ເສດຖະກິດ​ຂອງ​ອັງກິດ ເຕີບ​ໂຕ​ຊັກ​ຊ້າ​ທີ່​ສຸດ​ໃນ​ຮອບ 6 ປີ

575 15 ກ.ພ. 2019 ຂ່າວຕ່າງປະເທດ
ເສດຖະກິດ​ຂອງ​ອັງກິດ ເຕີບ​ໂຕ​ຊັກ​ຊ້າ​ທີ່​ສຸດ​ໃນ​ຮອບ 6 ປີ

    ຫ້ອງການ​ສະຖິຕິ​ແຫ່ງ​ຊາດ (ONS) ຂອງ​ອັງກິດ ໄດ້​ນຳ​ເປີດເຜີຍ​ຕົວ​ເລກ​ອອກ​ມາ​ເມື່ອ​ວັນ​ທີ 11 ກຸມພາ​ນີ້ ຊີ້​ໃຫ້​ເຫັນ​ວ່າ ພື້ນຖານ​ເສດຖະກິດ​ອັງກິດ ໃນ​ປີ 2018 ເຕີບ​ໂຕ​ຢູ່​ທີ່​ລະດັບ​ຕ່ຳ​ສຸດ ໃນ​ຮອບ 6 ປີ​ທີ່​ຜ່ານ​ມາ.

   ONS ໃຫ້​ຮູ້​ວ່າ ຄວາມ​ເຕີບ​ໂຕ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ​ອັງກິດ ໃນ​ປີ 2018 ບັນລຸ 1,4% ຫຼຸດ​ລົງ​ເມື່ອ​ທຽບໃສ່​ລະດັບ 1,8% ໃນ​ປີ 2017 ແລະ ກໍ​ເປັນ​ລະດັບ​ຕ່ຳ​ສຸດ​ນັບ​ແຕ່​ປີ 2012 ເປັນຕົ້ນ​ມາ ໃນ​ຂະນະ​ທີ່​ຄວາມ​ເຕີບ​ໂຕ GDP ໃນ​ໄຕ​ມາດ​ທີ 4 ຂອງ​ປີ 2018 ບັນລຸ​ພຽງ​ທີ່ 0,2%. ONS ຍັງ​ໃຫ້​ຮູ້​ຕື່ມ​ວ່າ ຈັງຫວະ​ຄວາມ​ເຕີບ​ໂຕ  GDP ໄດ້​ຊັກ​ຊ້າ​ລົງ​ຢ່າງ​ເຫັນ​ໄດ້​ຈະແຈ້ງ ພາຍ​ໃນ 3 ເດືອນ​ທ້າຍ​ປີ​ກາຍ ໃນ​ນັ້ນ ສະເພາະ​ແຕ່​ໃນ​ເດືອນ​ທັນວາ​ປີ​ກາຍ ໄດ້​ຫຼຸດ​ລົງ 0,4%. ນີ້​ເປັນ​ເທື່ອ​ທຳ​ອິດ ນັບ​ແຕ່​ເດືອນ​ກັນຍາ ປີ 2012 ເປັນຕົ້ນ​ມາ ທີ່​ຄວາມ​ເຕີບ​ໂຕ​ໃນ​ຂົງເຂດ​ການ​ກໍ່ສ້າງ ການ​ຜະລິດ ແລະ ການ​ບໍລິການ ຫຼຸດ​ລົງ​ໃນ​ເດືອນ​ສຸດ​ທ້າຍ​ຂອງ​ປີ.

    ບົດ​ລາຍ​ງານ​ຂອງ ONS ຖືກ​ນຳ​ອອກ​ມາ​ເປີດເຜີຍ ທ່າມກາງ​ທີ່​ຂະ​ບວນ​ການ​ນຳ​ເອົາ ອັງກິດ​ອອກ​ໄປ​ຈາກ​ສະຫະພາບ​ເອີ​ຣົບ (EU) ຫຼື​ທີ່​ເອີ້ນ​ວ່າ Brexit ນັ້ນ​ຍັງ​ບໍ່​ມີ​ຄວາມ​ຈະແຈ້ງ ແລະ ຄວາມ​ເຕີບ​ໂຕ​ເສດຖະກິດ​ທົ່ວ​ໂລກ ກໍ​ອ່ອນແອ​ລົງ​ກວ່າ​ເກົ່າ. ຕາມ​ແຜນການ​ແລ້ວ ອັງກິດ​ຈະ​ອອກ​ໄປ​ຈາກ EU ໃນ​ວັນ​ທີ 29 ມີນາ​ໜ້າ​ນີ້ ແຕ່​ວ່າ​ຈົນ​ມາ​ເຖິງ​ເວລາ​ນີ້ ກໍ​ຍັງ​ບໍ່​ທັນ​ມີ​ຂໍ້​ຕົກລົງ ທີ່​ໄດ້​ຮັບ​ຄວາມ​ເຫັນ​ດີ​ຈາກ​ທັງ EU ແລະ​ສະພາ​ແຫ່ງ​ຊາດ​ອັງກິດ. ສະພາບ​ການ​ຄື​ດັ່ງກ່າວ ເປັນ​ການສະແດງ​ໃຫ້​ເຫັນ​ວ່າ ມີ​ຄວາມ​ເປັນ​ໄປ​ໄດ້​ຫຼາຍ ທີ່​ອັງກິດ​ຈະ​ອອກ​ໄປ​ຈາກ EU ໂດຍ​ປາສະຈາກ​ຂໍ້​ຕົກລົງ ແລະ ເປັນ​ຜົນ​ກະທົບ​ໃນ​ທາງ​ລົບ ຕໍ່​ພື້ນຖານ​ເສດຖະກິດ​ອັວກ​​ິດ ທີ່​ມີ​ຂະໜາດ​ໃຫຍ່​ເປັນ​ອັນ​ດັບ​ທີ​ຫ້າ​ຂອງ​ໂລກ​ນັ້ນ.

    ໃນ​ຂະນະ​ດຽວ​ກັນ ເມື່ອ​ອາທິດ​ທີ່​ຜ່ານ​ມາ ທະນາຄານ​ກາງ​ອັງກິດ (BoE) ໄດ້​ປັບ​ຫຼຸດ​ການ​ຄາດ​ຄະເນ​ຄວາມ​ເຕີບ​ໂຕ​ຂອງ​ເສດຖະກິດ​ອັງກິດ ໃນ​ປີ 2019 ລົງ​ຈາກ​ລະດັບ 1,7% ມາ​ຢູ່​ທີ່  1,2% ຍ້ອນ​ວ່າ​ເສດຖະກິດ​ທົ່ວ​ໂລກ ເຕີບ​ໂຕ​ຊັກ​ຊ້າ​ລົງ ບວກ​ກັບ​ຜົນ​ກະທົບ​ຈາກ Brexit./.

 

ຂ່າວທີ່ກ່ຽວຂ້ອງ