ໜີ້​ພາກ​ລັດ​ຂອງ ສ ອາ​ເມ​ຣິ​ກາ ບັນລຸ​ເກີນ​ແດນ 22.000 ຕື້​ໂດ​ລາ

527 15 ກ.ພ. 2019 ຂ່າວຕ່າງປະເທດ
ໜີ້​ພາກ​ລັດ​ຂອງ ສ ອາ​ເມ​ຣິ​ກາ ບັນລຸ​ເກີນ​ແດນ 22.000 ຕື້​ໂດ​ລາ

   ໃນ​ບົດ​ລາຍ​ງານ​ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 12 ກຸມພາ​ນີ້ ກະຊວງ​ການ​ເງິນ ສ ອາ​ເມ​ຣິ​ກາ ໃຫ້​ຮູ້​ວ່າ ໜີ້​ພາກ​ລັດ​ຂອງ ສ ອາ​ເມ​ຣິ​ກາ ໄດ້​ເບັນ​ລຸ​ກີນ​ແດນ 22.000 ຕື້​ໂດ​ລາ ສະຫະລັດ ເປັນ​ເທື່ອ​ທຳ​ອິດ​ໃນ​ປະຫວັດສາດ ຫຼື​ເທົ່າ​ກັບ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ​ພື້ນຖານ​ເສດຖະກິດ​ຈີນ ຍີ່ປຸ່ນ ແລະ ເຢຍ​ລະ​ມັນ ບວກ​ເຂົ້າກັນ.

    ບົດ​ລາຍ​ງານ​ດັ່ງກ່າວ​ໃຫ້​ຮູ້​ວ່າ ຍອດ​ໜີ້​ສິນ​ພາກ​ລັດ​ຂອງ ສ ອາ​ເມ​ຣິ​ກາ ໃນ​ປັດຈຸບັນ​ຢູ່​ທີ່​ລະດັບ  22.010 ຕື້​ໂດ​ລາ​ສະຫະລັດ ເພີ່ມ​ຂຶ້ນ​ຫຼາຍ​ພໍ​ສົມຄວນ ເມື່ອ​ທຽບໃສ່​ລະດັບ 19.950 ຕື້​ໂດ​ລາ​ສະຫະລັດ ໃນ​ຈຸດ​ເວລາ​ທີ່​ປະທານາທິບໍດີ ໂດ​ນາ​​ລ ທຣຳ ສາບານ​ຕົນ​ຮັບ​ຕຳແໜ່ງ ໃນ​ວັນ​ທີ 20 ມັງກອນ ປີ 2017.

    ໜີ້​ພາກ​ລັດ​ຂອງ ສ ອາ​ເມ​ຣິ​ກາ ໄດ້​ເພີ່ມ​ຂຶ້ນ​ນັບ​ແຕ່​ເວລາ​ທີ່​ປະທານາທິບໍດີ ທຣຳ ໃຫ້​ເຂົ້າ​ສູ່​ການ​ປະຕິບັດ​ນະໂຍບາຍ​ຕັດ​ຫຼຸດ​ພາສີ ລວມ​ມູນ​ຄ່າ 1.500 ຕື້​ໂດ​ລາ​ສະຫະລັດ ເມື່ອ​ເດືອນ ທັນວາ ປີ 2017 ແລະ ເມື່ອ​ປີ​ກາຍ ສະພາ​ແຫ່ງ​ຊາດ ສ ອາ​ເມ​ຣິ​ກາ ໄດ້​ຮັບຮອງ​ຮ່າງ​ກົດໝາຍ ວ່າ​ດ້ວຍ​ການ​ເພີ່ມ​ຄ່າ​ໃຊ້​ຈ່າຍ​ໃຫ້​ແກ່​ການ​ທະຫານ ກໍ​ຄື​ໂຄງການ​ສະຫວັດດີ​ການ​ສັງຄົມ.

   ໜີ້​ສິນ​ພາກ​ລັດ​ຂອງ ສ ອາ​ເມ​ຣິ​ກາ ໄດ້​ຮັບ​ການ​ຄິດໄລ່​ກໍ​ຄື​ໂຮມ​ເອົາ​ຍອດ​ຂາດ​ດຸນ​ງົບປະມານ ຂອງ​ແຕ່​ລະ​ປີ. ຫ້ອງການ​ງົບປະມານ​ຂອງ​ສະພາ​ແຫ່ງ​ຊາດ ສ ອາ​ເມ​ຣິ​ກາ (CBO) ແຈ້ງ​ໃຫ້​ຮູ້ ເມື່ອ​ເດືອນ​ກ່ອນ ວ່າ​ຂາດ​ດຸນ​ງົບປະມານ​ຂອງ ສ ອາ​ເມ​ຣິ​ກາ ໃນ​ປີ 2019 ອາດ​ຈະ​ຂຶ້ນ​ເຖິງ​ລະດັບ 897 ຕື້​ໂດ​ລາ​ສະຫະລັດ ເພີ່ມ​ຂຶ້ນ 15,1% ເມື່ອ​ທຽບໃສ່​ລະດັບ 779 ຕື້​ໂດ​ລາ​ສະຫະລັດ ໃນ​ປີ​ກາຍ. ໃນ​ຂະນະ​ດຽວ​ກັນ CBO ກໍ​ແຈ້ງ​ເຕືອນ​ວ່າ ຂາດ​ດຸນ​ງົບປະມານ ຍັງ​ຈະ​ສືບຕໍ່​ເພີ່ມ​ຂຶ້ນ​ໃນ​ຊຸມ​ປີ​ຕໍ່ໜ້າ ຊຶ່ງ​ຈະ​ເກີນ​ແດນ 1.000 ຕື້​ໂດ​ລາ​ສະຫະລັດ ໃນ​ແຕ່​ລະ​ປີ ໂດຍ​ເລີ່ມ​ແຕ່​ປີ 2022 ເປັນຕົ້ນ​ໄປ ແລະ ຈະ​ບໍ່​ຫຼຸດ​ໄປ​ຢູ່​ຕ່ຳ​ກວ່າ​ລະດັບ​ດັ່ງກ່າວ ໄປ​ຈົນ​ຮອດ​ປີ 2029.

   ເມື່ອ​ທ້າຍ​ປີ​ກາຍ CBO ກໍ​ໄດ້​ແຈ້ງ​ເຕືອນ​ໄວ້​ວ່າ ຂະໜາດ​ໜີ້​ພາກ​ລັດ​ຂອງ ສ ອາ​ເມ​ຣິ​ກາ ອາດ​ຈະ​ແຕະ​ລະດັບ 100% ຂອງ GDP ພາຍ​ໃນ​ທ້າຍ​ທົດ​ສະ​ວັດ​ໜ້າ ແລະ​ ເພີ່ມ​ຂຶ້ນ​ສູ່ 152% ຂອງ GDP ພາຍ​ໃນ​ປີ 2048.

 

ຂ່າວທີ່ກ່ຽວຂ້ອງ