ການ​ໃນ​ຮອບ​ນີ້ ເພື່ອ​ໄປ​ຄັດ​ຕໍ່​ໃນ​ຮອບ​ສຸດ​ທ້າຍ​ມີ 20 ຄົນ​ທີ່​ຜ່ານ​ຄື: ນາງ ລິກ​ສະ​ຢາ ໄຊ​ສົມ​ພູ ນາງ ນ້ຳ​ຝົນ ພູ​ມາ​ນີ​ວົງ ນາງ ຄູນ​ສະ­ຫວັນ ໂພ­ທິ​ວັນ ນາງ ທອງ​ມະ­ນີ ເພຍ​ເທບ ນາງ ເມ​ລາ​ລີ ພັນ­ທະ​ວົງ ນາງ ເກດ​ມະ­ນີ ວົງ​ປະ­ເສີດ ນາງ ສຸ­ພາ​ລັກ ແສງ​ພະ­ຈັນ ນາງ ສົ້ມ​ທອງ ວົງ​ສະ­ໝອນ ນາງ ວັນ​ນິ­ສາ ສົມ​ໝາຍ​ຮັກ ນາງ ກ້ອຍ​ມາ­ລາ ວົງ​ແສງ​ພະ­ຈັນ ນາງ ພຸດ​ອາ​ນົງ ສີ­ດາ​ຄຳ ນາງ ສີ​ທອງ ເລົ່າ​ບຸນ​ແພງ​ທະ​ໝັ້ນ ນາງ ຄຳ​ຫຼ້າ ຈັນ­ທະ​ລັງ­ສີ ນາງ ມີ​ເຊ່ວ ຈັນ​ວັນ­ເພັງ ນາງ ຕຳ​ບຸ້ຍ ພາ­ນຸ​ວົງ ນາງ ເພັດ​ວັດ​ສາ ລິນ​ດາ​ພອນ ນາງ ຊ່າ​ລ້າ ພິມ​ມະ​ສອນ ນາງ ມັອດ​ວິ­ໄລ ອິນ​ທະ​ສອນ ນາງ ພັດ­ທະ­ນາ ຄິ​ດາ​ພອນ ແລະ ນາງ ທິບ​ສະ­ຫວັນ ມະ­ນີ​ດອນ ເຊິ່ງ​ທັງ 20 ນາງ​ສາວ​ຈະ​ໄປ​ເກັບ​ຕົວ ແລະ ຮ່ວມ​ເຄື່ອນ​ໄຫວ​ກິດ­ຈະ­ກຳ​ຕ່າງໆ ຂອງ​ລາຍ­ການ​ຄັດ​ເລືອກ​ນາງ​ສາວ ນວ ປະ­ຈຳ​ປີ 2019.

    ສຳ­ລັບ​ຮອບ​ຄັດ​ເລືອກ​ຊະ­ນະ​ເລີດ ຈະ​ໄດ້​ຈັດ​ຂຶ້ນ​ວັນ​ທີ 6 ເມ­ສາ 2019 ໂດຍ​ຈະ​ຄັດ​ເອົາ​ພຽງ 7 ຄົນ ເພື່ອ​ເປັນ​ນາງ​ສັງ­ຂານ ແຫ່​ໃນ​ບຸນ​ສົງ­ການ​ປີ​ໃໝ່​ລາວ​ປະ­ຈຳ​ປີ 2019 ນອກ​ນີ້ ຜູ້​ທີ່​ໄດ້​ຊະ­ນະ​ເລີດ​ຍັງ​ຈະ​ໄປ​ຄັດ​ເລືອກ​ຕໍ່​ລາຍ­ການ Miss Chinese ຢູ່ HongKong ປະ­ເທດ​ຈີນ ແລະ ຮອງ​ຊະ­ນະ​ເລີດ 2 ຄົນ ຈະ​ໄປ​ຄັດ​ເລືອກ​ລາຍ­ການ Miss Asian Pacific ຢູ່​ຕ່າງ­ປະ­ເທດ​ຕື່ມ​ອີກ.

ຂ່າວທີ່ກ່ຽວຂ້ອງ