ຂ່າວຫຼ້າສຸດ

ປາກງື່ມ ສຸມໃສ່ການປູກພືດກະສິກຳເປັນສິນຄ້າ

478 15 ກ.ພ. 2019 ຂ່າວໜ້າ​ໜຶ່ງ
ປາກງື່ມ ສຸມໃສ່ການປູກພືດກະສິກຳເປັນສິນຄ້າ

    ທ່ານ ທົດ​ສະ­ກັນ ໄກ­ສອນ​ເພັດ ຫົວ­ໜ້າ​ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ໃຫ້​ສຳ­ພາດ​ເມື່ອ​ບໍ່​ດົນ​ຜ່ານ​ມາ​ວ່າ: ເພື່ອ​ເຮັດ​ໃຫ້­ການ​ຜະ­ລິດ​ກະ­ສິ­ກຳ​ເພີ່ມ​ຂຶ້ນ ແລະ ສາ­ມາດ​ຕອບ​ສະ­ໜອງ​ຄວາມ​ຮຽກ­ຮ້ອງ​ຕ້ອງ­ການ ຂອງ​ນະ­ຄອນ­ຫຼວງ​ວຽງ​ຈັນ ໄດ້​ໃຫ້​ພຽງ­ພໍ ໃນ​ປີ 2019 ຫ້ອງ­ການ​ກະ­ສິ­ກຳ​ເມືອງ​ປາກ​ງື່ມ ໄດ້​ມີ​ແຜນ​ປູກ​ພືດ​ກະ­ສິ­ກຳ​ໃຫ້​ເພີ່ມ​ຂຶ້ນ ເພື່ອ​ທົດ​ແທນ​ຜົນ​ເສຍ​ຫາຍ​ຈາກ​ໄພ​ນ້ຳ​ຖ້ວມ​ໃນ​ປີ­ຜ່ານ­ມາ.

    ໂດຍ​ໄດ້​ມີ​ການ​ປະ­ສານ​ສົບ​ທົບ​ກັບ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ຊຸກ­ຍູ້​ສົ່ງ­ເສີມ​ຊາວ​ກະ­ສິ­ກອນ ໃຫ້​ເຂົ້າ​ຮ່ວມ​ໂຄງ­ການ​ປູກ​ພືດ​ກະ­ສິ­ກຳ​ເປັນ​ສິນ­ຄ້າ ໂດຍ​ສະ­ເພາະ​ແມ່ນ ການ​ຜະ­ລິດ​ເຂົ້າ­ນາ ແຊງ​ໃນ​ຈຳ­ນວນ 6 ບ້ານ 183 ຄອບ­ຄົວ ໃນ​ເນື້ອ­ທີ່​ແຜນ­ການ 1.916 ເຮັກ­ຕາ ແຜນ​ນຳ​ໃຊ້​ແນວ​ພັນ 153.28 ໂຕນ ໃນ​ນີ້ ແຜນ​ປັກ​ດຳ 766 ເຮັກ­ຕາ (ເຂົ້າ­ຈ້າວ 50 ເຮັກ­ຕາ) ນາ­ຫວ່ານ 5.702 ເຮັກ­ຕາ (ເຂົ້າ­ຈ້າວ 750 ເຮັກ­ຕາ) ຄາດ​ຄະ­ເນ​ຜົນ​ຜະ­ລິດ 4,50 ໂຕນ​ຕໍ່​ເຮັກ­ຕາ ມາ​ຮອດ​ປັດ­ຈຸ­ບັນ​ການ​ປັກ​ດຳ​ປະ­ຕິ­ບັດ​ໄດ້ 100%  ການ​ຜະ­ລິດ​ພືດ​ຜັກ ເນື້ອ­ທີ່​ແຜນ­ການ​ມີ 790,21 ເຮັກ­ຕາ ໃນ​ນີ້​ປູກ​ທົ່ວ​ໄປ​ມີ 780 ເຮັກ­ຕາ ປູກ​ພືດ​ອິນ​ຊີ 10,21 ເຮັກ­ຕາ ແລະ ພືດ​ອຸດ­ສາ­ຫະ­ກຳ ເນື້ອ­ທີ່​ແຜນ­ການ 910 ເຮັກ­ຕາ ມີ​ພືດ 8 ຊະ­ນິດ ແລະ ໄມ້​ໃຫ້​ໝາກ 740 ເຮັກ­ຕາ ໃນ​ນີ້ ສະ­ເພາະ​ການ​ປູກ​ພືດ​ຜັກ​ແມ່ນ​ໄດ້​ເລັ່ງ​ໃສ່ 2 ບ້ານ 36 ຄອບ­ຄົວ ໃນ​ເນື້ອ­ທີ່ 15 ເຮັກ­ຕາ ສາ­ລີ​ຫວານ 3 ບ້ານ 60 ຄອບ­ຄົວ ເນື້ອ­ທີ່ 100 ເຮັກ­ຕາ ມັນ­ຕົ້ນ 200 ເຮັກ­ຕາ ມັນ​ເພົາ 33 ເຮັກ­ຕາ 50 ຄອບ­ຄົວ ໝາກ­ໂມ 43 ຄອບ­ຄົວ 50 ເຮັກ­ຕາ ແລະ ສວນ​ກ້ວຍ 3 ສວນ​ມີ 230 ເຮັກ­ຕາ ນອກ​ນັ້ນ ຍັງ​ໄດ້​ຕິດ­ຕາມ​ຊຸກ­ຍູ້​ການ​ເຮັດ​ນາ​ທົດ​ລອງ ສົມ​ທຽບ​ການ​ຜະ­ລິດ​ນາ­ຫວ່ານ​ກັບ​ນາ​ດຳ​ໃນ 3 ບ້ານ​ຂອງ​ໂຄງ­ການ​ແຊ​ມາ​ອຸນ​ດົງ ສ ເກົາ­ຫຼີ ແລະ ເລັ່ງ​ຟື້ນ​ຟູ​ຊົນ­ລະ­ປະ­ທານ ຈັກ­ສູບ­ນ້ຳ ຈຳ­ນວນ 13 ສະ­ຖາ­ນີ ເພື່ອ​ຕອບ​ສະ­ໜອງ​ການ​ຜະ­ລິດ​ລະ­ດູ­ແລ້ງ ໃນ​ປີ­ຜ່ານ­ມາ​ສາ­ມາດ​ປະ­ຕິ­ບັດ​ໄດ້ 1.620 ເຮັກ­ຕາ ເທົ່າ​ກັບ 82% ຂອງ​ເນື້ອ­ທີ່​ແຜນ­ການ ວຽກ​ງານ​ການ​ລ້ຽງ­ສັດ ທົ່ວ​ເມືອງ​ມີ​ຟາມ​ລ້ຽງ​ງົວ 7 ຟາມ ມີ​ງົວ 1.430 ໂຕ ຟາມ​ລ້ຽງ​ໝູ 38 ຟາມ ມີ​ໝູ 38.900 ໂຕ ຟາມ​ໄກ່​ພັນ​ໄຂ່ 10 ຟາມ ມີ ໄກ່ 45 ພັນ​ໂຕ ຟາມ​ໄກ່​ພັນ​ຊີ້ນ 4 ຟາມ ມີ​ໄກ່ 26 ພັນ​ໂຕ ຟາມ​ລ້ຽງ​ເປັດ​ພັນ​ໄຂ່ 6 ຟາມ ມີ​ເປັດ​ໄຂ່ 28 ພັນ​ໂຕ ແລະ ຟາມ​ລ້ຽງ​ນົກ​ກະ­ທາ 1 ຟາມ ມີ​ນົກ​ກະ­ທາ 210.000 ໂຕ.

ຂ່າວທີ່ກ່ຽວຂ້ອງ